بانکى ناوەندیى عێراق 49 کۆمپانیاى سزا دا کە کۆمپانیاى کوردیشیان تێدایە
07:06 - 17/12/2024
زەمەن - ئابورى
بانکى ناوەندیى عێراق سزاى بەسەر 49 کۆمپانیاى عێراقیدا سەپاند بە تۆمەتى پارە سپیکردنەوە و ناوى هەموو کۆمپانیاکانیشى بڵاوکردووەتەوە، هەندێک لە کۆمپانیاکان کوردین.
بەگوێرەى راگەیەندراوى بانکى ناوەندى، ئەو کۆمپانیایانەى سزادراون، ناتوانن چیتر دۆلار بە نرخى فەرمى بە 132 هەزار وەربگرن، هەورەها ناشتوانن پارەى حەواڵەى دەرەوە بکەن.
بڕیارەکەى بانکى ناوەندیى عێراق لەسەر بنەمای راپۆرتی کۆمپانیایەکى وردبینى ئەمریکیی دراوە بەناوی K2، کە دەڵێت، ئەو 49 کۆمپانیایە کە بەشێکیان لە هەرێمى کوردستان کاردەکەن سەرپێچییان لە حەواڵەى دەرەکى کردووە و پارەیان سپیکردووەتەوە.
بەڕێوەبەرى گشتیى تۆمارى کۆمپانیاکان لە وەزارەتى بازرگانی هەرێمى کوردستان رایگەیاند، بە فەرمى ئەو نووسراوەیان لەلایەن بانکى ناوەندیی عێراقەوە پێنەگەیشتووە کە کۆمپانیاکانى سزاداوە، تاوەکو بزانن چۆن مامەڵە لەگەڵ ئەو کۆمپانیایانە دەکەن، بەڵام ئەگەر هەر راسپاردە و بڕیارێکمان بۆ بنێرێت لە بارەى مامەڵەکردن لەگەڵ ئەو کۆمپانیا سزادراونە پابەند دەبین.