ڕۆژنامەی مەدا: مانەوە لە ترافیکەکاندا ساڵانە دوو ملیار دۆلار زیان لە عێراق دەدات
01:24 - 29/01/2025
زەمەن _ عێراقی
ڕۆژنامەی مەدای عێراقی بڵاویکردووەتەوە، فەرمانبەران و کرێکارانی عێراق کاتێکى زۆریان لەنێو قەرەبلاڵغی شەقام و ترافیکەکاندا لەدەستدەچێت و لەبری ئەوەى ئەوکاتە لە وەبەرهێناندا بەکاربهێنن ماندوویان دەکات.
ئەمڕۆ چوارشەممە، ٢٩ی کانوونی دووەمی ٢٠٢٥، ڕۆژنامەی مەدای عێراقی لە ژمارەی ئەمڕۆیدا، لە زاری فازڵ غەڕاوى سەرۆکی ناوەندى ستراتیژیی بۆ مافەکانى مرۆڤ لە عێراق رایگەیاندووە، قەرەباڵغی شەقامەکان و مانەوەى زۆر لە ترافیکەکاندا یەکێکە لە کێشە ئابورییەکانى عێراق و بەشێوەیەکى راستەوخۆ و ناڕاستەوخۆ زیان لە داهاتى نیشتمانى دەدات، رایگەیاند، بەگوێرەى توێژینەوەیەک فەرمانبەران و کرێکاران کاتێکى زۆریان لەنێو قەرەبلاڵغی شەقام و ترافیکەکاندا لەدەستدەچێت و لەبری ئەوەى ئەوکاتە لە وەبەرهێناندا بەکاربهێنن ماندوویان دەکات.
هاوکات، بەگوێرەى راپۆرتى -گڵۆباڵ ترافیک سکورکارد- فەرمانبەرانى شارەکان ساڵانە 100 بۆ 150 کاتژمێرى تەمەنی کارکردنیان لەنێو قەرەباڵغی و ترافیکەکاندا بەفیرۆدەچێت و بەڕێژەى 2% بۆ 5% ـى رێژەى بەرهەمهێنانیان کەمدەکاتەوە جگە لە پیسبوونى ژینگە و بەکارهێنانى ناپێویستى سوتەمەنى ئۆتۆمبێلەکان و ناڕەحەتى گەیشتنى ئۆتۆمبێلی فریاکەوتن و ئەوانەى دی کە پێویست دەکات زوو بگەنە سەر ئامانجەکانیان، غەراوى رایگەیاندووە عێراق ساڵانى لەنێوان یەک تا دوو ملیار دۆلاردا زیانى بەردەکەوێت، بانکی نێودەوڵەتیش بڵاویکردووەتەوە یەکێک لە کێشەکانى فەرمانبەرانى کەرتى گشتى لەعێراق ئەوەیە کە درەنگ دەگەنە شوێنى کارکردنیان و بووەتە هۆی دابەزینى بەرهەمهێنان بە رێژەى 15%، غەڕاوى راشیگەیاندووە لە شارە گەورەکاندا سێ کاتژمێر کاتى هاووڵاتیان لە ترافیک و قەرەباڵغییەکاندا بەفیرۆدەچێت.