لە هەرێمى کوردستان دەستکارى تەمەنى خانەنشینى دەکرێت
09:06 - 30/10/2024
زەمەن - کوردستانى
هەردوو وەزارەتى دارایى و ئابوورى هەرێمى کوردستان و عێراق، تەمەنى خانەنشینى ئارەزوومەندانە زیاد دەکەن و چیتر فەرمانبەران لە تەمەنى 45 ساڵیدا ناتوانن داواى خانەنشینبوون بکەن.
هەردوو وەزارەتى دارایى هەرێم و عێراق هۆکارى زیادکردنى تەمەنى خانەنشینى ئارەزوومەندانە بۆ ئەوە دەگێڕنەوە، ژمارەیەکى زۆر لە فەرمانبەران کاتێک تەمەنیان دەگاتە 45 ساڵ، بەوهۆیەوە داواى خانەنشینبوون دەکەن و تا دێت ژمارەى خانەنشینان زیاد دەکات.
تەمەنی خانەنشینی لە هەرێمی کوردستان 63 ساڵە، تاوەکو ئەمڕۆ ئەگەر بتویستبا پێش ئەوەی ببیتە 63 ساڵ خۆت خانەنشین بکەیت، دەبوو 15 ساڵ خزمەتت هەبووایە و تەمەنت 45 ساڵ بووایە، بەڵام ئێستا دۆخەکە بەجۆرێکی دیکەیە.
بەگوێرەى رێککەوتنى هەردوو وەزارەتى دارایى عێراق و هەرێمى کوردستان و بەپێى یاسا نوێکەى خانەنشینى، تەمەنی خانەنشینی ئارەزوومەندانە لە 45 ساڵەوە بۆ 50 ساڵ و، لە 15 ساڵ خزمەتەوە بۆ 20 ساڵ خزمەت بەرزدەکرێتەوە، لەمەودوا بەو بڕیارە نوێیە فەرمانبەران دەتوانن داوای خانەنشینی ئارەزوومەندانە بکەن.