بڕیاری خانەنشینی 2 قەیران و 2 پرسیار؟!...
1/27/2025 3:07:00 PM
فەرەیدون بێوار
خانەنشینکردنی زۆرەملێ و چەسپاو لەسەرجەم وەزارت و فەرمانگەکان بەبێ رێزپەر، کارێکی باش و گونجاوە، بەڵام خانەنشینکردنی نزیکەی 35 هەزار فەرمانبەر کە نزیکەی 5 هەزاریان مامۆستان، بەبێ دیراسەکردن و پلان بۆ دانراو و بەبێ دامەزراندنی نوێ و شوێنگرەوە، دوو قەیران بەدوای خۆیدا دێنێت:
1: یاسای خانەنشینی یەکگرتووی عێراق، چەند ساڵێکە دەرچووە و هەرێم جێبەجێی نەکردووە، ئێستا کە یاساکە بۆ هەموارکردنەوە لەپەرلەمانی عێراقە و پێشنیاز کراوە، تەمەنی خانەنشینی لە 60 ساڵەوە بەرز بکرێتەوە بۆ 63 ساڵ، لەگەڵ پەسەندکردنی هەموارەکە، قەیرانێکی نوێتر لەنێوان هەرێم و بەغداد لەداهاتوودا سەر هەڵدەدات.
ئنجا ئایا لەگەڵ بەغداد هەماهەنگی و رێککەوتن کراوە؟
حکومەتی هەرێم 12 مووچەیان بەسەریەکەوە دەداتێ کە مافی خۆیانە؟
قەرەبووی پلەبەرزکردنەوەکەیان بۆ دەکاتەوە، کە نزیکەی 10 ساڵە راگیراوە؟
ئەو فەرمانبەرانەی لەوەرگرتنی زەوی سوودمەندنەبوون، پارچە زەوییەکیان پێدەدات؟
2: بەرلەوەی بڕیارەکە بدەن، دەبوایە بە دیراسە و پلان بووایە، ئایا چەند هەزار فەرمانبەر و مامۆستا ....خانەنشین دەکرێن؟ لە کامە بەش و فەرمانگە و سێکتەرن؟ ئایا کێشەی کەمی و بۆشایی میلاک و پسپۆری لەکوێ درووست دەبێت و چۆن چارەسەر دەکرێت و میلاک چۆن رێکدەخرێتەوە؟
لەهەمووی کارەساتبارتر ئەوەیە کە سێ تەمەن پێکەوە خانەنشینکران و هەزاران مامۆستا دەگرێتەوە و لە ئەسنا دەوامی قوتابخانە، بڕیارەکە چووە بواری جێبەجێکردنەوە، ئێستا سەدان قوتابخانە و هەزاران قوتابی، کێشەی بێ مامۆستایی و پسپۆرییان هەیە، بەتایبەتی زانستەکان و ئینگلیزی و بیرکاری.
قوتابخانە هەیە کێشەی کەمی یەک مامۆستای هەبووە و حکومەت بۆی تەعین نەکردووە، کەچی ئێستا دەرزەنێکی خانەنشین لێ بووە.
ئنجا دوو پرسیار:
یەکەم:
ئایا بڕیاری لەو جۆرە لەدەسەڵاتی سەرۆکی حکومەتی کاربەڕێکەردایە یان پێویستی بە رەزامەندی و بڕیاری پەرلەمانە؟
دووەم:
ئایا پێشتر لەئنجوومەنی وەزیران بڕیارە گەنگەشە و دیراسە کراوە و کۆدەنگی لەسەر بووە، یان بڕیاری تاکەکەسییە؟
چونکە تەنانەت وەزیرەکانی پارتیش هاوارییان لێ هەستاوە، لەوانە وەزیری پەروەردە و تەندروستی، تەنانەت پەروەردە هەوڵی راگرتن و دواخستنی بڕیارەکە دەدات.
کەواتە ئەم بڕیارە سەرباری بێمووچەیی، هێندەی تر کەرتی پەروەردە و فەرمانگە خزمەتگوزارییەکان دادەتەپێنێت.
تۆ بڵێی بەغداد لە فەلەکەی خواردبێتەوە و 35 هەزار خانەنشین بکات و 40 هەزاری نوێمان بۆ تەعین بکات؟
بژی عێراقی موفلیسی مەزن