حەوت تێبینی خێرا لەسەر ئێستای عێراق
6/9/2022 9:07:00 PM
عادل باخەوان
1. لە چاوەڕوانی مەسیحێکدا لە خاچەکەی بێتەوە
خوارەوە و عێراق ڕزگاربکات و گوناهی کۆی دەستبژێرە عێراقیەکان هەڵبگرێت !
2. ئەم دوای نیوەڕۆیە سەماحەتی سەید موقتەدا سەدر،
جاڕی ئەوەی دا کە یاریکە لە کۆتایی نزیکبوەتەوە و گەنم گرد و جۆ بڵاو ! یان دەچێ بۆ
ئۆپۆزیسیۆن یان لە پەرلەمان دەکشێتەوە. ئەمەش عێراق دەخاتە بەردەم قەیرانێکی تەواو
گەورەوە. عێراقی سیاسی بەبێ موقتەدا هیچی پێناکرێ، بەڵام بە موقتەدا شەوە هەمیشە لە
قەیراندایە.
3. دوێنێ شەو درۆنێکی دیکە پەلاماری پایتەختی
دا. هەڕەشە ستراتیژیەکانی سەر هەرێم نەک کۆتاییان پێنەهاتوە، بەڵکو ڕۆژ لە دوای ڕۆژ
زیاتر دەبن.
4. دیجلە و فورات ڕۆژ لە دوای ڕۆژ ئاویان کەمدەبێتەوە
و هەزاران هەزار گوندنشین بەرەو شارەکان کۆچدەکەن، گەر هاوکێشەکە بەمشێوەیە بەردەوامبێت،
لە چەند ساڵی داهاتودا بەدەگەمەن شوێنێک دەمێنێت بۆئەوەی عێراقیەکان تیایدا بژین.
5. جێگری یەکەمی پەرلەمانی عێراق، حاکم زاملی،
هەڕەشە لە تورکیا و ئێران دەکات و دەڵێت، هەر وەک چۆن ئیسرائیلمان سزا دا، ئاواش ئێوە
سزا دەدەین گەر ملنەدەن بە داواکاریەکانمان. چ دنیایەکی سەیرە گوڵم ! عێراقیەکان هەر
ئەوەیان مابوو جەنگ دژی ئێران و تورکیاش ڕاگەیەنن !
6. حیزبە کوردوستانیەکان لە سەرۆکایەتی هەرێم کۆبوونەوە
و پێکەوە قسەیان کرد. ئەمە هەنگاوێکی باشە، چونکە جلە پیسەکان دەبێت تەنها لە ماڵەوە
بشۆین. بەڵام لەوەش گرنگتر، پێویستە پێناسەیەکمان بۆ ماڵەوە هەبێت. ماڵ کوێیە ؟ ماڵ
چیە ؟ ماڵ بۆ ؟ هەروەها پرسیارێکی دیکەی گرنگ ئەوەیە کە چی گرنگە ؟ بەرژوەندیەکانی
حیزب، یان بەرژەوەندیە باڵاکانی هاوڵاتیان لە هەرێمی کوردستاندا؟ بەرژەوەندیەکانی
حیزب، یان ئەمنی قەومی هەرێمی کوردستان ؟
7. دوێنێ خانمە جوانەکەی سەرۆکی پەرلەمانی عێراق
هەڵمەتی ناشتنی هەزاران نەمامی لە پارێزگاری ئەنبار دەستپێکرد. ئەمە کارێکی زۆر
باشە، بەڵام دەوڵەت بەم موبادەرە پەراوێزیانە ڕزگار ناکرێ. کەشتیەکە نقوم ئەبێ، یان
دەبێ هەمووی ڕزگارکەی یان هیچ!