هۆشیار زێباری: ئەگەر بڵێم قاچاخچێتی نەوت نییە، ڕاست ناکەم
01:41 - 09/02/2025
زەمەن - هەرێمی كوردستان
هۆشیار زێباری، ئەندامی مەکتەبی سیاسی پارتی دیموکراتی
کوردستان لە چاوپێکەوتنێکیدا لەگەڵ کەناڵی “عەهد” دانی نا بەوەی قاچاخچێتی نەوت لە
هەرێمی کوردستاندا هەیە و وتی: “بە هۆی سروشتی ناوچەکەوە، قاچاخچێتی نەوت هەیە لە
هەرێمی کوردستاندا، ئەگەر بڵێم نییە، ڕاست ناکەم، بەڵام بەو شێوەیە نییە کە باس دەکرێت”.
سەبارەت بە پێکهێنانی حکومەتیش هۆشیار زێباری
وتی: “لە گفتوگۆی چڕداین بۆ پێکهێنانی حکومەت، ئەو گفتوگۆیەش هەموو لایەنە براوەکانی
گرتووەتەوە”.
ڕاشیگەیاند، یەکێتیی نیشتمانیی کوردستان هاوبەشی
پارتییە لە بنیادنانی هەرێمی کوردستان و “نامانەوێت هیچ لایەنێک لە پێکهێنانی حکومەت
دووربخەینەوە”. ئەوەشی خستەڕوو کە بە پێکهێنانی حکومەت لەگەڵ یەکێتیدا دەبنە زۆرینە.
هۆشیار زێباری لە بەشێکی دیکەی قسەکانیدا باسی
لە دۆخی ناوخۆی پارتی کرد و ڕەتیکردەوە کە باڵ باڵێن هەبێت و ڕایگەیاند، “ناکۆکیمان
لەسەر سەرۆکایەتی پارتی نییە و مەسعود بارزانی مەرجەعمانە، سەرۆکایەتی هەرێم و سەرۆکایەتی
ئەنجومەنی وەزیران و سەرکردایەتی حزبی هەموویان پابەندن بە یەک ئاڕاستەوە، باڵ باڵێن
نییە، ڕکابەریی هەیە، بەڵام ناکۆکی نییە”.