نرخى گۆشتى سوور هەرزاندەبێت
06:28 - 03/12/2024
زەمەن - کوردستانى
بەڕێوەبەرى سامانى ئاژەڵ لە سلێمانى دەڵێت، نرخە ئاژەڵى زیندوو کەمێک دابەزیوە و بەهۆى دواکەوتنى مووچەشەوە فرۆشتنى گۆشتى سوور دابەزیوە، بۆیە پێداچوونەوە و رێکخستنە نرخ بۆ ئەم قۆناغە دەکەن و نرخى گۆشتى سوور دادەبەزێنن.
جەمال حوسێن، بەڕێوەبەری سامانی ئاژەڵ لە سلێمانی راشیگەیاندووە، پێشتر نرخی بەرخ بە زیندە قەپان، كیلۆی تاوەكو 11هەزار دیناریش رۆیشتبوو، بەڵام ئێستا 8 هەزار‌و 500 دینارە، هەرچەندە نرخی ئەو جۆرە گۆشتە لە 24 هەزار دینارەوە بۆ 22 هەزار دینار دابەزیوە، بەڵام پێداچوونەوە و رێكخستنی نرخ بۆ ئەم قۆناخە پێویستە.
ئەوەشى راگەیاندووە، بەهۆى دواکەوتنى مووچەوە فرۆشتنى گۆشتى سوور لە سلێمانى 35% کەمیکردووە، هەروەها پێویستى ناوخۆیى گۆشتى سوور لە شارەکە 90 تۆنە و نیوەى گۆشتەکە لە سامانى ئاژەڵى ناوخۆ دابیندەکرێت، بەڵام هێشتا ئەو هۆکارانە نەبوونەتە هۆى دابەزینى نرخەکەى، بۆیە پێویستە رێکخستنەوەى بۆبکەن و نرخێکى گونجاوى بۆ دابنێن.
.