گێڕانەوەی کۆڕەو
4/2/2025 3:50:00 PM
ستران عەبدوڵا
کە کۆڕەومان کرد سەدان سەدان هەزار کەس بووین ، کە وەک یەک نەتەوە دابڕانمان لەگەڵ رابردووی ژێردەستەیی کرد،
کورد بووین و بە خاس و عامەوە، بە خاس و خراپەوە دامانە ئەو کێوانە، دوو بەشی کوردستانمان بڕی و خۆمان لەبەردەم تەنافی جیهان هەڵخست و گوتمان لە هەموو تەڕوتوشی زەمانی ژێردەستی بەعسی داگیرکەر وشکمان بکەنەوەو هەڵمان تەکێنن.
شەرق و غەربی گەردونی بچووک و گەورە سەیری ئێمەیان دەکرد لە وەختێکدا ئەندێشەی گشتییان سەرقاڵی تاریفێکی تازەی خۆیان و دونیای دوای دووجەمسەری بوون. ئێمە لەسەر تخوبی رەسمی دەوڵەتی عیراقی فاشست بووین و دونیاش لەسەر سنووری سیستمی نوێی جیهانی بوون و وەعد و بەڵێنی تازە باویان تاقیدەکردەوە و مژدەی نەدیتراو و نەبینراویان دەدا و دەرفەتی ئەوان بوو ئەو مژدانە بەسەر ئێمە ئەزموون بکەن . وەک سەرتاشی گەرەکە فەقیرەکان بەسەر سەری کوڕی فەقیردا فێری سەرتاشین دەبوون پێش ئەوەی بیگوازنەوە بۆ بازاڕی حەریف و خواپێداو . دونیای دوای کەوتنی ئۆردوی شەرقی بوو کە ئیتر کۆمەڵێک درۆ و دەلەسە کەشف بوون کە قیمەتی فلسێکی قەڵبیان نەهێنا. مشتێ رێ و رێباز و دروشم بووچ و ئاشکرا بوون و کاتی دەویست دونیا هی تازە بڵێ و لێیان تێبگات و تاقی بکاتەوە. جارێ هەر لەرێوە عروبە و نەتەوەی عەرەب و بەزمی فەڵەستین بە زامداری کەوتنە بەردەم گێژاوی بێ بنەوە و داگیرکردنی کوێتی گشتی ڕاماڵی. دونیای سۆشیالیزمیش دەرگای دۆزەخی ناوەخۆی بەرهەڵدا کردبوو و سەدان میللەتی تووشی نائومێدی کرد ، یان لە خەوی غەفڵەتی یەکسانی و دادپەروەری بێدار کردەوە. گشتیانی خستە سەر پلێت . ئەمەریکا و دۆستە لیبڕاڵە بێ رەحمەکانیشی هێشتا لە هێدمەی کەوتنی باوەڕە گەورەکان بوون کە رکابەرێکی سەرسەختی نەمری سەرمایەداری بوون کەچی چەند بە ئاسانی دونیایان کەوتە بەردەست وەک ئەوەی سەحرای جنوبی عیراق کەوتە ژێر زنجیری دەبابەی هاوپەیمانەکانەوە، هێشتا دونیای رۆژئاوا ناوی ئەم سەرکەوتنە ئاسانەی خۆی حەڵاڵ نەکردبوو کە کەوتە بەردەم پێویستی ناونانی ئەوەی لە عیراق قەوما. داخۆ ئەم دیاردەی کۆڕەوە چییە وا یەخەی گرتوون؟ میللەتێک بە هەموو نازناو و ناوەڕۆکییەوە لەدەست حکومەتەکەی هەڵدێ و حکومەتێکیش داوەشاوە بەدەست فەرمانڕەواییەکی بێباک و بێ نامووسەوە کە خەمی هیچی نییە. کۆڕەو بەبەرچاوی دونیاوە میدیای گلۆباڵی بەسەر میللەتی فەقیرەوە پیادەکرد، ئاخر کۆچی ئەمجارەی کوردەکان یەکەم کۆچ نەبوو خۆ ئیتر، بەڵام یەکەم کۆچی پەخشی راستەوخۆ بوو بۆ هەموو دونیا . شتێک بوو وەک ئەوەی دونیا دوایی زانی تومەز ئۆباما یەکەم سەرۆکی رەش ئەسمەری ئەمەریکا نەبوو، بەڵام یەکەم سەرۆکی رەش ئەسمەر بوو کە میدیا بە رەنگاورەنگ رێورەسمی دەستبەکاربوونی پەخشکرد و گێڕایەوە،
میدیایە و ئیتر بە گوێرەی گرتەی خۆی وێستگە دادەنێت، کۆڕەوی کوردی کوردستان تازە نەبوو، بەڵام پەخشی راستەوخۆی کۆڕەو تازە و جدید بوو. هەڵاوی لێ هەڵدەستا. دونیا لە ریزبەندییەکی سەیردا بوو، مرۆڤدۆستەکان ئیتر بوونە سیستمی لیبڕاڵەکان و دیکتاتۆر و داوەشاوەکان ئەوانە بوون کە جاران ئەدەبیاتی سیاسی پێی دەگوتن دۆستی گەلانی بندەست .دەی ئەو ئۆردوگایە دەمێک بوو دۆستی نەمابوو ، بەڵام میدیا روخانی بەرلینی گواستەوە. ئیتر ئەوە دەرکەوت کە دوایی فیلمی (ماڵئاوا لینین) بە کۆمیدیا دیوە راستەقینەکەی گواستەوە و پێی گوتین دونیای ئۆردوگای سۆڤێتی ناشوکری نەبێت دونیای ژێردەستی و دیلی و لاتییە.
کوردەکان لە پەخشی راستەوخۆدا رەویان دەکرد و کەناڵی سی ئێن ئێن کە دیاری مێردەکەی خانمی ئەکتەر جین فۆندا بوو پەخش و پەرێشانی دەکرد .دونیای دۆستانی تازە رەخنەیان هەبوو کە بۆچی کورد بەشێکیان لەسەر سنوور و بەشێکیان لە پایتەختی عیراق دانووستاندن دەکەن، لەکاتێکدا ئەگەر دانووستاندن نەبوایە رێگا بۆ سیاسەت نەدەکرایەوە، وەک چۆن ئەگەر ناوچەی ئارام نەبوایە ئەم میللەتە ئارامی بەخۆیەوە نەدەبینی. نموونەی ئەمە دواتر بینرا کە خەنجەری تیژی هەندێک دەڵێن داخۆ حەمەدۆکەکان بۆ ئاشتی دەکەن و خەنجەر بۆ سنگی دوژمن تیژ ناکەن؟!
ئێ خۆدیارە ئەگەر کورد زۆر لەسەر سنوور بمابان ئێستا لە دەست دەرچووبون و وێڵ و سەرگەردان بوون .ئەگەر کورد لە کۆڕەو نەهاتایەوە ئێستا کورد لە کەرکوک نەمابوو تا ئیدیعای خاوەندارێتی شارەکە بکات.
کۆڕەو هات بۆ ئەوەی نابێت بەرامبەر دیکتاتۆری سەددام، چونکە راپەڕین بە تەنها نەیتوانی دیواری بەرلینی بەعس بروخێنێ.
ئەمە بەشێکی چیرۆکەکەیە و هی تریش زۆرن.