ئەو شەڤا عێراق وکوردستان هەژیای
1/9/2020 12:08:00 PM
حاجی ڕێکانی
پێش چەند روژەکان،فراکسیونێن شیعی ل ئەنجومەنێ نوینەرێن عێراقێ بەدەر ژفراکسیونا کوردستانی وفراکسیونێن سوننی،روینشتنەکا بلەز وتایبەت سازکر بو دەرکرنا بریارەکێ داکو هێزێن بیانی،نەمازە يێن ئەمریکی ل عێراقێ دەربکەن،پشتی گوتارەکا کورت ژلایێ سەروکێ حکومەتێ یێ دەست ژکاربەردای عادل عبدلمەهدی هاتیە خواندن،روینشتن بشێوەیەکێ کومیدی بدوماهی هات ب بریارا دەرکرنا هێزێن ئەمریکا ژعێراقێ.
گەلەک نەکێشا،هەرژشەڤا پاشتر ژروژا دەرکرنا بریارێ،ژنشکەکیڤە نامەیەک بناڤێ فەرماندێ گشتی یێ هێزێن ئەمریکی ل عێراقێ،کەفتە سەر شاشەیێن کەنالێن مەدیایی وددتورێن جڤاکی وسایت وپەیجێن ئەلکترونیدا وەک ئاگری بژاڵەبوو.نامە بو حەلبوسی وعەبدلمەهدی ئاراستەکر بوو، دناڤەروکا وێدا هاتبوو کو ئەمریکا رێزێ ل بریارا ئەنجومەنێ نوینەرێن گەلێ عێراقی دگریت وددەم وروژەکا دیارکریدا،دێ هێزێن خو ل عێراقێ ڤەکێشیت.
ئەڤ نامە بو دەڤەرا ناڤەراست ودەولەتێن کەنداڤی،بتایبەتی بو عێراقێ مینا بیڤەلەرزەکێ بوو، عێراق وەک حکومەت ودەستهەلادار ودام ودەزگایێن جوداجودا،ب هەمی پێکهاتێن خوڤە، ب شروڤەکاروچاڤدێرێن سیاسی،پێڤە سەرقالبوون وگوهشی مان.تا وی راددەی عەبدولمەهدی دچوارچوڤێ کومبوونا ئەنجومەنێ وەزیراندا دانپێدانکر ب گەهشتنا وێ نامێ بو دەستێ وی، ئاماژە ژی پێ کر کو ئەو سەرسامە ب وێ نامێ کا بوچی پشتی چەند دەمژمێران مارک ئەسبر وەزیرێ بەرەڤانیا ئەمریکا رەتکر وبرەشنڤیس وشاشییەک تەکنیکی قەلەمدا؟!
دیارە ئەمریکا وەک دەولەتەک زلهێزوپێشکەفتی،دەولەتەک ژهەمی روویەکێڤە یائێکەم بیت لسەر ئاستێ جیهانئ،هەرگیزشاشییەکێ بڤی قەبارەی ناکەت،هەرگیز بریارەکا شێتانەژی بڤی رەنگی ئامادە نینە بدەت،نەمازە دڤێ قوناغێدا کو ناڤودەنگێ وێ وپێگەه وبەرژەوەندیێن وێ یێن ستراتیژی دمەترسییەکا جددیدا بن،بساناهی هێزێن خو ناڤەکێشیت بەرامبەر وان هەرەشە وگورەشەیێن مەزنە بەرپرس ودەستهەلاتدارێن ئیرانێ وملیشیاتێن دیڤەلانک،وەکو حەشدا شەعبی وحزب الله یا عێراقێ ویا لوبنانی وسەرکردێن وان وەک سەدر ونەسروالله وخەزعەلی وعامری.
ئیرانێ ب ئاراستەکرنا دوازدە موشەکان بو سەر بنگەهێ سەربازی(عین الاسد)ل پارێزگەها ئەنبار و وەشاندنا موشەکەکێ ژی بو سەر بنگەهێ سەربازی یێ ئەمریکی ل دەشت حەریر لەهەولێرێ،هەڕەشەیێن خو برنەسەروگوتن کرنە کریار.لێ وەسا دهێتە شروڤەکرن کو ئیرانێ هەڕەشێن ترامپی بو ژناڤبرنا پێنجی ودوو جهێن ستراتیژی یێن ناڤخویا ئیرانێ بجددی وەرگرتبوون،لەوما ژی ئیرانێ ب رێکا دەولەتەک ئەوروپی(فەرەنسا)پێشوەخت کوچکا سپی ژنیازا خو بو ئەنجامدانا ڤێ کریارێ ئاگەهدارکربوو.
