نەوەی نوێ لەنێوان بەرداشی یەکێتی و پارتیدا
10/31/2024 8:00:00 PM
ئارام سەعید
سوپاس بۆدیداری میری کەزۆر زانیاری پێ بەخشین وبتوانین تێروانینێکی باشمان بۆ هاوکێشە سیاسیەکان هەبێت، لەو دیدارەدا مەسرور بارزانی وتی" قۆرخکاری نیە" و بافڵ تاڵەبانی وتی "قۆرخکاری هەیە"
ئەم دوو رستەیە پێمان دەڵیت پارتی تائێستاش سورە لەسەر ئەوەی حکومەتەکەی لەبەردەم ئاڵنگاریدایە بەلام دان نانێت بەوەی گەندەڵیی و قۆرخکاری هەبێت، یەکێتیش دانی پێدا دەنێت و وەک ئۆپۆزیسیۆن گوتارێکی رەخنەگرانەی هەیە. پرسیارەکە ئەوەیە کامیان دەتوانێت ئەم دۆخەی کوردستان باش بکات؟ ئینکاری یان دان پێدانان؟
رەنگە هاوڵاتی بپرسێت کە یەکێتی دان بەوەدا دەنێت ئەی بۆ لەناوچەی دەسەڵاتی خۆی ئەوکارە ناکات و کۆتایی بە قۆرخکاری و گەندەڵیی و کێشەکان بهێنێت؟ یەکێتی کەرەستەی مرۆیی و دامەزراوەیی هەیە بۆئەوەی گۆرانکاری لە سنوری زۆنی سەوز بکات بەڵام بۆ نایکات؟ یان دەیەوێت و ناتوانێت؟ لەوەش قورستر ئەوەیە یەکێتی ئەگەر دەستبەرداری دروشم و بەڵێنەکانی بێت لەهەڵبژاردنی ئایندە باجەکەی دەدات!
ئەم دوو تێروانینەی یەکێتی و پارتی پێمان دەڵێت پێکهێنانی حکومەت ئەرکێکی قورسەو پێناچیت ئەم دوو هێزە ئەم جارە بەئاسانی رێک بکەون، لێرەوە بەشێکی چارەسەری ئەو دۆخە بەندە بەهەڵوێستی سیاسی و تێروانینی نەوەی نوێوە کەهێزی سێهەمە و توانای گۆڕینی هاوکێشە سیاسیەکەی هەیە.
دەرئەنجام رۆڵی ئۆپۆزیسیۆن لەچارەسەر و گۆڕینی هاوکێشەکان ئێجگار گرنگ و هەستیارە بەتایبەتی نەوەی نوێ هێزی سێهەمە وتائێستا تێروانینێکی راشکاوانەی دەرنەبڕیوەو وەک یەکگرتوو و کۆمەڵ و هەڵوێست لەسەر بەشداری و بەشداری نەکردنی لەحوکمڕانیی کەبەشێکی پەیوەندی بەوە هەیە لەبەردەم بڕیاڕیکی قورسدان ونایانەوێت رووبەروی هەمان چارەنوس ببنەوە کەتوشی بزوتنەوەی گۆڕان بوو بەتایبەتی تائێستا توانیویانە دەست بەپێگەو قەبارەی خۆیانەوە بگرن.
گۆڕان لەنێوان ئەو دوو بەرداشەی یەکێتی و پارتی توشی شکستی گەورە بوو کەبەشێکی پەیوەندی بەوەوە هەبوو لەگەڵ پارتی رێک دەکەوت دژی یەکێتی و دواتر لەگەڵ یەکێتی دژی پارتی! وەرەقەکانی خۆی هەموی بەکارهێنا و سوتاندی، لەکاتێکدا لەرووی بەرنامەو توانای مرۆییەوە بەهێزبوو، دەرئەنجام هەربەرگەی سێ هەڵبژاردنی گرت و ئیتر داڕما.
لێرەوە نەوەی نوێ لەبەردەم تاقیکردنەوەیەکی مێژووییدایە کە بڕیار لەچی دەدات؟ لەهەڵبژاردنی چوارەمدا چی بەسەر دێت؟ وەرەقەکانی چۆن بەکاردەهێنێت؟ لەگەڵ کامیان رێک دەکەوێت دژی لایەنەکەی تر؟ یان ئایا هەردەتوانێت بەم شێوەیەی ئێستای بەردەوام بێت؟
مەرجەکانی چی دەبن بۆ چونە هەر هاوپەیمانێتیەک؟ لەکاتێکدا یەکێتی ئامادەیە سەرۆکی حکومەت کەسێکی تەکنۆکرات بێت و پارتی سورە لەسەر دانانەوەی مەسرور بارزانی بەسەرۆکی حکومەت، شاسوار عەبدولواحید چۆن دەروانێتە ئەم هاوکێشانە و زیرەکانە پێگەی نەوەی نوێ بەکار دەهێنیت و لەو ئاڵۆزیە قوتار دەبێت!
پرسیاری گرنگ ئەوەیە چۆن سەرۆکی جوڵانەوەی نەوەی نوێ هاوسەنگی هێز دەگۆڕێت بەبێ ئەوەی پێگەی جەماوەری خۆی لەدەست بدات؟