سێ کاندید و لیستێک بە دوو ملیۆن و 500 هەزار دینار سزادران
06:08 - 02/10/2024
زەمەن - کوردستانی
ئەمڕۆ چوارشەممە کۆمسیۆنی هەڵبژاردنەکان رایگەیاند، دوو کاندیدی یەکێتییان یەکی بە 500 هەزار دینار سزاداوە، لیستی نەوەی نوێش لە سلێمانی بە بڕی یەک ملیۆن دینار و کاندیدێکی لیستەکەش بە 500 هەزار دینار سزادراون.
نەبەرد عومە، بەرپرسی دەستەی هەڵبژاردنەکانی هەرێمی کوردستان رایگەیاند، تا ئێستا لەسەر ئەنجامدانی سەرپێچی 20 سکاڵا تۆمارکراوە، 9 سکاڵا لە هەولێر و 9 سکاڵاش لە سلێمانی و دوو سکاڵاش لە دهۆک تۆمارکراون.
ئەو دوو کاندیدەی یەکێتی کە کۆمسیۆن سزای داون یەکی بە 500 هەزار دینار، ناویان هەورین عەلی و ئومێد بەکرە، سکاڵاکەیان لەسەر ئەوەبووە، بەر لە دەستپێکردنی بانگەشەی هەڵبژاردن، لە گوندێک بانگەشەیان کردووە.
لیستی نەوەی نوێ و کاندیدەکەشی کە ناوی ئازاد کەریمە لە بازنەی سلێمانی، بەهۆی هەڵواسینى پۆستەر یان بانگەشەکردن لە شوێنى رێگەپێنەدراو سزادراون.