تاران و بەغدا نیوەی کارەکە و ئەنقەرەش نیوەکەی تری تەواودەکات
6/29/2024 1:50:00 PM
داهێن هاشم
هاتنی سوپای تورکیا بۆ ناوخاکی هەرێمی کوردستان لەبست تێپەریوەو
تاقوڵایی ناوچەی بادینان هاتوە.
لەشکری تورکیا ئەمجارە بەبێ هیچ نارەزایەتیەکی نهێنی و
ئاشکرا پێشرەوی دەکات، بازگە و بنکە و بارەگای نوێ دادەنێن، ناسنامە لە هاوڵاتیان
وەردەگرن و گوندان بەگوندنشینان چۆڵ ئەکەن، رەزوباخ ئەسوتێنن و رەنگە تاڵانیش دەستپێبکەن.
چاوەرێ بوین کۆبونەوەی ئەنجومەنی وەزیرانی هەرێم گرفت و
گرێکوێرەی موچەی خەڵکی کردبێتەوە و ئیتر وەزیر و کاربەدەستەکانمان دەنگ دژی داگیرکاریە
نوێیەکە هەڵبرن، کەچی بێدەنگ بون.
لەناوچە داگیرکراوەکانی خواروی کەرکوک و سەرگەران و تد،
جوتیار و هاوڵاتی کورد خۆی بەرگری لەخاک و ناسنامەکەی دەکات ، ژنی کوردی ئازا لەوناوچانە
پەیام ئەدەن بە هێزە چەک بەدەستەکانی هەرێم
و کە تەنها شایەنی رسوابونن، هیج هێزک و هیچ حزبێک ناچێت بەدەنگ هاواری ئەم خەڵکە
بەشمەینەتەی وا سەد ساڵە خوێن لەپێناوی پاراستنی خاکەکەمان ئەدەن.
بێدەنگی و بێهەڵوێستی حزب و لایەنەکان ، بێدەنگی و بێهەڵوێستی
روناکبیر و نوخبەی سیاسی مەترسیدارە بەقەد مەترسی داگیرکاریەکە، هیچ کاتێک هەرێمی
کوردستان بەدەست بازرگانی سیاسی و زەبونەوە وەک ئێستا گیرۆدەنەبوە .
ئەم لەشکرکێشیە نوێیەیی تورکیا جگە لەئامانجە سەربازیەکەی،
ئامانجی هەرە رونی زیاتر بچوکردنەوەی هەرێمی کوردستان و تێکدانی ئەو شەرعیەتە یاساییە
کەکورد بە سەدان ساڵ دروستیکردوە ، بەدڵنیاییەوە وەک چۆن له رۆژئاوایی کوردستان هەموو
توانایی سەربازی خۆی بۆ لەباربردنی هەڵبژاردنەکان خستەکار و سەرەنجام هەڵبژاردن ئەنجام
نەدرا ، هەمان نەهج لەهەرێمی کوردستانیش دەگرنه بەر ، بەغدا وتاران نیوەی کارەکەیانکردوە
و ئەنقەرەش تەواوی دەکات.