شەرێ سار یێ ئەمریکا وئسرائیل دگەل ئیرانێ، کارڤەدان ودەرئەنجام
4/13/2024 11:06:00 AM
حاجی ڕێکانی
هەر
ژرۆژا ئێکەم ژساڵا ١٩٧٩؛ ساڵا روخاندنا حوکمڕانیا محمد رەزا شاه وسەرکەفتنا شۆرەشا
ئیسلامی ب رێبەریا "ئایەت اللە خومەینی" وپێکئینانا حوکمڕانیەک ئولی
وشیعەمەزهەب، وب ناڤکرنا ئەمریکا ب"شەیتانێ مەزن" وئسرائیل ب"شەیتانێ
بچویک". ژ وێ رۆژێ وەرە پەیوەندی دناڤبەرا ئیران وئسرائیل وئیران وئەمریکا ژناڤچوون
وشەڕێ ساردناڤبەرا ئیران وهەردوو دەولەتێن ناڤبری بەرپابوویە وهەتا نهۆ بەردەوامە.
هەرچەندە
دهندەک قوناغاندا نێزیکبوونەڤەوهەڤتێگەهشتن برێکێن جوداجودا ودانوستاندنێن نهێنی (ڕاستەڕاست
ونەڕاستەڕاست)دناڤبەرا واشنتون وتەهران دەربارەی هندەک بادەکان هاتینەپێش؛ وەکو دانوستاندنێن
حکومەتا سەرۆک"جێمی کارتەر"لسالا ١٩٧٩بۆ ئازادکرنا بارمەتێن بالیوزخانا ئەمریکی
ل تەهرانێ،وئەو پشتەڤانیا دوم کورت یا حکومەتا سەرۆک"رونالد ریگن"دناڤەراستا
ساڵێن هەشتێاندا بۆ ئیرانێ ،هەروەسا لسەردەمێ سەرۆک"باراک ئوباما"لساڵێن٢٠١٣-٢٠١٥،رێککەفتن
دناڤبەرا واشنتون وتەهرانێ هاتبوو سازکرن؛ پاش دوو ساڵان ژدانوستاندنێن ڕاستەڕاست دومکری
دەربارەی چەکێ ئەتومێ ئیرانی. ول ڤێ داویێ ژی ژدەستپێکا ساڵا ٢٠٢٤ێ ئیدارا
سەرۆک"جوبایدن"رێککەفتنەک نهێنی وڕاستەڕاست ل"مەسقەت" پایتەختێ دەولەتا عوممان دگەل تەهرانێ سازکر؛ ب مەرەما
ڕاگڕتنا هێرشێن چەکدارێن یەمەنی"حوسی" بۆ سەر گەشتیێن ئەمریکی وبەریتانی
ل هەردوو دەریایێن سور وناڤەراست؛ وهەر وەسا پێخەمەت ڕاگرتنا هێڕشێن چەکدارێن
شیعەمەزهەب لعێراقێ بۆ سەر بالیوزخانا ئەمریکی لبەغداد وبنگەهێن سەربازی ل ئوردن
وسوریێ وعێراقێ وهەولێرێ.
ب هەمان شێوە، پەیوەندی دناڤبەرا تەل ئەبیب
وتەهران ژ ساڵا ١٩٧٩ وتا نهۆ؛ چەندین ژێهەلی ونشیڤی بخۆڤە دیتینە.لساڵێن شەرێ
عێراقێ وئیرانێ١٩٨٠-١٩٨٨؛ پەیوەندی دناڤبەرا هەردوو دەولەتان دئاستەکێ باش دابوون؛
وئیرانێ چەندین جاران چەک وکەرستێن سەربازی ب بهایێ ملیارەها دولارێن ئەمریکی
ژئسرائیل کرینە. لێ لساڵێن٢٠٠٠-٢٠١٣؛ ژئەگەرێ ئەو دوو لێدوانێن هەڕەشەئامێز ئەوێن ژلایێ
رێبەرێ کومارا ئیسلامی"عەلی خامەنئی"وسەرۆک کومار"ئەحمەدی نەژاد"
ئاراستەی تەل ئەبیب کرین؛ دەما گۆتین:(ئسرائیل شێرپەنچەیە دلەشێ دەڤەرێ دا؛ دڤێت
بهێتەژناڤبرن)و(دڤێت دەولەتا ئسرائیلێ لسەر نەخشەیا دەڤەرا ناڤەڕاست نەمینت)، هەروەسا
ژئەگەرێ پشتەڤانیا تەهرانێ بۆ(حزب الله)یا لبنانێ، پەیوەندی قوت بوون وگڕژی
وئاڵوزی جارەک دی دناڤبەرا هەردوو دەولەتان سەرهەڵداڤە وتا نهۆ درێژەکێشایە.
دڤێ حەفتیا بوری دا، شەڕەدەڤ وگەف ل هەڤدوکرن
دناڤبەرا رایەدارو بەرپڕسێن پایەدارێن سیاسی وسەربازی ئسرائیلی وئیرانی دکەناڵێن
میدیایێن هەردوو دەولەتاندا پێشجاران، گەرم وگۆڕتر بوونە وگەهشتینە گۆبیتکێ. هەلبەتە
ئەڤەژیک مینا کارڤەدانەکا ڕاستەڕاست دهێت؛ پاش وێ هێڕشا توندا ئەسمانی یا فروکێن
ئسرائیل بۆ سەر کونسلخانا ئیرانێ دنیڤا دیمەشقا پایتەخت یا کومارا سوری ئەوا ل سەرێ
مەها نیسانێ/٢٠٢٤هاتی ئەنجامدان، کو لدیف زانیاریێن دەزگایێ هەواڵگریا ئسرائیل(موساد)،
کونسلخانا ناڤبری مینا(ژۆرا پروسەیان)بوو بۆ پشتەڤانیکرنا"چەکدارێن
حەماس"و"حزب اللە"ا لبنانی وشەڕێ وان دژی ئسرائیلێ دهاتەزانین. ئاکام
ژی وەک هاتیە ڕاگەهاندن وتەهڕانێ دانپێداین؛کوشتنا فەرماندێ گشتی سوپایێ قودسا
ئیرانی محمد رەزا زاهدی بوو، دگەل جێگرێ وی و پێنج ڕاوێژکارێن سەربازی وهەواڵگری
یێن ئیرانی، لسوریێ؛ هاتنە ژناڤبرن.
