لەشفرۆشخانەکانی عەبدولکەریم قاسم
12/23/2022 1:56:00 PM
کاوە شێخ عەبدوڵڵا
ساڵێک بوو عەبدولکەریم قاسم دوای ئینقلابەکەی
بوو بووە پیاوی یەکەمی عێراق، چەند سەرۆکعەشیرەت و پیاوی ناوداری عەرەب دەچنە لای
و گلەیی لێدەکەن کە بۆچی رێگەی داوە لە بەغدا لەشفرۆشخانە.. .کە ئەوان قەحبەخانەیان
پێوتووە... بکرێتەوە؟
عەبدولکەریم قاسم لە مەجلیسی پیاوە ناڕازییەکاندا
دەڵێ: ئەمڕۆ ناتوانم هیچتان پێ بڵێم، بەس سبەینێ وەرنەوە و نیوەڕۆش لای من نان بخۆن.
سبەینێ سەرۆکعەشیرەت و پیاوە خێڵەکییەکان دەچنەوە
بۆ لای قاسم و لەوێش نان دەخۆن. پێشتر عەبدولکەریم قاسم کاربەدەستانی کۆشکی کۆماریی
ڕائەسپێرێ کە دەرگای هەموو ئاودەستەکانی ناو کۆشک دابخەن.. نزیکی پێنج ئاودەست
بوون.
قاسم سفرەیەکی زۆر عەرەبییانە کە پڕیەتی لە: بەرخی
سورۆکراو و سینی سەرڕێژ لە برنج و نانی زۆری ڕازاندووەتەوە بۆ میوانەکانی کەدژی لەشفرۆشخانەکانی
ناو بەغدان و دەیانەوێ قاسم رازی بکەن تا دایان بخات.
میوانە خێڵەکییەکان لە برنج و گۆشتی بەرخ زۆر دەخۆن،
قاسم پێیان دەڵێ نوێژەکانتان بکەن و دواتر
قسەوباسی خۆمان دەکەین. کاتێ پیاوەکان دەیانەوێ بچنە تاراتگرتن، تەماشا ئەکەن دەرگای
ئاودەستەکان هەموو کڵۆم دراون. زۆربەشیان تەنگاون و ناچار خۆیان دەکەن بەناو باخەکەی
کۆشکی کۆمارییا و هەریەکەیان لە بن دارخورمایەک خۆی خاڵی دەکاتەوە!
دوای گەڕانەوەی پیاوەکان بۆ دیوەخانی سەرۆک،
قاسم ڕوویان تێدەکات و دەڵێ: بەڕێزان... دوێنێ باستانکرد کە دژی هەبوونی لەشفرۆشخانەن
و نابێ ڕێگە بدەین هەبن. منیش وەکو ئێوە دژی ئەو شتانەم و خوازیارم نەمێنێ. بەڵام
بەڕێزان ئێوە ئەمڕۆ میوانی کۆشکی کۆماریی
بوون و بینیتان دەرگای پێنج ئاودەستەکەی کۆشک داخراون. دەشزانم بەناچاری چوونە ناو
باخەکەی کۆشک و هەریەکەتان ڕییاون بە بنەخورمایەکدا. بەڵام ئەگەر ئاودەستەکانی کۆشک
دانەخرایەن، ئەوا بەئیسراحەت دەچوونە ئاودەستەکان و ناوباخەکەشتان گوواوی نەدەکرد!
قاسم بەردەوام دەبێ: ئێمە دەوڵەتداریی دەکەین،
دەبێ ئاگامان لە قەحبە و بەرەڵڵاکانیشبێ. ئەگەر بێتو هەموو لەشفرۆشخانەکانیان لێدابخەین،
ئەوکاتە ئێوە چۆن بەهۆی داخستنی دەرگای ئاودەستەکانەوە چوونە ناو باخەکەی کۆشک و پیستانکرد،
لەشفرۆشەکانیش ئاوا بەناو شاردا بڵاودەبنەوەو ئەوکاتە هەر گەڕەکێکی ئێوە لەشفرۆشێکی
تێ دێت و دەوڵەتیش ناتوانێ چاودێرییان بکات، ئەو کاتە شتەکە خراپتر دەبێ و لە دەست
ئێمەیش دەردەچێ!
جوابەکەی قاسم و سینارێوی داخستنی ئاودەستەکان،
کارێکی زۆر ژیرانەبوو. ئەگەر دەرگای ئاودەستەکان دابخرێن، بێگومان خەڵک بندیوار و
بنەدارەکان پڕدەکەن لەگوو.
دەوڵەت و دەوڵەتداریی ئەرکیان زۆر گەورەترە لەوەی
خەڵک یان گروپ و عەشیرەت بیری لێدەکەنەوە. لە کتێبی "ئۆقیانووسێک لەتاوان" کە خاتوو خەندان جەزا ئامادەی کردووە، ژنێکی سەرۆکباندی
لەشفرۆشەکان دەڵێ: ئەو شار و وڵاتەی دەوترێ لەشفرۆشی تیا نییە، لەسەر خەریتەی ئەم
دنیایەدا نییە!
لەشفرۆشیی پیشەیەکی تازە نییە و بەهەموو دەوڵەت
و هێزەکانی دنیا بنەبڕ ناکرێ. بەڵام هەر دەوڵەتە و بەشێوازی خۆی رێکیخستووە. شتەکە
بەهەڵمەتی چەکدار حەل ناکرێ. دەوڵەت کە وەکو عەبدولکەریم قاسم وتوویەتی دەبێ ئاگای
لە لەشفرۆشەکانیشی بێت، هەر حکومەت و دەوڵەتی نەجیبزادەو خانەدان و ئینسانە بلیمەتەکان
نییە. هی ئەوانەیشە کە لادەر و ئیشقۆڕ و لەشفرۆشەکانیشن.
کوردستانیش وڵاتێکی پاک و بێگەرد نییە لەڕووی لەشفرۆشییەوە.
سەدان و هەزاران لەشفرۆش و لەشکڕ هەن کە لە هیچ بارودۆخێکا دەستبەرداری کڕین و فرۆشتنی
سێکس نابن. ئەم شتە دەبێ رێک بخرێ بەو میکانیزمانەی دەوڵەت دەبێ بیانگرێتەبەر نەک
بە پێشنیازی شەخسێک و ڕەتکردنەوەی خەڵکانی ترەوە.
بۆ خۆم زۆر زۆر دژی لەشکڕینم، لەدڵەوە بەزەییم
بەو ژنانەدا دێتەوە بۆ پارە ناچارن بچنە باوەشی هەموو جۆرە پیاوێکەوە ئیتر ئەو پیاوە
رەنگە پیاوێکی پۆخڵ و بێزراوبێ. بەڵام ئەم شتە نەوەستاوە بە بۆچوونی من یان هی تۆ
و ئەوانی ترەوە. بەڵکو دیاردەیەکی گەردوونییەو دەبێ دەسەڵاتدار و ئینسان عاقڵەکان
ریکی بخەن.
ئەگەر ئەمڕۆ دەرگای لەشفرۆشخانەکان کڵۆم بدرێ،
بەدڵنیاییەوە مانگی داهاتوو لەشفرۆش و لەشکڕەکان بەناو کۆڵانەکانی شاردا بڵاودەبنەوە.
چونکە بڕیار نییە لەشفرۆشەکان هەموو ئیعدام
بکرێن، کە ئیعدامیش نەکرێن دەچنەوە سەر پیشەکەی خۆیان بۆیە دیسان پەناوشوێنی تر پەیدا
دەکەنەوە بۆ خۆیان.