لە سێبەری کۆرۆنادا: زوڵم لە مەلا کرێکار!
عن ابي ذر، قال: امرني خليلي ص .. ان أقول بالحق وإن كان مراً..
ئەبی زەڕ وتویەتی؛ خۆشەویستەکەم، 'پیغەمبەر ص' فەرمانی پێکردوم .. ھەمیشە حەق بڵێم ئەگەر تاڵیش بێت..
***
لە پێشەوە:
یەکەم: مەلا کرێکار ئیسلامییە و ئایدیۆلۆجیستە: من موسڵمانم و دژی ئایدیۆلۆجیام. چونکە لە دیدی منەوە ئاین مانیفێستی حەقە و ئایدیۆلۆجیا بیروڕایە و ھەندێكجاریش گومڕاکەر و وێرانکەرە. ئاین شارستانێتی بینا دەکات و رۆحی شارستانێتییە، بەڵام ئایدیۆلۆجیا شارستانێتی خاپور دەکات.
دوەم: مەلا کرێکار بانگەواز بۆ دامەزراندنی دەوڵەتی ئیسلامی ئایدیۆلۆجی دەکات. بەڵام من دژی دامەزراندنی دەوڵەتی ئایدیۆلۆجیم. من بانگەواز بۆ دامەزراندنی دەوڵەتی مەدەنی دەکەم کە لەسەر بنەمای ھاوڵاتی بەڕێوەدەچێت و ئاین، لە دەوڵەتی نائایدیۆلۆجیدا، رۆڵی رۆحی دەوڵەت و کۆمەڵگا دەگێڕێت.
سێھەم: لە دوای راپەڕینی (ئازاری ١٩٩١) ەوە، مەلا کرێکار بە قوڵی بەشێك بوە لە ململانێ نامەدەنیەکانی کوردستانی عێراق، کە دەبێت ھەمیشە لە یادمان بێت، پارتی و یەکێتی ھۆکاری سەرەکی ململانێکان بون و خەڵکیتریان تێوەگلاندوە. بەڵام ئێمە و ھاوڕێكانمان، ھەمیشە بەشێك بوین لە خەباتی مەدەنی و بانگەوازمان بۆ چەسپاندنی ئاشتی و مافە گەردونیەکانی مرۆڤ کردوە.
چوارەم: زۆر جار و لە زۆر بۆنەدا، مەلاکرێکار، بانگەوازی بۆ توندڕەوی ئایینی کردوە و ھەندێکجاریش ھاوسۆزی بۆ جوڵانەوە ئیرھابیە ترسناکەکان نیشانداوە. بەڵام ئێمە ھەمیشە دژی ئیرھاب و توندڕەوی ئایینی بوین و پێمانوابوە توندڕەوی (الغلو) ئایین و شارستانێتی و گەلان وێران دەکات و دایاندەڕزێنێ و لەناویان دەبات.
بەڵام:
یەکەم: مەلا کرێکار کوردە و ھاوڵاتی کوردستانی عێراقە. وەك ھاوڵاتیەك، مەلا کرێکار دەبێت لە مافە گەردونییەکانی مرۆڤ بەھرەمەند بێت و مافە مەدەنی و یاساییەکانی بۆ دەستەبەر بکرێت. ئەرکی ئێمەشە بەرگری لەو مافانە بکەین.
دوەم: بۆ حکومەتی ھەرێم و (ھەڵبەت بۆ حکومەتی عێراقیش) شەرمەزارییە کە، وەك ھاوڵاتی ئێمە، مەلا کرێکار لە نێوان وڵاتانی خۆرئاوا بێڕەچاوکردنی بنەما گەردونیەکانی مافی مرۆڤ و مافە یاساییە بنەڕەتی و سەرەتاییەکان، بیھێنن و بیبەن، بەڵام حکومەتی ھەرێم نقەی لێوە نەیات.
سێھەم: ئەگەر حکومەتی ھەرێم لە خەمی شکۆ و کەرامەتی ھاوڵاتیەکانێتی، دەبێت بەدوای کەیزی مەلاکرێکاردا بڕوات و داوا بکات و بیگێڕێتەوە بۆ ھەرێم. ھەڵبەت لە ھەرێم ئەگەر داوای یاسایی لەسەرە، دادپەروەرانە و دور لە دەستێوەردانی حیزبی و شەخسی، دادگایی بکرێت. دادگاییەك کە سیاقی روداوەکانی کوردستانی عێراق لەبەرچاو بگرێت و ئینتیقائی ھەڵسوکەوت لەگەڵ کەیزی مەلا کرێکار نەکات.
چوارەم: من وەك ھاوڵاتیەكی ئەم کوردستانە و بەرپرس و خەمخۆرێکی ئەم نیشتیمان و ئەم گەلە کە شکۆ و کەرامەتی ھاوڵاتیانم بە بێڕەچاوکردنی بیروڕا و شێوازی بیرکردنەوە بەلاوە گرنگە، بە کەیزی مەلا کرێکار خەمبارم. ھەڵبەت کار و کاردانەوە ناجۆرەکانی مەلا کرێکار دەبینم. بەڵام پێموایە دەسەڵاتێکی دادپەروەر نەك ھەر دەتوانێت مەلا کرێکار ئیستیعاب بکات، بەڵکو دەتوانێت، بۆ رێکخستنەوەی کۆمەڵگاو بنیاتنانی ئاشتی کۆمەڵایەتی، کەڵك لە مەلا کرێکار وەربگرێت.