بەپەلە.. بڕی شەپۆلە بارانە ٢٤ کاتژمێریەکە پێشبینی کرا
08:04 - 03/04/2025
زەمەن - کوردستانى
شارەزایەکى کەشناسى رایگەیاند، لە سبەى شەوەوە شەپۆلێکی بارانبارین و هەورەبروسکه هەرێمی کوردستان دەگرێتەوە.
سیروان ساڵح شارەزاى کەشناسى رایگەیاند، بەهۆی کاریگەری دوو ناوچەی پەستان نزمی دەریای سوور و دەریای ناوەڕاست سبەى شەو تا شەوى شەممەى هەفتەى داهاتوو، ناوبەناو ئەگەری باران و هەورەبروسکەی باش هەیە، لەگەڵ ئەگەری بڕێک تەرزە.
ئەو کەشناسە دەشڵێت، شەپۆلەکە لەناوچەکانی باکووری رۆژهەڵاتى هەرێمی کوردستان و باکووری رۆژهەڵاتى گەرمیان کاریگەری زیاتر دەبێت و ڕۆژی شەممە له پارێزگای سلێمانی و هەڵەبجەو ئیدارەی ڕاپەڕین و بەشێکی باکووری رۆژهەڵاتى گەرمیان و بەشێکی کەمی ناوچەکانی ناوەڕاستی گەرمیان ئەگەری لافاو هەیە تەنها لە ڕێڕەوی ڕووبارو دۆڵ و چەمەکان.
هەروەها پێشبینى دەکات، رۆژى یەکشەممە کۆتایی به شەپۆلەکە بێت، بەڵام بەهۆی چڕبونەوەی پەڵە هەوری ناوخۆیی تاوەکو رۆژى دووشەممە لەنێوان کاتەکانی نیوەڕۆ بۆ دوای عەسر ئەگەری چەند تاوێکی بارانی ناوخۆیی هەیە بەزۆریش لە ناوچە شاخاویەکان.
پێشبینیی بڕی بارانبارین لە شەوی هەینی لەسەر شەممە تاوەکو ڕۆژی یەکشەممە لە ناوچە جیاوازەکان:
ناوچەکانی باشووری گەرمیان ( 10 تا 15 ملم )
ناوچەکانی ناوەڕاستی گەرمیان و کەرکوک ( 15 تا 30 ملم )
ناوچەکانی باکووری گەرمیان ( 20 تا 35 ملم )
ناوچە کوێستانییەکان:
پارێزگای هەڵەبجەو پێنجوێن ( 25 تا 35 ملم )
پارێزگای سلێمانی ( 20 تا 35 ملم )
ئیدارەی ڕاپەڕین ( 20 تا 30 ملم )
پارێزگای هەولێر ( 8 تا 15 ملم )
ئیدارەی سۆران ( 12 تا 20 ملم )
پارێزگای دهۆک ( 10 تا 15 ملم )
ئیدارەی زاخۆ ( 8 تا 12 ملم )