بەپەلە.. گومان دەکرێت فەرماندەى سوپاى پاسدارانى ئێران کوژرابێت
09:07 - 07/10/2024
زەمەن - جیهانى
رۆژى 27ى ئەیلول ئیسرائیل هێرشى کردەسەر باشورى لوبنان و لەئەنجامدا دەیان فەرماندەى باڵاى حزبوڵاى لوبنانى و حەسەن نەسروڵا کەسى یەکەمى حزبوڵا کوژران.
لەو رۆژەوە تائێستا، ئیسماعیل قائانى، فەرماندەى فەیلەقى قودسى سوپاى پاسدارانى ئێران بێسەروشوێنە و کەس نازانێت لە کوێیە، بەشێک لە بەرپرسانى ئێران دەڵێن، قائانى لەگەڵ حەسەن نەسروڵا و هاوەڵەکانى نەبووە، بەڵام دواى ئەوەى جارێکیتر لەم رۆژانەدا ئیسرائیل باشوورى لوبنانى بۆردوومان کردەوە، بەرپرسانى ئێران رایانگەیاند، قائانى لەو شوێنە بووە کە دووەمجار ئیسرائیل هێرشى کردووەتەسەر و بە سوکى بریندار بووە.
کەمێک پێش ئێستا، ماڵپەرى تایمز ئۆف ئیسرائیل رایگەیاند، لە چەند سەرچاوەیەکى سەربازى باڵاوە زانیارییان دەستکەوتووە کە ئیسماعیل قائانى فەرماندەى سوپاى پاسداران لەگەڵ حەسەن نەسروڵا بووە و کوژراوە، فەرماندەکانى ئیسرائیلیش رایانگەیاندووە، مەبەستى ئەوان لە هێرشەکە بۆ کوشتنى قائانى نەبووە بەڵکو بۆ حەسەن نەسروڵا و سەرکردەکانى حزبوڵا بووە.