دیارە
دربا ڤێجارێ مینا هەردوو دربێن دیتر(دربا موسادێ بۆ ژناڤبرنا مەزنە زاناو ئەندازیارێ
چەکێ ئەتومی یێ ئیرانی موحسن فەخری زادە، ئەوێ ب بابێ بومبا ئەتوم دهاتە نیاسین،
دکریارەکا زیرەکانە دنیڤا تەهرانێ دا هاتە ئەنجامدان. ودربا ژناڤبرنا قاسم سلێمانی
وئەبو مەهدی الموهەندس لبەغداد ژلایێ ئەمریکاڤە لساڵا ٢٠٢٠)، کاریگەریا وێ لسەر
ئیرانێ ژلایێ؛ هەواڵگری، وسەربازی،وموڕالیڤە، ئەگەر پتر نەبیت کێمتر هەر نینە. ئەڤ
چەندەژی ژ وان گەف وپەیامێن توڵەڤەکرنێ دیاردبن ئەوێن ل حەفتیا بوری لسەرزارێ
ڕابەرێ کومارێ"عەلی خامەنئی"ڤە دژی ئسرائیلێ هاتین ئاراستەکرن. هەلبەت ڕاستەڕاست
تەلئەبیب بێمنەتی بەرسڤا گەفێن وی دا وگۆت: ئەڤە عەردو ئەڤە گەز.
هەمی ئاماژە بۆ هندێ دچن کو ئیران ڤێ جارێ یا
ڕژدە سەر تولڤەکرنێ. لێ پڕسیار ئەڤەیە؛ تولەڤەکرنا ئیرانێ دێ ب چ شێوەبیت؟! ئایا
دێ وێرەککەت وەکو سەدام، ڕاستەڕاست ناڤخویا ئسرائیل موشەکباران بکەت؟! یان جارەک
دی دێ پێ ل وژدانا خۆ کەت و وەک تۆپزکەنداڵ دێ گۆرزێ خۆ بتنێ ل هەولێرێ وەشینیت
وراوەستیت؟! یانژی دێ بڕنگەکێ نەڕاستەڕاست وب رێکا(حزب اللە)ا عێراقێ ولوبنانێ
وهێزێن حوسی ل یەمەنێ، ب چەند موشەکەکان ئاراستەی تەل ئەبیب کەت وکەربا خۆ پێ
بشکێنیت؟! وئەگەر درب ژی وەشانت؛ ئایا "نەتەنیاهۆ"وحوکمەتا وی یا
شەڕانگیز دێ دەستا داهێلیت وبێدەنگ بیت؟! ئەڤجا وەرە ئەمریکا؛ ئایا ئیدارا سەرۆک"جوبایدن"
ئەوێ جاڤەرێ دکەت دەنگێ جوهیێن ئەمریکا دهەلبژارتنێن داهاتی بۆ خۆ مسوگەر بکەت، دێ
هەلویستێ وی چ بیت؟! نەخاسمە پاش هۆشداریا بەرپرسێن ئیرانێ بۆ واشنتون کو خۆ دویربگرت
وبێ لایەن بیت ژهەرکارڤەدانەکا بهێت بۆ سەر تەل ئەبیب؟!
ژمن وەرە؛ ئیران ژپێخەمەت پاڕاستنا ناڤودەنگ
وڕۆمەتا خۆ(للحفاظ على ماء الوجه)وەکو عەرەب دبێژن؛ دئایندەیەکێ نێزیکدا دێ دربەکێ
وەشینتە ئسرائیل. ول گۆرەی زانیاریێن بەرپڕسێن ئەمریکی، ئیرانێ بەرهەڤی کرینە ب ١٠٠فروکێن
درۆن بەرسڤا هێڕشا ئسرائیلێ بدەت. لێ سەرباری وێ چەندێ؛ باوەرناکەم ئیران وێرەک
بکەت وێ پێنگاڤێ پاڤێژیت وڕاستەڕاست بەرسینگێ ئسرائیل بگریت؛ چونکە سەرانێن تەهران
باش دزانن ئەمریکا دێ چیتەپاڵ ئسرائیل وئەنجام دێ وێرانکەربن سەر تەهرانێ، ودویر
نینە ئێدی تشتەک نەمینت لدەڤەرا ناڤین بناڤێ کومارا ئیسلامی ئیران. وئەگەر هات
وتەهران شوپا سەدامی گرتەبەر؛ ل وی دەمی کارڤەدانەک مەزن دێ ل دەڤەرا ناڤین
هێنەپێش وبالانسێن سیاسی وسەربازی وئەمنی وئابوری وهزری هێنە گوهورین ودەرفەتەک زێرین
بۆ دوزا کوردی دێ هێتەپێش وپێشڤەچوونەک ل رۆژهەلاتێ کوردستانێ دێ بخۆڤەبینت؛ ول
عێراقێ ژی باڵانسا سیاسی وهێزێ دێ دبەرژەوەندیا هەرێما کوردستانێ دا شکێتن.