نێچیرڤان بارزانی یەک ملیار دینار دەبەخشێت بە زیانلێکەوتوەکانی هەولێر
10:55 - 17/12/2021
زه‌مه‌ن_هه‌ولێر
نێچیرڤان بارزانی، سەرۆکی هەرێمی کوردستان لە رێگەی دەزگای روانگەوە هاوکاریی
زیانلێکەوتووانی لافاوەکەی رۆژی هەینیی هەولێر دەکات کە بەهۆیەوە زیانێکی زۆری گیانی
و دارایی کەوتەوە.
دەزگای روانگە لە راگەیه‌ندراوێکدا ئاماژەی بەوە کردووە، "هاوکارییەکان
لەلایەن سەرۆکی هەرێمی کوردستانەوە دابینکراوە و لە رێگەی دەزگای روانگە دابەشدەکرێت،
هەروەها بە هاوئاهەنگی لەگەڵ پارێزگای هەولێر و دەزگای خێرخوازیی بارزانی دەبێت."
وەکو لە راگەیه‌ندراوی روانگەدا هاتووە، هاوکارییەکە بریتییە لە تەرخانکردنی
بڕی یەک ملیار دیناری عێراقی کە ئەو بڕە پارەیە تایبەت دەکرێت بۆ ئەم پێداویستییانە:
- تەرخانکردنی بۆ
کەلوپەل و پێداویستیی ناوماڵ
- دابینکردنی خۆراک
- هاوکاریکردنی
خێزانە زیانبەرکەوتووەکان لە پاککردنەوە و رێکخستنەوەی خانوو، باڵەخانەکان.
هاوکارییەکان لە بەرەبەیانی 18-12-2021 دەستپێدەکات و تاوەکو جێگیربوونەوەی
ماڵباتە زیانبەرکەوتووەکان بەردەوام دەبن.