فەریق جەمال ئیمینکی: تاكۆتایی 2025 دەبێت هەموو پێشمەرگە یەكخرابێت
11:43 - 22/12/2024
زەمەن – هەرێمی کوردستان
سوپاسالاری پێشووی
وەزارەتی پێشمەرگە دەڵێت: پێویستە تاكۆتایی 2025 هەموو پێشمەرگە یەكخرابێت.
فەریق جەمال ئیمینکی
لە لێدوانێکدا بۆ میدیای حزبەکەی ئاماژەی بەوە کردووە، پرۆسەی یەکخستنی ھێزی پێشمەرگە
بە ھاوکاریی ھاوپەیمانان زۆر باش بەڕێوەدەچێت و ئەوانیش گەیشتوونەتە ئەو باوەڕەی
حکوومەتی ھەرێم لە یەکخستن و چاکسازی لە وەزارەتی پێشمەرگە جدییە و بەرنامە ھەیە
تا کۆتایی ساڵی داھاتوو ھەرێمی کوردستان یەک ھێزی پێشمەرگەی ھەبێت.
دەشڵێت: ماوەیەکی
زۆرە ھاوپەیمانان لەسەر ھێڵن بۆ پشتگیریکردن لە ھێزی پێشمەرگە و ئەو چاکسازییانەی
ئەنجام دەدرێن، ھاوکات ماوەیەکی زۆرە ھێزی پێشمەرگە سەرقاڵی چاکسازییە و ھاوکاری و
پاڵپشتیی ھاوپەیمانانیش زۆر گرنگە بۆ یەکخستنی ھێزی پێشمەرگە.
ناوبراو دووپاتی
دەکاتەوە کە بەرنامە دانراوە تا کۆتایی ساڵی داھاتوو ھەموو ھێزەکانی پێشمەرگە یەک
بخرێن، کە ھەرێمی کوردستان دەبێتە خاوەنی یەک حکوومەت و یەک پەرلەمان و یەک ھێزی پێشمەرگە.
هەروەها
ڕوونیکردەوە، ھاوپەیمانان بۆ ھێزی پێشمەرگە بەرنامەیان ھەیە و جێبەجێکردنی بەرنامەکەشیان
زۆر باش بەڕێوەدەچێت و کاری لەسەر دەکرێت، ئەوان باوەڕیان بۆ دروست بووە، کە حکوومەتی
ھەرێمی کوردستان سوورە لەسەر ئەنجامدانی چاکسازی و یەکخستنی ھێزی پێشمەرگە، بۆیە بەرنامەکە
تاوەکو کۆتایی ساڵی ٢٠٢٥ دانراوە، تا ھەموو ھێزەکان یەک بخرێن.