بەرەو هەرەس
9/11/2023 3:23:00 PM
شەپۆل عەلی عەسکەری
دیسانەوە کوردستان کەوتە ناو هەڵمەت و قسە و قسەڵۆکی هەڵبژاردنەوە. دیسانەوە دەربڕینی ووشەو دەستەواژەی بێ ئەرزش، تۆمەتبارکردن و تەخوینکردنی یەکترو چەند ڕستەیەکی سەدان بارەی سوواو، چەند ووشەیەکی مل شکێنەری بێ واتا و بێ ناوەڕۆک بۆ شکاندن و ڕسواییکردنی یەکتر، بۆچی؟
ئایا لەباتی بەکارهێنانی ئەو هەموو ووشە زبرو نەشیاوانەی کە شەقام دەشێوێنێ و پشێوی لەناو خەڵکدا دەنێتەوە، بەتایبەتی، کە ٣١ ساڵە هەمیشە لە کات و ساتی هەڵبژاردنەکاندا ئێمە تەنیا قسەی زبرو نەشیاو لە ئێوە دەبیستین، وەک ئەوەی گووتاری زبرو شێوێنەر بەشێک بێت لە موراڵێکی نەگۆڕتان، بەشێک بێت لەو بەرنامە بەناو چاکسازیانەی کە هەموولایەکتان بەچڕی قسەی لەسەر دەکەن، بەڵام داخۆ ناکرێت گۆڕانکاریەک لە کردار و گوفتارەکانتاندا، لە ووشەکانتاندا بکەن، وەک ئەو پەندەی دەڵی: " بە گۆڕینی ووشەکانت ئایندەت دەگۆڕی change your words to change your world " " لێرەوە بیکەن بە یەکەم هەنگاو بەرەو چاکسازی..!!
هەر چەندە لە هەڵبژاردنەکاندا هیچ پێوەرێک نەبووە و لەئێستادا نابێت بەڵام ئەوەی کە بۆ هەمووان ڕوونە، ئەوەیە کە براوەی یەکەم ئەوانەن کە زۆرترین جنێو و ووشەی زبر بەکار دەهێنن، جا هیچ گرنگ نیە تۆ کێیت و هەگبەی سیاسیت چەند بەتاڵە..!! یان زێدەباری ئەو هەموو شکستانەی بەسەر گەلی کوردتانا هێناوە، هیچ بەرنامەیەکی ڕاست و دروستیشتان نەبێت چاکسازی بکەن، باری خواری گەل ڕاست بکەنەوە و ئاشتەوایی کۆمەڵایەتی و سەقامگیری سیاسیی وئابوری بونیات بنێن، هەر وەک چۆن هەوڵی جدی و پلانیشتان نیە بۆ ڕاستکردنەوەی باری لاری پەروەردە و گەشە بە تەندروستی بدەن و سیستەمێکی دادوەری سەربەخۆ بونیات بنێن و گرنگی بە بوونی دەستوورێک کە هەموو ماف و ئەرکەکان تێدا بە شێوەیکی دادپەروەرانە بچەسپێنن و....هتد!
ئەو بەرنامانەی کە بە درێژایی ٣١ ساڵ داگیرکەرانی کوردستان و ووڵاتانی ناوچەکە بەمەبەستی شێواندن و دابەشکردنی کۆمەڵگای کوردی لە سەر هەمان بنەمای ئەو دەستەواژە سیاسی و ئابوریە باوەی Divide and Rul، فرق تسد"، کە پێشتر ووڵاتانی ئیمپریالیزم دەیان ساڵ لەدژی شۆڕشی گەلان بەکاریانهێنا، ئێوە سەرکەوتووانە بۆ داگیرکەرانتان جێبەجێکردو هاونیشتیمانیانی هەرێمی کوردستانتان بەش بەشکردو کۆمەڵگاتان کردۆتە دیلی داگیرکەرانی.
