سعودییە: مەرجی تەمەن بۆ هەموو وڵاتانی موسوڵمانە
03:39 - 25/03/2025
زەمەن:-
حەج و عومرەی عێراق ئاشکرایکرد، مەرجی سنوردارکردنی تەمەنی حاجیان لەلایەن سعودییەوە بۆ سەرجەم وڵاتانی موسوڵمانە.
ئەمڕۆ سێشەممە، ٢٥ی ئازاری ٢٠٢٥، دەستەی باڵای حەج و عومرەی عێراق، ڕاگەیەندراوێکی بڵاوکردەوە و ڕایگەیاند: ، لەماوەی رابردوودا سعودییە، هەمیشە کاری لەسەر گرنگیدان بە بەساڵاچووان کردووە لە پێدانی کورسییەکانی حەج خراونەتە پێشەوە بەڵام بڕیارەکەی ئەمدواییەی سعودیە، چاوەڕواننەکراو بووە و ناچارن بەگوێرەی یاسا پابەندی بڕیارەکە بن.
ئەمە لەکاتێکدایە، کەمتر لە هەفتەیەک لەمەوبەر، حەج و عومرەی سعودیە رایگەیاند؛ مەرجی تەمەن به‌سه‌ر حاجییاندا جێبه‌جێده‌كات و بەگوێرەی رێکارە نوێیەکان، لە هەموو عێراق تەنیا ٧٪ـی ئەو کەسانەی تەمەنیان سەروو ٧٠ ساڵە، دەتوانن حەج بکەن.
هاوکات، بەڕێوەبەرایەتیی گشتیی حەج و عومرەی هەرێمی کوردستان گوتی؛ ئەمساڵ لە هەرێمی کوردستان، لەکۆی ئەو کەسانەی تەمەنیان سەروو ٧٠ ساڵە، تەنیا ٣٥٨ ـیان دەتوانن حەج بکەن و ببنە حاجی و ئەوانی دیکە دواخستنی ناچارییان بۆ ده‌كرێت بۆ حه‌جی ٢٠٢٦.