ڕەش و سپی حزب کەی دەردەکەوێت
8/22/2024 1:17:00 PM
فارس نەورۆڵی
لە کۆمەڵگەی دیموکرات
و مەدەنیدا حزب وەزیفەی گرنگی هەیە، کاری
ئەرێنی لەسەر هەموو کایەکان دەکات، بەڵام لەکۆمەڵگەی سەرەتایدا زۆر جار لە وەزیفەی خۆی لادەدات و کاری قێزەون ئەنجام دەدا.
ئەوەی لە کوردستان دیموکراتیەتی پێ ناسراوە هەڵبژاردنە لە
ئاستی گشتی و حەشامات ئیتر لە هەندێ کاتدا ئەقڵ وون دەبێت. جۆرج ترابیشی دەڵێ: (دیموکراتیەت
لە سندوقەکانی دەنگداندا ڕوونادات ،بەڵکو لەسندوقی مێشکدا بەدی دێت) واتە هوشیاری
تاک و کۆمەڵگە ماناو شێوازی دیموکراتیەت دیاری دەکات کۆمەڵگە هوشیار نەکرێتەوە یاخود
هوشیار نەبێت هیچ پەیام و فەلسەفەیەک تێیدا گەشەناکات ،دەکرێ بڵێین ئەم دۆخە یاخود
ئەم تایپە لەدیموکراتیەتی تاڕادەیەک ئاساییە ، چونکە ئێمە لە ناو دیموکراتیەتدا نین
بەڵکو لە گواستنەوەداین بەرەو دیموکراتیەت ئەگینا سەیری ڕێژەی زۆری ئەو لیستانە بکەین
کە لە (٦٠) لیست و کاندیدی گوایە سەربەخۆ زیاترە ئەمە بۆ چوار پارێزگا ناسروشتییە. ئەمریکا کە گەورەترین هێزی دنیایە
لە هەموو ڕویەکەوە و لانکەی دیموکراتیەت و لیبراڵییەتە، دووحیزب ڕکابەری یەکتری دەکەن
بەهەرحاڵ بانەڵێین ئەم دیموکراتیەتەی ئێمە جیاوازە ئەوەی دەمەوێ بێژمی ئەم هەڵبژاردنە
لەبەردەمماندایە هەڵبژاردنێکی چارەنوسسازە و بواری دەرکەوتنی کرداری ! ڕەش و سپی لیست
و حیزبەکانە دەر دەکەوێت هەموو لیستێک نامەی کرداری خۆی وەردەگرێت .
هیوادارم زۆرترین هاوڵاتی بەشداربێت و چونکە ئەوە مافی بەشداری
سیاسی هەر هاوڵاتییەکە. بۆیە وا باشترە بەشداری پرۆسەی هەڵبژاردن بکات و لیستی دڵخوازی
خۆی دەست نیشان بکات. بەداخەوە کە هاوڵاتی باوەڕی بەپرۆسەی هەڵبژاردن نەماوە، لەسەر
حیزبەکان پێویستە مانا بدەنەوە بەدیموکراتی بۆ ئەوەی هاوڵاتی متمانە بەپرۆسەی سیاسی
بکاتەوە، واباشە هاوڵاتیش بزانێ جگە لەدیموکراتیەت و پرۆسەی هەڵبژاردن ڕێگایەکمان
نیە بۆ پێکەوە ژیان و گۆڕانکاری جگە لەوە هەر دیموکراتیەت و ئازادییە وادەکات جیهان
گرنگی بەکوردستان بدات کەواتە پێویستە لیست و وکاندیدەکانیان لەڕێگای پرۆژەوە بچنە
بانگەشە نەک سوکایەتی ویەکتر شکاندن ،بۆ ئەوەی هەموو حزبێک خۆی بناسێت و دواتر خەڵک بڕیار بدات ئایا حزبە یا دوکانی سیاسی!