بەپەلە.. دادگای توركیا بڕیاری زیندانیكردنی بۆ ئەكرەم ئیمامئۆغڵۆ سەرۆكی شارەوانی ئیستەنبوڵ دەركرد
11:19 - 23/03/2025
زەمەن - سیاسی
رۆژی 19ی ئەم مانگە، لەسەر سكاڵای داواكاری گشتی توركیا بە بیانوی گەندەڵی و هاوكاریی تیرۆر و چەند تۆمەتێكی دیكە ئەکرەم ئیمامئۆغڵۆ سەرۆكی شارەوانی ئیستەنبوڵ دەستگیر کرا و دوای دوو جار دادگاییکردن، ئەمڕۆ بڕیاری زیندانیکردنی بۆ دەرچوو.
لەماوەی ئەو چوار رۆژی دەستگیرکردنەیدا ئیمامئۆغڵۆ دووجار لێپرسینەوەی لێکراوە و دادگایی کراوە، کە لە دادگاییەکاندا سەرجەم تۆمەتەکانی رەتکردووەتەوە.
بەرەبەیانی ئەمڕۆش داواكاری گشتی توركیا، بە تۆمەتی گەندەڵی و تیرۆر بەرەسمی داوای زیندانیكردنی ئەكرەم ئیمامئۆغڵو سەرۆكی گەورە شارەوانی دەستبەسەركراوی ئەستەنبوڵی كرد.
داواكاری گشتیی ئەستەنبوڵ هەفتەی رابردوو رایگەیاند، ئیمامئۆغڵو بە هۆی پەیوەندیی لەگەڵ رێكخراوێك كە تێوەگلاوە لە گەندەڵی، بەرتیلدان و پەرەپێدانی چالاكییە تیرۆریستییەكان، دەستگیر كراوە.
دوای دەستگیرکردنیشی خۆپیشاندان لە تورکیا دژی دەستگیرکردنی ئەکرەم ئیمامئۆغڵۆ سەرۆکی شارەوانی ئیستانبوڵ دەستی پێ کرد و خۆپیشاندانەکان هەر زوو فراوان بوون و گرژییان تێکەوت، بەجرۆێک تاوەکو ئێستا نزیکەی 400 کەس دەستگیر کراون.
دەستگیرکردنی ئیمامئۆغڵو لە کاتێکدایە، چاوەڕوان دەکرا ئەمڕۆ وەک کاندیدی رەسمی پارتی جەهەپە بۆ پۆستی سەرۆک کۆمار و رکابەری ئەردۆغان دیاری بکرێت، کە ئەمڕۆ دەنگدانەکە بەڕێوەچوو و وەک رکابەری ئەردۆغان کاندید کرا.
دەستگیرکردنی ئیمامئۆغڵو توڕەیی زۆری هاووڵاتیانی تورکیای لێکەوتووەتەوە و زۆربەیان پێیان وایە بابەتەکە سیاسییە و پەیوەندی بە هەوڵی درێژکردنەوەی وادەی سەرۆکایەتی ئەردۆغانەوە هەیە، بەهۆی ئەوەی لە ماوەی دوو خوولی سەرۆكایەتیدا، ئەكرەم ئیمام ئۆغڵۆ وەك ركابەرێكی سەرسەختی سیاسی ئەردۆغان لە توركیا دەركەوتووە.