ئەوەتا ئەمڕۆ بەشێوازێک دەرئەنجامەکانی دەبینین کە لە فەرهەنگ و مێژووی سیاسی هیچ گەلێکی دنیادا سەرکردەی بەم شێوازە نەبیستراوە و نەبینراوە، تەنانەت ئەستەمە پێناسەیەکیش بدۆزینەوە لەگەڵ دۆخی حکومەت و هەرێمی کوردستاندا بگوونجێت، بێجگە لەوەی ماوەتەوە بڵێین، گەلێک بە چەکی کیمیا کۆمەڵکوژ کرابێت، جینۆسایدو ئەنفالی بەسەر هاتبێت و تەواوی نیشتمانەکەی سوتێنرابێت، کەی ڕەوایە لە ٣١ ساڵی حوکمی خۆماڵی دا نەک هیچی بەدەستنەهێنابێت، بگرە سەرکردە حزبیەکانیشی هیچ لە ئەزموونی شکستەکانیان فێرنەبن.دەپرسم ئایا بەدرێژایی مێژووی مرۆڤایەتی ئینسانێکتان دیتووە بە دەستی خۆی گۆڕ بۆ خۆی هەڵبکەنێت یان میللەتێک هەبووە بەدەستی خۆی نیشتیمانەکەی بخاتە مەترسییەوە و خوێنی قوربانیان و خەباتی دەیان ساڵەی خەڵک هەتا ئاستی تیاچوون و هەرەس بچووک بکاتەوە، کەچی بۆ جارێکیش نەیات سەرێکی شەرمەزاری لە ئاستی گەورەیی تراژیدیای میللەتدا نەوی بکاو داوای لێبووردن لە جەماوەر بکات...!!
سەرکردەکان ئەوانەی دوێنێ باسی ئازادی گەل و پارستنی مافی چینی پرۆلیتارو زەحمەتکێشیان دەکرد، تەنانەت دژی ناو ناوبانگی ئەو هاوڕێیانەشیان دەوەستانەوە کە باگراوندی شێخ یا ئاغایان هەبوو، سەرباری ئەوەی زۆربەی ئەوانە لەپێناو بەدەستهێنانی ئایندەیەکی ڕوون بۆ نەوەکانی داهاتوو وازیان لە هەموو ژیانی خۆیان هێنابوو ، کەچی ئێستا خودی ئەوانەن بوونەتە سەرمایەداری ناشەرعی بێ فکرو خاوەن کۆشک و تەلار و دەیان کۆمپانیای زەبەلەح و چەندین لیواو ڕەتڵی حمایە، هەر یەکشیان چەندیین نازناویان لە خۆیان ناوە و...هتد، بەڵام بێ ئاگابوون لەوەی رۆژێک دێت هیندە بچووک دەبنەوە، هەر وەک سەردەمی بەعس عەریفێکی حکومەتی ناوەند دەیانهێنێ و دەیانبات، چوونکە نەیانویست ئەو نیشتیمان و خەڵکەکەی بپارێزن کە لە سایەی دا بەو شێوازە شاهانەیە ژیان دەگوزەرێنن.
شکست لە دوای شکست و یەکدی شکاندن، بەش بەشکردنی جەماوەر و فراوانکردنی جیاوازی نێوانیان، لە دەستدانی ئایندە و ژیان و دۆسێە هەرە گرنگەکانی کوردستان کە لە ئەنجامی خەبات و قوربانیدانی بێ وێنەی میللەتی کورد بەدەست هاتبوون، بۆیە ئێستا لە سایەی ئەم لاوازییەی تێی کەوتووین، ڕۆژانە بەبەرچاوی هەمووانەوە بەرەو نەمان دەڕۆن و قەوارەی هەرێمتان دووچاری مەترسییەکی گەورە کردووە، بەتایبەتی ئێستا هەمان ئەزموون و ئەو هەڵە مێژوویانەی فەڵستینیەکان دەبینرێت کە لەپێناو بڕێک دەستکەوتی کاتی دا، نیوەی خاک و نیشتیمانەکەیان بە جوولەکە ئەوروپێکان فرۆشت، کەچی ئەمڕۆ لەگەڵ ئەوەی پەشیمانن، ناتوانن تەنانەت یەک سانتیمەتریش لە خاکە فرۆشراوەکانیان بگەڕێننەوە. ئێوەش سەدان شوقەو هەزاران مەتر زەویتان بە عەرەب فرۆشتووە، ئایا نازانن زیادبوونی ڕێژەی عەرەب لە هەولێر و سلێمانی و دهۆک چ واتایەکی هەیەو چی مەترسیەک لەسەر دیمۆگرافیاو چارەنووسی هەرێم دروست دەکات؟
بەسە.. ئیتر پێویستە کارە نابەجێیەکانی ڕابووردو و بەتایبەتی پێنج ساڵی ڕابووردوتان هەڵسەنگێن و بەراوردی بکەن بە ئەمڕۆ، تێبگەن ئەگەر بە زووترین کات گۆڕانکاری لە موراڵ و سیاسەتە چەوتەکانتاندا نەکەن، فریای هیچ ناکەون، ئەمجارە نەک بەتەنیا چارەنووسی حزبەکانتان، بەڵکو هەرێمی کوردستان و خەڵک و خاک و نیشتیمانەکەشی هەرەس دەهێنێت!