گەڕی دووەمی دەنگدان بۆ هەڵبژاردنی سەرۆکی نوێی پەرلەمانی عێراق کۆتاییهات
09:47 - 31/10/2024
زەمەن - عێراقى
گەڕی دووەمی دەنگدان بۆ هەڵبژاردنی سەرۆکی نوێی پەرلەمانی عێراق کۆتاییهات.
لە گەڕى دووەمى هەڵبژاردنى سەرۆکایەتى پەرلەمانى عێراقدا 269 ئەندام بەشداربوون، مەحمود مەشەهدانی، کاندیدى پارتی عەزم کە زۆربەی سونەکان، چوارچێوەی هەماهەنگى و فراکسیۆنە کوردستانییەکان پشتیوانی لێدەکەن رکابەرایەتیی سالم عیساوی، کاندیدى سەربەخۆ دەکات.
لە گەڕی یەکەمدا کە 271 پەرلەمانتار ئامادەی بوون، مەشهەدانی 153 دەنگ و عیساوی 95ـی بەدەستهێنان.
بە گوێرەی دەستوور و دادگای باڵای فیدڕالیی عێراق، بردنەوەی پۆستەکە پێویستی بە 50+1ـی دەنگی ئەندامانی پەرلەمانە، واتە 166 دەنگ. ئەگەرنا، لە گەڕی دووەمدا دەنگ لەسەر دوو براوەی زۆرترین دەنگ دەدرێت و هەر کامەیان 166 دەنگەکە بباتەوە، کورسیی سەرۆکایەتیی ئەنجوومەنی نوێنەرانی عێراق مسۆگەر دەکات.
کاندیدانى سەربەخۆ، تەڵال زەوبەعی بە سفر دەنگ و عامر عەبدولجەبار بە 9 دەنگ، لە گەڕی یەکەمدا شکستیان هێنا. 14 دەنگی پووچەڵیش هەبوون.