لەساڵیادی شاری پایتەختی رۆشنبیریدا؛ هەڵوەستەیەکی خەمخۆرانە!!!
11/14/2021 11:10:00 AM
کنێر عه‌بدوڵا
هاوکات لەگەڵ تێپەرینی ٢٣٧ ساڵ بەسەر دامەزراندنی
شاری سلێمانیدا دۆخی خەڵکی شار و شارەکانی تری هەرێمی کوردستانیش لەژێر پرسیارێکی
زۆردایە، ئالۆزی و سەختی و ناهەمواری دۆخەکە باڵی کێشاوە بەسەر زوربەی خەڵکدا.
من لێرەدا ناچمە باسی مێژوویی سەبارەت بەوەی بڵێم ٢٣٧ ساڵ لە کوێوە سەرچاوەی
گرتوەو چۆن و بۆ و هتد? ئەوەندەی ئەمەوێ تیشک بخەمە سەر ئەوەی ئاخۆ پاش ئەوەندە ساڵ
تێپەرین؛ دۆخی ئێستای سلێمانی لە هەموو رویەکی رۆشنبیری و سیاسی و ئابوری و دەرونی
خەڵک بەبەراوورد لەگەڵ رابردوودا چەند هەنگاوی بریوە روەو باشتر?! ، ئەوە گەر بەرەو
باشی رۆشتبێ! خۆ گەر بەرەو دواوەش رۆشتوە
و بگرە خراپتر؛ ئاخۆ هۆکارەکانی چین و بۆ کێ دەگەرێتەوە?
بێگومان وەڵامی راستی بۆ ئەمە تەنها بە توێژینەوەو
لێکۆڵینەوە دەبێ کە بێلایەنگرانە کاری بۆ بکرێت و دەرئەنجامەکەیشی گەر لەئاست چاوەروانی
و حەزو خواستی ئێمەدا نەبوو بەهەند وەربگیرێ و هەڵوەستەی جدیی لەئاستدا بکرێ..
سلێمانی؛ پایتەختی رۆشنبیرییە، بەڵام بۆتە جێی
ململانێی سیاسییەکان و پیاوانی حزب؛ لەبری زیندوراگرتن و گەشەدان بە مۆزەخانە مێژووی
و هونەری و رۆشنبیرییەکان؛ لەبری بایەخدان بە شوێن و باڵەخانەی تایبەت بە سینەما و
شانۆو هونەر و موزیک و گۆرانی هتد (کە زۆر جار بەهۆی نەبونی تەنها هۆڵێکی شیاو و
ئامێری دەنگی گونجاوەوە شەرمەزار دەبیت لەئاست خۆت و ئەوانیتردا) ؛ لەبری بەرێوەبردنی
سەدان مینبەری رۆشنبیری و واڵابونی دەرگا لەبەردەم رۆشنبیرانی تری ووڵاتانی عەرەبیی
و جیهانی؛ لەبری رەخساندنی دەیان سەکۆی ئازادی بۆ وتووێژو گفتوگۆی ئەدەبیی جدی و ئەنجامدانی
سەدان لێکۆڵینەوەی راست و هەقیقی لە لایەن زانکۆو ئەکادیمییەکانمانەوە.
ئیدی ئەمانەو چەندین هەقیقەتی تاڵی تر دەمانخاتە
بەردەم وروژاندنی چەندین پرسیار لەوانە؛ لەگەڵ بوونی وەزارەتی رۆشنبیری هەرێم، و وێرای
دەیان ناوەندو هەزاران کەسایەتی رۆشنبیری و ئەکادیمی و سیاسی کێ بەرپرسی یەکەمە لەم
دۆخەی لەبری ئەوەی لە گەشەکردن و پەرەسەندندا بێت؛ لە پاشەکشە و دواکەوتوویدا دەگوزەرێ؛
بۆیە کاتی ئەوەیە هەڵوەستەی جدیی و بێلایەنانە بگرینەبەر لەبەردەم ئەم پاشکەوتوویەی
کە جگە لە کۆچ و ئاوارەیی و بەجێهێشتنی نیشتمان و نادادپەروەریی و گەندەڵی و بێ بەهاکردنی
کەرامەتی هاوڵاتی و مرۆڤەکان و نەهێشتنی پیرۆزییەکان هیچی تری بەرهەم نەهێناوە؛ با
چیتر واز لە دروشم و قسەی باقوبریق بهێنین، و دورکەوینەوە لە موجامەلەکردن و پیرۆزکردنی
ناپیرۆزییەکان و باڵادەستکردنی بێتوانا و دژەکانی نیشتمان و؛ دەستبخەینە سەر ژەهراوییەکانی بونەتە ژەهر لەبەردەم پێشکەوتنەکاندا
و قەڵغانن لەبەردەم گێرانەوەی شکۆ و بەها مرۆییە و ئاکارییەکان و گرنگی بروانامەو
خوێندن و چەندینی تر... ئەمەش تەنها بەخۆمان ئەکرێ هەریەک لای خۆیەوە، بەو مرۆڤانە
دەکرێ کە گەندەڵی رۆنەچۆتە ژیانیان، بێ بەهابوون نەبۆتە رەفتاریان و بێ باوەری نەبۆتە
سیماو هەنگاوەکانیان.
بێگومان ئەم دۆخ و دەرئەنجامە نەخوازراوانە؛ تەنها
شاری سلێمانی نەگرتۆتەوە؛ بەڵکو هەموو هەرێم و پایتەختەکەیشی بەپلەی یەکەم..