بەپەلە.. لە هەولێر دوو پۆلیس بە فیشەک بریندارکران
03:32 - 06/01/2025
زەمەن - هەولێر
لە رووداوێکی تەقەکردندا لە سنووری قەزای پیرمام لە پارێزگای هەولێر، دوو پۆلیس بریندار کران.
ئەمڕۆ دووشەممە روداوەکە رویداو قایمقامی قەزاکە دەڵێت، تۆمەتبارەکان دەستگیرکراون.
حەمید کاکەیی، قایمقامی قەزای پیرمام رایگەیاندووه، "تۆمەتبارێک لە پۆلیسی هەولێر فەرمانی دەستگیرکردنی هەبووە و لە فەرمانگەی کارتی نیشتمانیی بەستۆڕە دەستبەسەر کراوە، بەڵام لەکاتی گواستنەوەیدا بۆ نێو ئۆتۆمبێلی پۆلیس، خزمێکی تەقەی کردووە و دوو پۆلیس بریندار بوون."
ئاماژەی بۆ ئەوەشکرد پۆلیسەکان برینەکەیان سووکە و دوای رووداوەکەش، تەقەکەرەکە هەڵاتووە، بەڵام پاش ماوەیەک لەلایەن هێزە ئەمنییەکانەوە دەستگیرکراوە و رادەستی پۆلیس کراوە.ووتیشی،هەردوو تۆمەتبارەکە راگیراون و لێکۆڵینەوەیان لەگەڵدا دەکرێت