عێراق وهەرێما کوردستانێ دوو جەمسەرێن پێچەڤان
1/7/2024 2:28:00 PM
حاجی ڕێکانی
پێش خاتر خواستنێ بکەین ژساڵا ٢٠٢٣ وخوشی ونەخوشیێن وێ ب رێ بێخین وپێشوازیا ساڵا نوی بکەین2024 وب دلەک پڕی هیڤی وئۆمێد ب خوازین کو ساڵا خێرێ بیت وخوشیێ وسەلامەتیێ وئاڤەدانیێ بت. وەها دهێتەپێشبێنی کرن کو ئەڤ سالە مینا هەمی ساڵێن دیتر لسەر هەرێما کوردستانێ ئەگەر خرابترنەبیت باشتر نابیت.
ڤێ دبێژم نەکو کەسەک ڕەش بینم وهەمی تشتا لێکدانی سفرێ دکەم، نەخیر؛ لێ چنکو بارودۆخێ دەڤەرێ وکاریگەری وسەقایێ شەرێ "دەولەتا ئسرائیل" و"بزاڤا حەماس" ژلایەکێ وژلایەکێ دیڤە شەرێ روسیا وئوکرانیا،ژبلی دەستێوەردان وکارێن تێکدەرانە یێن هەردوو جیرانێن نەخۆش مرۆڤ "ئیران وتورکیا"دکاروبارێن عێراق وهەرێمێ، رۆژ بۆ رۆژ کارتێکرنەک نەرێنی دبارێ سیاسی وئابووری وجڤاکی ل هەرێما کوردستانێ دهێتەکرن.
ئەڤە لسەر ئاستێ دەڤەرا ناڤین وجیهانێ،ولسەر ئاستێ عێراقێ ژی، دبینین دماوێ حەفتیەکێدا "نوری مالکی"دوو لێدوانێن سەرنجراکێش ومەترسیدار برەنگەکێ فەرمی لسەر لاپەرێ پەیجێ خو ل "سوشیال میدیا" بەلاڤکرن. لێدوانا ئێکێ ئاراستەی هێزێن ئەمریکی وکوچکا سپی کر، ویا دوویێ برەنگەکێ نەراستەوخو ئاراستەی جادا عێراقێ وهەرێما کوردستانێ کر.
لێدوانا ئێکێ کو پێش چوار رۆژان بوو، گوت بوو:"هێزێن ئەمریکی دڤێت ل عێراقێ نەمینن ودەرکەڤن".وئەڤرۆژی ٦/١/٢٠٢٤ێ لێدوانەکا دی دایە(کو زیاتر مینا بانگەوازەکێ دهێت)، داخوازکریە ژسوپایێ عێراقێ کو" بەرهەڤیێن خو بکەن ودئامادەباشیێدابن بۆ هەر پێشهاتەکا کتوپڕ".
لێدوانا ئێکێ هاتیەدان پشتی چەند رۆژەکان ژکوشتنا جەنەرالێ ئیرانی لسوریێ"رەزا محمدی"ئەوێ ژلایێ درونەکا ئسرائیلیڤە نێزیک دیمەشقێ هاتی ژناڤبرن،ولێدوانا دووێ ژی پشتی دوو رۆژان دهێت ژکوشتنا لیوا"ئەبو تەقوا"ی فەرماندێ گشتی یێ ملیشیاتێن "نوجەباء"دنیڤا بەغداد ژلایێ درونەکا ئەمریکیڤە.
دیارە ئەڤ هەردوو لێدوانەژی وەکو من پێشیێ ئاماژەپێکری،زێدەتر ژکارڤەدانێن شەرێ "دەولەتا ئسرائیل" و"بزاڤا حەماسا ئیسلامی"دهێنەقەلەمدان،کو پشتی ئاگرێ شەری"کەرتێ غەززە" و"باشوورێ لوبنان" بسوژیت،چەند پەرمیچکەک ژ وی ئاگری سوریا هەرفتی وعێراقێ ڤەگریت و هندەک ژی گەهشتیە هەرێما کوردستانێ.ژڤان روویدان وپێشهاتان بۆ مە دیاردبیت کو ئیران"وتا ڕاددەکێ تورک" حەزدکەن دەڤەرێ"بتایبەتی عێراقێ وپاشی هەرێما کوردستانێ"بۆ شەرەکێ دژوار و وێرانکەر پاڵددەن!!، نەخاسمە دەما دبینین ملیشیاتێن"حەشدا شەعبی" کو ب چەنگێن ئیرانێ دهێنەنیاسین "ل لوبنانێ وسوریێ وعێراقێ ویەمەنێ" ژدەستپێکا شەڕی وهەتا نهۆ پتری ١٠٠ هێرشێن عەسمانی دژی بالیوزخانا ئەمریکی لبەغداد وبنگەهێن سەربازی ل عێن ئەسەد ل"ئەنبار"وفروکخانا هەڤلێرێ وبنگەهێن هێزا پێشمەرگەی بۆردومان کرینە!!.
هەلبەت ئەڤە هەمی ئاماژەنە و وێ چەندێ دگەهینن کو ئەڤ ساڵە ب هەر ڕەنگەکێ هەبیت ئەگەر ساڵەکا ئێکلا کەرژی نەبیت بۆ قەوارێ سیاسی وئیداریێ هەرێمێ دگەل حوکمەتا فدراڵی ئەڤا لژێر هەژمونا"نوری مالکی"دا،دێ ساڵەکا دارایی ئێکجار دژوارتر وئالوزتربیت بۆ حوکمرانیا کوردی.
سەرباری ڤێ هەمیێ ژی هێشتا هەردوو حزبێن کوردی ئێکەتی وپارتی باتی کو دئاستێ بەرپڕسایەتیێدا ڕابن وشیرازێ جڤاکی وسەقامگیریا سیاسی وئەمنی وئابووری پارێزن ونافماڵیا کوردی وهێزا پێشمەرگەی رێکبێخن وئێک گۆتارا سیاسی وئیعلامی هەبت،باتی ڤێ هەمیێ بکەن، هەڤدژی ئێک رەفتارێ دکەن ورەوشا ئەمنی وسیاسی ودارایی یا خەلکێ کوردستانێ خراب کریە،ئەڤەژی بوویە ئەگەرێ ژدەستانا باوەریێ نەک تەنێ خەلکێ کوردستانێ،بەلکو هەتتا ژلایێ پشکەکا زۆر ژ رێکخستن و جەماوەرێن خوڤەژی، کێرڤێ متمانێ ل کێمیێ دایە.
ئێدی خودێ یار ویاوەرێ مللەتی و کوردستانێ بیت.