وڵاتە شێواوەکە بەبێ سەرۆک
4/9/2019 9:08:00 AM
کاوە شێخ عەبدوڵڵا
عێراقییەکان قسەیەکی باویان هەیە دەڵێن: لە ساڵانی حەفتادا شەیداو تامەزرۆی سەدام بووین، لە هەشتاکاندا ئازارەکەیمان چەشت، لە نەوەدەکاندا باجەکەیمان دا.
ئەمڕۆ ٩ی نیسان، شانزە ساڵە سەدام بەخۆی و رژێمەکەیەوە ئاوی ئاموون‌و تونی بابا چوون، بەڵام هێشتا عێراقییەکان باجەکەی دەدەن نەک وەکو قسە باوەکەیان کە دەڵێ لە نەوەدەکاندا باجەکەیماندا.
رۆژانێک بوو سەدام خۆی بە پاسەوانی ئارامیی و ئاسایش بۆ عێراق و فریادڕەسی نەزانیی و گەوجێتی عەرەب دادەنا. رۆژانێک بوو ئەو پیاوە وای دانابوو مان و نەمانی عێراق بەندە بە مان و نەمانی خۆیەوە. ئەمە رێک ئەو کاتانەبوو کە عێراقییەکان ئازارەکەیان دەچەشت.
هەر سەدام نا، بەڵکو هەموو دیکتاتۆر یان سەرکردە تەبیعەت دیکتاتۆرەکان وا بیر دەکەنەوە کە ئەمان ئاسمانیان راگرتووەو ناهێڵن بکەوێ بەسەر گەل دا! بۆ ئەوەی بمێننەوە لەسەر کورسی دەسەڵات سڵ ناکەنەوە لە سەرکوت و داپڵۆسین.
نەک هەر ئەوە، بەڵکو مانەوەیان دەبێ بەوپەڕی شکۆوە پیرۆز بکرێ. بۆ ئەمەش تەواوی دامەزراوەکانی دەوڵەت دەخرێنە خزمەتی بە پیرۆزکردنی سەرۆکەوە. عێراقییەکان بە گیانی ملیۆنان کەس باجی زۆریاندا لەپێناو پیرۆزکردنی سەرۆکدا.
ئێستا ئیتر درۆی پیرۆزبوونی سەرۆک پووچەڵ بوویەوە، نە ئاسمان کەوتە خوارەوەو نە ئۆکسجین لە وڵاتدا بڕا. عێراقییەکان لە دوای سەدام بەڵا و ئافاتی زۆریان بەسەردا هات، باجی ئەم ئافاتەنە گیانی سەدان هەزار ئینسانی تر بوون. بەڵام ئەمانە هی ئەوە نەبوون سەرۆک لێرە نییە، بەڵکو هێشتا باجی تامەزرۆی حەفتاکانە.
ناحەقی هیچ عیراقییەک ناگیرێ کە دوای شانزە ساڵ لە بارودۆخی دوای سەدام رازیی نییە، چونکە هیچ گەلێک نییە لەم دەوروبەرەدا هێندەی عێراقییەکان شەکەت بن. شەکەتن لە خوێندان، شەکەتن لە ستەمکار، شەکەتن لە نەبوونی ئاسۆیەکی روون. بەڵام هێشتا وادیارە شەکەت نەبوون لە پیرۆزکردنی وردە دیکتاتۆری تازە هەڵتۆقیودا.
سەدام بەرهەمی شەیدابوونی خەڵک بوو نەک لە ئاسمانەوە کەوتبێتە خوارەوە، عێراقییەکان چوار نەوەیە باجی بیرکردنەوەی ئەوانە دەدەن شەیدای سەدام بوون لە حەفتاکاندا. بۆیە دەبینی هێشتا دوای شانزە ساڵ لە نغرۆبوونی ئەو سەرۆکە و رژێمەکەی، هێشتا جۆگەلەی خوێنی عێراقییەکان وشکایی نەهاتووە.
گەلی هۆشیار ئەوەیە شەیدای سەرکردە و سەرۆک نابێ، نابێ هیچ میللەتێک چاوپۆشی لە ستەمکار بکات ئەگەر هاتوو ستەمکار ناوی سەدام بوو یان عومەر، کوردبوو یان عەرەب.
ستەمکار یەک خوێنی هەیە، یەک دڵ و یەک تموحی هەیە، بەڵام هەزار جەستەی هەیە و هەریەکەیان لە جێگایەکن. من چاوپۆشێ لە ستەمکارێکی کورد بکەم و تۆ لە عەرەبێک، ئەوا هەمیشە سەدام و سەدامەکانی تر لە منداڵدانی وڵاتدا ئامادەن و درەنگ یان زوو وڵات دەگۆڕن بە جەهەنمی هاووڵاتی و بەهەشتی ستەمکاران.
ئەگەر چاوپۆشی لە ستەمکارێک بکەین ناوی عومەر بوو، ئەوکاتە هەردەبێ وەکو عێراقییەکان تامەزرۆبین تا ئازارەکەی دەچێژین و تا باجەکەیشی دەدەین!