لە کەپکی حەمەد ئاغاوە بۆ دادگای فیدرالی
6/12/2023 4:06:00 PM
مەلا فەرمان محەمەد
لە تەمەنی هەفتا ساڵی حیزب و سەرانی حیزب لە
باشوری وڵات، ئەو کەلتورە سیاسیەی لەسەر بناغەیەکی فشۆڵ دانرا، زۆر گۆڕانکاری بەسەردا
هاتوە، موخابن ئەم گۆڕانکاریانە بە ئاقارای خراپدا بردراوە، بەشێ لەم کەلتورە خراپە
دەقی گرتوە و بوە بە باو و زاڵە. هێند زاڵە لوتکە و پەنا و پەسێری شاخ و دۆڵی نیشتمان
و هزری تاکی کوردیان ناشرین کردوە. ناشرینیەکان، کاتێ دەچیتە سەیرانگاکانی وڵآت یان
تاکێکی حیزبی دەدوێنێ لە وێدا دەردەکەون، روداوەکان خۆیان تێکەڵ بە چیرۆکی خۆشویستی
دەکەن و شەڕ و نەبەردەکانیش ناشرین دەکەن.
شەڕی ناوخۆ دزێوترین ئەو روداوانەن کە سروشت و
رەوشتی کوردستانیان شێواندوە، شێواویەک کە هەمو کەسێکی ئاسایی دەیبێنێ و هۆکار و
بکەرەکانیش دەناسێتەوە. کەچی لە ژێر کاریگەری ئەو کەلتورە سەقەتەی حیزب و بنەماڵە
بکەرەکان باس لە ئەستۆپاکی و بێبەریبونی خۆیان دەکەن، منی هیچ بەدەست تۆمەتبار دەکەن.
زۆریشن ئەوانەی چەپڵەیان بۆ لێدەدەن و بڕوایان پێدەکەن.
کردن و بەکارهینانی کارەساتە دڵتزینەکانی وەک ئەنفال
و هەڵەبجە و قەڵآدزە و هەمو ئەوانی تر لەو دیوی سنور بە کاڵای سواڵکردن و بازارگانی،
لە ناوخۆشدا بۆ جوڵاندنی سۆزی نیشتمانی. ناشرینیەکی تری ئەم کەلتورەیە.
لە کەلتورە باوەکانی تری حیزب و بنەماڵە: دوبەرەکی
سیاسی و سەربازی، رق و عینادی سیاسی، ناپاکی، گوێ لەمشتی بێگانە، دوڕویی سیاسی و
ئایینی، گەوجاند و هەڵخەڵەتاندن، بازرگانی و خۆدەوڵەمەندکردن، هاندان و چەکدارکردنی
کەسانی نەفس نزم، بێڕێزیکردن بە پارچەکانی تری کوردستان و هەڕەشەی گەورەی ماڵوێرانکەر،
بێڕێزی بە زانست و پەروەردە و یەکتر تەخوینکردن. ئەمانە و چەندینی تر هۆکاری لاوازی
هەرێمی کوردستانن و دروستکردنی مەترسیە بۆسەر ئەو هەرێمەی هەمو کورد دڵێ پێخۆشە و
چاوی پێدەگەشێتەوە.
دەرهاوێشتەی ئەم کەلتورە ناشرینە بە رونی لە
لاوازی ئەم دەسەڵاتە دەرکەوت، ئەویش بە پەنابردنە بەر دادگای فیدرالی بۆ چارەسەری
کێشەکان. ئەم پەنابردنە دەریخست کە:
١- ئەم
دەسەڵاتە کورتبینە لە ٣٠ ساڵی رابردودا نەیتوانی دادگایەکی هاوشێوە لە هەولێر دابمەزرێنێ بۆ
چارەسەرکردنی کێشەکانی نێوان خودی خۆیان.
٢- ئەم
دەسەڵآتە چەند لاوازە لە بەر کزە بایەک خۆی بۆ ناگیرێ و خۆی بەدەستەوە دەدات. دوێنی
کەرکوک و ئەمڕۆش ئەم خۆ بەدەستەوەدانە دەریخست پاڵەوانن لە کەپکی حەمەد ئاغا و بێنەمودن
لە شوێنەکانی تر.
٣-خۆتەخوینکردن
کەلتورە هەرە باوەکەی ئەم دەسەڵاتەیە، دوای ٧٠ ساڵ کار لەسەرکردن ئێستا رەگی داکوتاوە و گەیشتۆتە لوتکە، لەزاری بەرزترین
دەسەڵاتی حیزبی و بنەماڵەوە کوردستان گوێبیستی دەبێ.
٤-چرپاندیە
گوێی هاوڵاتیانی کوردستان ، کە "" ئەم دەسەڵآتە سەرەخۆەرەیە و پیاوی ئەم
قۆناغە نیە"" . بەندەش دەڵێ کاتی گۆڕینی هاتوە.
٥-لە
نەبونی دادگای هەولێر، چەکوشەکەی دادگای فیدرالی لە بەغدا جێگای دەستخۆشی و پێزانینە،
چونکە جێی سەنگەرە خوێناویەکانی کەپکی حەمەد ئاغا و دێگەڵەی گرتەوە. پایەداربێت
کاتێ دادپەروەرانە بڕیارەکانی بدات.
بەڵام دەبێ بزانێ دەتوانێ چەکوش بەسەری هەمواندا
بکێشێ بەڵام قەوارەی هەرێم و ناوچە کوردستانیەکانی دەرەوەی هەرێم نا.