سودانی و ئه‌حمه‌د شه‌رع په‌یوه‌ندی ته‌له‌فۆنیان ئه‌نجامدا؛ پیرۆزبایی جه‌ژنیان له یه‌كدی كرد
01:46 - 01/04/2025
زەمەن:-
محەمەد شیاع سودانی و ئەحمەد شەرع، پەیوەندییەکی تەلەفۆنیان ئەنجامدا و پیرۆزبایی جەژنی پیرۆزی ڕەمەزانیان لە یەکتری کرد.
ئەمڕۆ سێشەمە، ١ی گوڵانی ٢٠٢٥، نوسینگەی سه‌رۆك وه‌زیرانی عێراق ڕاگەیەندراوێکی بڵاوکردەوە و ڕایگەیاند: محه‌مه‌د شیاع سودانی، سه‌رۆك وه‌زیرانی عێراق و ئه‌حمه‌د شه‌رع، سه‌رۆك كۆماری سوریا بۆ قۆناغی ڕاگوزه‌ر په‌یوه‌ندی ته‌له‌فۆنیان ئه‌نجامدا و پیرۆزبایی جه‌ژنیان له یه‌كدی كرد، سودانی جەختی لەسەر هەڵوێستی پتەوی عێراق کردەوە بۆ وەستان لە پاڵ هەڵبژاردنەکانی گەلی سوریا و گرنگی پڕۆسەی سیاسی بە به‌شداری هەمو مەزهەب و پێکهاتەکانیەوە.
هەر لە ڕاگەیەندراوەکەدا ئاماژە بەوەشکراوە، سودانی بەبۆنەی پێکهێنانی حکومەتی نوێی سوریاوە هیوا و پیرۆزبایی خۆی ئاراستەی گەلی سوریا کرد و جەختی لەسەر هەڵوێستی نەگۆڕی عێراق کردەوە لە پاڵپشتی کردنی هەڵبژاردنەکانی گەلی سوریا و "گرنگە پڕۆسەی سیاسی هەمو پێکهاتەکان لەخۆبگرێت و یارمەتیدەر بێت بۆ پێکەوەژیانی ئاشتیانە و ئاسایشی کۆمەڵگە، لە پێناو ئایندەیەکی ئارام و سەقامگیردا بۆ سوریا و هەمو ناوچەکە".
ئەوەش هاتووە، سودانی جەختی لەوە کردەوە کە "عێراق دەستدرێژییەکانی قەوارەی زایۆنی بۆ سەر خاکی سوریا ڕەتدەکاتەوە و پشتیوانی لە یەکڕیزی و یەکپارچەیی خاکی سوریا و سەروەری دەکات لەگەڵ ڕەتکردنەوەی دەستێوەردانی دەرەکی، هەروەها گرنگی هاوکاری هاوبەش لە ڕوبەڕوبونەوەی هەڕەشەکانی داعش و هاوکاری لە بوارە ئابورییەکاندا، بە لەبەرچاوگرتنی دەرفەتی هاوبەش".