هەڕەشەی بڵاوکردنەوەی ڤیدیۆی قێزەون .. پارێزگار دانی بەوەداناوە بەشێوەی پچڕ پچڕ هاوسەرگیری کاتی" چێژبەخش"ـی کردووە
10:46 - 18/09/2024
زەمەن - عێراقی
میدیا عێراقیەكان بڵاویانكردەوە كە تۆڕێکی دەستدرێژیکاری ئەلیکترۆنی هەڕەشە
لە بەرپرسانی سنووری پارێزگای زیقار دەکەن و هەڕەشەی بڵاوکردنەوەی ڤیدیۆی قێزەونیان
لێ دەکەن.
لە پارێزگای
زیقار تۆڕەکانی دەستدرێژی ئەلیکترۆنی لە تۆڕە کۆمەڵایەتیییەکان دەبنە هەڕەشە لە بەرپرسانی
حكومی و بەهای دەستکەوتی هەڕەشەکانیش زیاتر
لە یەک ترلیۆن دینارە ، لەسەر ئەم پرسە چەند بەرپرسێک کە تیوەگلاون دەستگیرکراون و
نێوەندگیرییەکانیش بۆ چارەسەرکردنی ئەم دۆسیەیە لە بەغدا بەردەوامن
لەو سەروبەندەدا
دیارترین پێشهات بنەما لەسەر سکاڵایەکی
مورتەزا ئیبراهیمی پارێزگاری زیقار عەمار روکابی ئەندامی ئەنجوومەنی پاریزگاکە دەستگیرکراوە
و بڕیاری دەستگیرکردن بۆ محەمەد هادی ئەندامی ئەنجوومەنی پارێزگاکەش دەرکراوە، بنەمای
یاسایی سکاڵاکە ماددەی 43ـیە لە یاسای
سزادانی عێراقی و تۆمەتەکەش هەوڵدانە بۆ دەستدرێژی ئەلیکترۆنی.
هەروەها هێزە ئەمنییەکان
رۆژنامەنووسێکیان بەناوی سەفوان لەکاتی گەڕانەوەی لە کوێت دەستگیرکردووە کە تێوەگلاوە
لە دۆسیەکە.
یاس خەفاجی گوتەبێژی
ئەنجوومەنی پارێزگای زیقار ڕایدەگەیەنێت، عیزەت ناشی سەرۆکی ئەنجوومەن لێژنەیەکی بۆ
بەدواداچوون لە دۆسیەکە پێکهێناوە و لەگەڵ لایەنەکانیش لەسەر ئەم پرسە لە گفتوگۆدایە.
ئاماژە بەوەش دەکات
ڕووداوەکان خێران و ئەگەری هەیە بەرپرسانی دیکەی خۆجێیش لە دۆسیەکە تێوەگلابن و بەم
نزیکانە فەرمانی دەستگیردنیان بۆ دەربکرێت.
مێدیاکانی عێراق
ئاماژە بەوە دەکەن، پارێزگاری زیقار لەبەردەم دەسەڵاتی دادوەریدا دانی بەوە ناوە کە
لەماوەی کارکردنیدا بەشێوەی پچڕ پچڕ هاوسەرگیری کاتی" چێژبەخش"ـی کردووە،
کە یەکێک لە دەستگیرکراوان ڤیدیۆی قێزەونی لەو پەیوەندیانەی پارێزگار دەستکەوتووە
و بە تۆڕی دەستدرێژکاری ئەلیکترۆنی ئای تی ئێسی فرۆشتووە، کە بەیەکێک لە تۆڕە ڕەشبگیرەکانی
نێو تۆڕە کۆمەڵایەتییەکان دادەندرێت.
لەوبارەیەوە ڕەزا
محەمەد شارەزای بواری یاسایی ڕایدەگەیەنێت، ئەگەر ڤیدیۆ دزە پێکراوەکان ڕاستبن ئەوا
پێشلکاری یاسایی کراوە، بەوپێیەی یاساکان ڕێگە بە هاوسەرگیری کاتی نادەن و دەردەکەوێت
کە پارێزگار پۆستەکەی بۆ کاری نایاسایی قۆستووەتەوە، هاوکات دەبێت بەگوێرەی بڕگەی
2-ج لەماددەی 393 لە یاسای سزادانی عێراقی دادگایی بکرێت.
لەوبارەیەوە هادی
سەعداوی پەرلەمانتاری پێشوو لە پەرلەمانی عێراق ڕایدەگەیەنێت، لەساڵی 2019 ـەوە تۆڕەکانی
دەستدرێژی ئەلیکترۆنی لە زیقار کاران و بەهۆی فشارەکانی ئەو تۆڕانە لەسەر بەرپرسانی
دامودەزگاکان تەندەری پڕۆژەکان دابەشکراون و زیاتر لە ترلیۆنێک و 800 ملیار دینار
لەماوەی ڕابردوودا بەهەدەردراوە بەبێ ئەوەی پڕۆژەیەک لەو پڕۆژانە جێبەجێ بکرێت.
ئەمڕۆش رۆژنامەی سەباح بڵاویكردەوە لە ئۆپراسیۆنێکى پاڵەوانانەى دەزگای ئاسایشی نیشتمانیی عێرق، توانرا گەورەترین گورزی کوشندە لە مەترسیدارترین تۆڕی تاوانە ئەلیکترۆنییەکان و تاوانە رێکخراوەکان بدرێت، بەتایبەتی ئەو تۆڕانەى خەریکى تاوانە ئەلیکترۆنییەکان و سپیکردنەوەى پارە و بازرگانانى مادەى هۆشبەرن، کە گەورەترین ئۆپراسیۆن بووە بەراورد بە ساڵانى رابردوو.
عەبدولکەریم عەبدولفازیل، سەرۆکى دەزگای ئاسایشی نیشتمانیی عێراق بە رۆژنامەى سەباحی گوتووە، لە چوارچێوەى تاوانە ئەلیکترۆنییەکاندا، توانراوە سەدان تۆڕی تاوانى ئەلیکترۆنى بسڕدرێتەوە و دەیان تۆمەتبار، کە لە ساڵانى 2023 بۆ 2024 سەرقاڵی ئەو تاوانە رێکخراوانە بوون، دەستگیربکرێن.