ڤێ جارێ ژی مللەتی باوەری پێ ئینا.. هیڤیدارم پەرێ وەکی بەرێ نەبیت!!
10/21/2024 2:21:00 PM
حاجی ڕێکانی
دیارە هەلبژارتن؛ پرۆسەیەکا دیموکراسی سیاسی جەماوەری وجڤاکی ومەدەنیە،باشترین ڕێکەچارەسەرییە بۆ هەر لایەنەکێ سیاسی ومللەتەکێ بگریتەبەر نوینەرێن خۆ ب حەزو ئیرادا خۆ برەنگەکێ ئازادانە، باوەریێ وشەرعیەتێ بدەتێ و ب هەڵبژێریت وبگەهینتە پەرلمانی ودەستهەڵاتێ ودامودەزگەهێن تەشریعی وقەزائی وحکومی دابنیت،پێخەمەت نوینەرەتیەکا ڕاستەقین وحوکمڕانیەکا رەشید وئیدارەیەکا باشترو خزمەتەکا باشتر پێشکێشی خەلکی بکەت؛ وبەرەڤانیێ ژ ماف وکەرامەتا ماددی و مەعنەوی یا هەر هەڤوەڵاتیەکی بێ جیاوازی بکەت.
خەلکێ شەرەفمەندێ هەرێما کوردستانێ ژی،دوهی ٢٠/١٠/٢٠٢٤ێ؛ پاش هەیڤەکێ ژ بانگەشەیەکا توندو توڵ ونەهەڤسەنگ،ودکەشو هەوایەکێ شەڕدا ودویر ژپیڤەرێن دیموکراسیەتێ، نوینەرێن خۆ هەلبژارتن. ب وێ یەکێ ژی؛ هەر حزبەکێ چ ب دارێ کوتەکێ وچاڤسوور کرنێ وگەفاو خەرجکرنا سەدەهان ملیون دولاران وکرینا دەنگێ خەلکی بیت، وچ ژی ب زەندوباسکێن خۆڤەبیت، سەنگو قەبارەو پێگەهێ خۆ زانین.
بزاڤا گۆڕان ژی، دچوارچوڤێ باوەریا وێ ب پرۆسەیا دیموکراسیەتێ، بەشداری دهەلبژارتناندا کر. لێ دیارە ژبەر گەلەک هۆکارێن ناڤخوی وبابەتی وماددی وپیلانێن ڤی لایەنی ولایەنێ دی؛ زێدەباری وان شاشی وخەلەتیێن ستراتیژی ئەوێن گۆڕان پاش نەمانا رە‌حمەتی نەوشیروان ئەنجامداین؛ وەک بەستنا وێ رێکەفتنا دگەل پارتی وئێکەتیێ، وژ وێ پێنگاڤێ خراپتر وکوژەک گۆڕان هاڤێتی، پشکداریکرن بوو دحکومەتا هەردوو حزبێن ناڤبریدا.
دیارە چوونا گۆڕان بۆ حوکمەتێ مینا توکا لەعنەتێ بوو بەر گۆڕان کەفتی وئێدی جەماوەرێ خۆ ژدەستدا وشکەستن ئینا.
وجهێ دلخوشیێیە کو جەماوەرێ گۆڕان ومللەتێ مە یێ هشیارە، ودهەمان دەمدا یێ زەبردەستە؛ هەر کەس وهەر حزبەک خزمەتێ نەکەت وبەرەڤانیێ ژ مافێ وی وکەرامەتا وی نەکەت،دێ زەبردەست کەت ولادەت.
بەلێ، ئەم وەکو گۆڕان دانێ پێددەین کو مە شکەستن ئینا ودئاستێ داخوازیا جەماوەرێ خو وخەلکێ هەرێمێ نەبووین ئەوێ کو سەرێ ٣٣ ساڵانە بەردەوام زولم لێ دهێتەکرن، وئەم نەشیاین خەمێن وان سڤکەین وبەرەڤانیێ ژمافێن وان بکەین وژیانەکا شایستە بۆ وان دابینکەین، سەرباری کو مە چوار وەزارەت ژی ددەستیدا بوون ومە گەلەک سۆزوپەیمان دابوونە خەلکی ومخابن ئەم دەرحەق نەدەرکەفتین. ئەڤە ڕاستیەکا تاڵەو ماندەلی لێ ناهێتکرن.
لێ دوماهیا دونیایێ ژی نینە، شکەستن وسەرکەفتن دپرۆسا سیاسی وقادا خەباتێدا؛ دجیهانا سیاسی ورێکخراوەیدا، مینا دوو جێمکێن پێشبێنی کرینە و ب تشتەکێ سرۆشتی وساخلەم دهێنە زانین. لێ تشتێ نە ساخلەم ونەسرۆشتی ئەوە حزب یان لایەنێ سیاسی تەسلیم ببیت وبێ ئیرادەببیت وژخەلەتیێن خو پاشگەز نەبیت.
گۆڕان شاشی وخەلەتیێن خو هەبوونە بەلێ ڕاستە؛ لێ خۆشبەختانە گۆڕان پەشیمان بوویە وداخوازیا لێبورینێ ژ جەماوەرێ خو ومللەتی خو کریە،وژ کەرەما خۆدێ کو چنکو گۆڕان خودان پڕۆژەو بەرنامێن درێژمەوداو ستراتیژیە بۆ چارەسەریا گشت کێشەیێن هەرێما کوردستانێ،وخودان سەدەهان کارەکتەرو کادرێن ب شیان وزیرەکە،وخودان رۆئیایە ب ئایندەیەکی گەش بۆ هەرێما کوردستانێ. بۆیە گۆڕان ژ وی جورە لایەنان نینە کو تەسلیم ب بیت و دەستدا داهێلیت؛نەخێر. بەلکو گۆڕان وەک ئیرداەیەکا بەردەوام دێ درێژیێ ب خەباتا خۆ یا سیاسی ورێکخڕاوەی دەت،ودئایندەیدا دێ بیتە ئۆپۆزسیۆنەک ڕاستەقین،وهەمی شیانان دێ تەرخان کەت پێخەمەت جارەک دی ڕادبیتە سەرپێن خۆڤە وهەمان روڵێ جاران بگێریت.
هیڤیدارم قوناغا بهێت قوناغەکا جیاوازبیت ژ ئیدارەو وحوکمڕانیا ٣٣ ساڵێن بوری، وئەو حزب ولایەنێن سەرکەفتن ئینای وحکومەتەک نوی پێک دئینن، هیڤیدارم دئاستێ بەرپڕسایەتیێ دابیت وسوزو پەیمانێن خۆ ب جه بینن، هەکە چ نەبیت نانێ رۆژێ یێ هەژاران دابینکەن، بێکاریێ نەهێلن،موچێ موچەخوڕو فەرمانبەران وخانەنشینان هەمی سەرێت هەیڤا بدەنێ ونەبنە شێست رۆژ،دزی وگەندەلیا ٣٣ساڵان نەکەن،هێزا پێشمەرگەی بکەنە ئێک وببیتە هێزەک نشتیمانی نەک حیزبی، وبگشتی ژێرخانا ئابووری وکێشەیا کەهرەبێ وسەکتەرێ پەروەردێ وساخلەمیێ چارەسەرکەن وگەشێ دحالو ماڵێ خەلکیدا بکەن.
لێ پا دیارە یاژمنڤە دێ هەر وێ گۆتنا کوردی ڤەکێرین وبێژین: پەرێ وەکی بەرێ!!.