هێز و لایەنی سیاسی رۆژئاوای كوردستان ڕاگەیەندراوێكیان دژی لێكنزیكبوونەوەكانی سوریا و توركیا بڵاوكردەوە
09:14 - 04/07/2024
زەمەن - کوردستانى
33 هێز و لایەنی سیاسی رۆژئاوای كوردستان، ڕاگەیەندراوێكیان دژی لێكنزیكبوونەوەكانی توركیا و سوریا بڵاوكردەوە و دەڵێن، ئاشتەوایی نێوان توركیا و سوریا، شەرعییەت دانە بە داگیركارییەكانی توركیا لە سوریا.
ئەو هێز و لایەنە سیاسییانەی رۆژئاوای كوردستان لە ڕاگەیەندراوێكی هاوبەشدا ئیدانەی كردەوەكانی توركیا لە سوریا و ڕۆژئاوای كوردستان دەكەن و داوا لە كۆمەڵگەی نێودەوڵەتی و نەتەوەیەكگرتووەكان دەكەن، پشتیوانی لە داواكارییەكانی گەلی سوریا بكەن بۆ ئازادیی و دیموكراسی.
دەشڵێن، ئاشتەوایی نێوان رژێمەكانی توركیا و سوریا، جگە لەوەی شەرعییەت دانە بە داگیركاری و دەستێوەردانەكانی توركیا، هاوكات قەیرانەكانیش قوڵتردەكاتەوە.
ئەوەش دوای ئەوە دێت توركیا و سوریا ئامادەییان نیشانداوە بۆ ئاساییكردنەوەی پەپوەندییەكانیان لەدوای ١٣ ساڵ لە پچڕان و هاوسەرۆكانی دەمپارتیش داوادەكەن، لە ئاساییكردنەوەی پەیوەندییەكانی نێوان دوو ئەو وڵاتە مافەكانی گەلی كورد لەبەرچاوبگیرێت.