لەدوای پەیامەکەی ئۆجەلانەوە هێرشەکانی تورکیا لەناو هەرێمی کوردستان زیادیانکردووە
07:25 - 03/04/2025
زەمەن - کوردستانی
کامەران عوسمان بەرپرسی دێسکی مافی مرۆڤ لە رێکخراوی سی پی تی ئەمریکی رایگەیاند، لە دوای ڕاگەیاندنی ئاگربەستی تاکلایەنانەی پەکەکە لەگەڵ تورکیا، سوپای تورکیا هێرشەکانی بۆسەر پەکەکە لە هەرێمی کوردستان زیادیکردووە.
کامەران عوسمان راپۆرتێکی رێکخراوەکەی بڵاوکردووەتەوە و دەڵێت، سوپای تورکیا لە مانگی ئاداردا 118 هێرش و بۆردوومانی بۆسەر هەرێمی کوردستان ئەنجامداوە.
هەروەها ئەوەش هاتووە، هەفتەی یەکەمی دوای ڕاگەیاندنی بانگەوازی ئاشتی، ڕێبەری دەستگیرکراوی پە-کە-کە، ژمارەی بۆردوومانەکان بەراورد بە دواین هەفتەی پێش ڕاگەیاندنی بانگەوازەکە بە ڕێژەی ١٤٥٪ زیادیکردووە.
باس لەوەشکراوە، هێرشەکانی سوپای تورکیا لە مانگی ئاداردا، بەراورد بە مانگی کانوونی دووەم، بە ڕێژەی ١٢٪ و بەراورد بە مانگی شوبات، بە ڕێژەی ٢١٪ کەمی کردووە.
هەروەها دەڵێت، لە مانگی ئاداردا، سوپای تورکیا ٥٥ هێرشی بۆسەر سنوری پارێزگای هەولێر و ٥١ هێرشی بۆسەر سنوری پارێزگای دهۆک و ١٢ هێرشیشی بۆسەر سنوری پارێزگای سلێمانی ئەنجامداوە. لە مانگی ئاداردا هیچ هێرشێک لە سنوری پارێزگای موسڵ ئەنجامنەدراوە.
بەگوێرەی راپۆرتەکەی سی پی تی، هێرشەکانی سوپای تورکیا بۆسەر سنوری پارێزگای هەولێر لە مانگی ئاداردا، بەراورد بە مانگی شوبات ١٢٠٪ زیادیانکردووە، سوپای تورکیا لە مانگی ئاداردا، ٥ ئەشکەوتی سروشتی بە بەکارهێنانی “تی ئێن تی” تەقاندۆتەوە.
هەر بەگوێرەی راپۆرتەکە، لە سێ مانگی یەکەمی ٢٠٢٥دا، سوپای تورکیا ٤٠٤ هێرش و بۆردوومانی بۆسەر هەرێمی کوردستان ئەنجامداوە و بەهۆی ئەو هێرش و بۆردوومانانە، ٦ هاووڵاتی مەدەنی (٢ شەهید و ٤ بریندار) بوونەتە قوربانی.