ئەڤ چەندە وێ دگەهینیت کو مەلایێن تەهرانێ نەڤێت(نەوێرن)شەرێ راستەوخو دگەل ئەمریکا بکەن،بەلکو ئەڤەکر پێخەمەت بەرامبەر مللەتێ خو شەرمزارنەبن،هەروەسا داکو وێ کەرب وکینا جەماوەرێ خو،بو بهێزکرنا پێگەهێ حوکمرانیا خو وەبەرهێنان بکەن.
دیارە کوچکا سپی ژی بڤێ پێنگاڤێ رازی بوو،لەوما ترامپ هەر بلەز پشتی وەشاندنا وان موشکان،تویتەک بەلاڤکر وگوت:(رەوش باشە وچ زیانێن گیانی دناڤ هیزێن ئەمریکی پەیدانەبووە..)،هەردیسان ترامپی دوهی بشەڤ ل کوچکا سپی دگوتارەکا کورت وپوختدا راگەهاند کو ئەو داخوازا شەڕی ناکەت،وژبلی ئاشتیێ وئارامیێ وخوشگوزەرانیا ئابووری بو مللەتێن ئیرانێ ناخوازیت.
هەژی ئاماژەکرنێیە کو وەزیرێ دەرڤەیێ ئیرانێ زەریڤی،پشتی وەشاندنا وان موشەکان بو کەنالێن راگەهاندنێ ئاخڤی بوو کو تەهران ئەوا ڤیای وەک تولڤەکرنەک بو گیانێ سولەیمانی دژی ئەمریکا ئەنجامدا،لێ گەلەک پێ نەچوو ئێکسەر رابەرێ ئیرانێ عەلی خامەنەئی بەروڤاژی زەریفی هاتە قەسە ودناڤەروکا ئاخفتنێن خودا ئیشارەت پێدا کو هێشتا گەلەک یا مای تا تولا سولەیمانی بهێتەڤەکرن.هەلبەت ئەڤ هەڤدژیا دلێدوانێن واندا،نیشانێ بیروبوچوونێن جوداجودایە بو چەوانیا چارەسەرکرنا کێشەیان وگرنگیا ئەنجامدانا دانوستاندنان دگەل ئەمریکا.
لێ برەنگەگێ گشتی راستییەک هەیە وماندەلی لێ ناهێتەکرن،ئەوژی ئەڤەیە کو ئیران هندە تڕسا خونیشاندانێن ناڤخویا عێراقێ دکەت،هندە تڕسا هەبونا هێزێن ئەمریکا ناکەت دعیراقێدا،بوچی؟چونکە خونیشاندان،خونیشاندانەکا جەماوەری یا خورسکی وسڤیل وبێ چەکە، بشێوازەکێ هەرەمەکی وب ئیرادەکا پیلای هێرشا دکەتە سەر بارەگایێن ملیشیاتێن حەشدا شەعبی ودسوژیت وژناڤدبەت.
لدوماهیێ گرنگە بێژین کو ترامپی هەلویستەکێ نەرم بەرامبەر ئیرانێ وەرگرت وهیچ بریارەکا شەڕی یان فەرمانا هێرشکرنێ وەک بەرسڤەک بو موشەکێن ئیرانێ نەدا.
دیارە ترامپی دڤێت بێژیتە رژێما ئیرانێ:
تا ڤیرە وئێتربەسە،ئەگەر هەوە بڤێت ئاشتی وخوشژیاری وسەقامگیریا ئابووری ل وەلاتێ هەوە بەر قەراربیت،پێدڤییە بهێنەپێش ودانوستاندنێ دەربارەی چەکێ ئەتومی دگەل من بکەن.
ئەڤجا نهوو دوو بژاردە بتنێ یێن بەرسینگێ مەلایێن تەهرانێ،یان شەرێ ب وەکالەت دژی ئەمریکا بکەت،یانژی قەستا مێزا دانوستاندنێ بکەت.