مەرج بۆ بریکارەکانى دابەشکردنى بەشەخۆراکى مانگانە دادەنرێت و هەر هاووڵاتییەک 500 دینارى لێوەردەگیرێت
09:15 - 25/12/2024
زەمەن - کوردستانى
وەزارەتی بازرگانی عێراق مەرج بۆ بریکارەکانى دابەشکردنە بەشەخۆراکى مانگانە دادەنێت و دەڵێت، هەر هاووڵاتییەک دەبێت بڕى 500 دینارى لێوەربگیرێت.
كۆمپانیای دابەشكردنی خۆراكی سەر بە وەزارەتی بازرگانی عێراق رایگەیاندووە، پێداویستییە خۆراكییەكان بۆ ماوەیەكی زۆر لە كۆگاكان دەمێننەوە، بۆیە داواكارین لە هاووڵاتییان ئەوەیە كە وەریبگرن بۆ پاراستنی سەلامەتیی خۆیان، جەختیشی کردووەتەوە، پێویستە پاراستنی پاكوخاوێنی شوێنی بریكارەكان و بەكارهێنانی بالێت بۆ پاراستنی خۆراك بەكاربهێن.
کۆمپانیاکە راشیگەیاندووە، دەبێت بریكارەكان پابەندبن بەو نرخە فەرمییەی، كە بۆ پشكی هەر كەسێك دانراوە، كە بە بڕی 500 دینارە، هەر بریكارێك لەو بڕە پارە زیاتر لە هاووڵاتییان وەربگرێت، لێپێچینەوەی لەگەڵدا دەكرێت تا ئاستی لێسەندنەوەی بریكاری خۆراك و پێدانی بە كەسێكی تر.
وەزارتی بازرگانی عێراق دووپاتی کردووەتەوە، لە پابەندكردنی بریكارەكان كاتی كردنەوەی دوكانەكانیان و ڕێكخستنی كارتەكان لە خشتەی كەرەستەكاندا، نەفرۆشتنی سەبەتەی خۆراك و سەبەتەی تایبەت بە چاودێری كۆمەڵایەتی، ئەگەرنا لایەنە كەمتەرخەمەكان لە ڕووی یاساییەوە لێپرسینەوەیان لەگەڵ دەكرێت.