سودانى بڕیاریدا، دەبێت مووچەى کەرتى تایبەتیش تەوتین بکرێت
06:38 - 04/11/2024
زەمەن - عێراقى
بە مەبەستى کەمکردنەوەى پارەى کاش و رووکردنە پارەدانى ئەلیکترۆنى، محەمەد شیاع سودانى، سەرۆکوەزیرانى عێراق بڕیارێکى دەرکردووە کە دەبێت مووچەى کارمەندانى کەرتى تایبەتیش تەوتین بکرێت.
بەگوێرەى راگەیەندراوێکى نووسینگەى سەرۆکوەزیرانى عێراق، سودانى بڕیاریداوە تاوەکو تەمموزى ساڵى داهاتوو دەبێت پارەدانى کاش لە سەرجەم دامەزراوە حکومییەکان نەمێنێت و هەموو ببێتە ئەلیکترۆنى.
هەروەها سودانى بڕیاریداوە، تا مانگى تەمموزى ساڵى داهاتوو، هەژمارى بانکیى بۆ سەرجەم مووچەخۆرانى کەرتى تایبەت دروست بکرێت، فەرمانیشیکردووە، وەزارەت و سەرجەم دامەزراوە حکومییەکان لە وەرگرتنی باج و مامەڵەکانی دیکە دەستبەرداری پارەدانی کاش بن و پارەدانی ئەلیکترۆنی بەکاربهێنن.