کۆمپانیای فرۆکەوانی ئیمارات گەشتەکانی لەگەڵ بەغداد ڕاگرت
12:04 - 19/11/2024
زەمەن _ عێراقی
کۆمپانیای فرۆکەوانیی ئیمارات، تەواوی گەشتەکانی هێڵەکەی لەگەڵ بەغداد تا کۆتایی ئەم مانگە ڕاگرت، بەهۆی زیادبونى مەترسییەکان لەرۆژهەڵاتى ناوەڕاست.
ئەمڕۆ سێشەممە، ١٩ی تشرینی دووەمی ٢٠٢٤، کۆمپانیای فڕۆکەوانیی ئیمارات بەیاننامەیەکی بڵاوکردەوە و ڕایگەیاند: تەواوى گەشتەکانى هاتن و چۆن لەگەڵ بەغداد تا 30ـى تشرینى دوەم رادەگرێت.
هەرلە بەیاننامەکەدا ئەوەش هاتووە، راگرتنى گەشتەکان تەنها لەگەڵ بەغداد نییە و کۆمپانیاکە تەواوى گەشتەکانى لەگەڵ بەیروت تا ٣١ـى کانونى یەکەم راگرتوە.
لەبارەى ئەم بڕیارەوە میدیاکانى ئیمارات دەڵێن: راگرتنى گەشتەکانى هێڵى ئیمارات بەهۆى مەترسیی فراوانبونى گرژییەکانى رۆژهەڵاتى ناوەڕاستە و لەو شوێنانە بەدور دەبن کە مەترسیان لەسەرە.