لە پێناو قەوارەی هەرێم پێویستە یاسای وەبەرهێنان هەڵبوەشێتەوە
6/4/2024 5:34:00 PM
بڵند دلێر شاوەیس
هەرچەندە ئەمە یەکەم
جار نییە و یەکەم پرۆژەی نیشتەجێبوون نییە لە بنار و شاخی گۆیژە، پرۆژەکانی نیشتەجێبوونی
بەرزاییەکانی قەیوان و شاری گۆیژە و گوندی ئەڵمانی و گاردن ستی و بەرزاییەکانی سلیمانی
و مایۆرکا ستی ...هتد نمونەی بەرچاون.
بەڵام ماوەیەکە
کارکردن بەمەبەستی دروستکردنی پرۆژەی نیشتەجێبوون لە شاخی گۆیژە ناڕەزایەتی و قسەو
باسێکی زۆری بەدوای خۆیدا هێناوە، تا ئەو ڕادەیەی بۆتە بابەتێکی ڕای گشتی.
زۆربەی ڕەخنەکانیش
بەو ئاڕاستەیە گوزارشتی لێدەکرێت کە ئەنجامدانی کاری بڕینی بناری گۆیژە و تەختکردنی
بەرزاییەکان و فراوانکردنی ناوچەی نیشتەجێبوونی هاوڵاتیان بە ئاڕاستەی شاخی گۆیژە
شێواندنی ئەو زنجیرە شاخەی لێدەکەوێتەوە کە لەگەڵ ئەزمڕدا ناسنامەن بۆ سلێمانی و سیما
و سروشتە جوانەکەی و هێمان بۆ خۆڕاگری دانیشتوانەکەی.
ڕەگ و ڕیشەی ناڕەزایەتییەکان
لەوەوە سەرچاوە دەگرێت ئەم پرۆژانە بۆ بەرژەوەندی گشتی و خزمەتکردنی هاوڵاتیان نییە
بەڵکو ڕێگایەکە بۆ دەستبەسەرداگرتنی موڵکی گشتی و دەوڵەمەندبوونی کەسانی دیاریکراو
لەسەر حسابی بەرژەوەندی گشتی، بە سود وەرگرتن لە یاسای وەبەرهێنانی ژمارە (٤ ی ساڵی
٢٠٠٦ْ) کە لە بنەڕەتدا مەبەست لە یاسای وەبەرهێنان دروستکردنی کەشێکی هاندەرە بۆ وەبەرهێنان
لەهەرێمی کوردستان و پێشکەشکردنی ئاسانکاری بۆ وەبەرهێنەران و کارپێکردنی سەرمایەی
نیشتمانی و بیانی و ڕەخساندنی هەلی کار بە شێوەیەک کاریگەری ئەرێنی هەبێت لە
بوژاندنەوەی ئابوری.
جێگای سەرنجە پرۆژەکانی وەبەرهێنان لە ڕێگای خراپ بەکار هێنانی
ئەم یاسایە سەرچاوەیەکە بۆ گەندەڵی و ڕەوایەتیدان بۆ بەھەدەردانی موڵکی گشتی بە بەخشین
و پێدانی زەوی دەوڵت بە کەسانێک بێ بەرامبەر و زیان گەیاندن بە گەنجینەی وڵات لە ڕێگای
پێشکەشکردنی خزمەتگوزاریەکان و لێخۆشبوون لە باج و رەسم لە ژێر ناوی یاسا !.
بەداخەوە بە ھۆی
پاشماوەی دوو ئیدارەیی و ململانێی سیاسی، ھیچ پرۆژەیەکی وەبەرھێنان مۆڵەتی پێنادرێت
گەر پشکی یەکێک لە حزبە دەسەڵاتدارەکانی تێدا نەبێت و یەکێک لە دەستەبژێری سیاسی
سپۆنسەری نەکات.
هەرچەندە وەبەرھێنان
بوارەکانی پیشەسازی، کشتوکاڵ، گەشتوگوزار، تەندروستی، تەکنەلۆجی، بازاری بازرگانیە
سەردەمیەکان و فیرکردن و...ھتد دەگرێتەوە، ئەوەی جێی سەرنجە زۆرترین ڕێژەی وەبەرھێنان
لە بواری نیشتەجێبووندا ئەنجامدراوە ئەویش بەھۆی ئاسان دابینکردنی زەوی گونجاو و کەمی
تێچوی و خێرایی فرۆشتنی یەکەکان و دەستکەوتنی قازانجی دارایی و سودی ڕاستەوخۆ بە
ماوەیەکی کورت.
بە ھۆی بەستنەوەی
مۆڵەتی پرۆژەکانی وەبەرھێنان بە ڕەزامەندی زۆرێک لە وەزارەت و دامەزراوە پەیوەنددارەکان،
زۆرترین ڕێژەی گەندەڵی تیایدا ئەنجام دەدرێت لە بەرامبەر زوو ڕایی کردنی مامەڵەکانی
پەیوەست بە مۆڵەتەکە و پێشکەشکردنی ئاسانکاری بۆ پێدانی مۆڵەتی پرۆژەی وەبەرھێنانەکە.
ئەم یاسایە هۆکارێکە
بۆ زیان گەیاندن بە کەرتی کشتوکاڵ و زەوی کشتوکاڵی لە ڕێگای گۆڕینی ڕەگەزی موڵکە
کشتوکاڵیەکان بۆ موڵکی نیشتەجێبوون، جگە لە ئەنجامدانی پرۆژەکانی وەبەرھێنان لەسەر
زەوی تەرخانکراو بۆ خزمەتگوزاریە گشتیەکان.
یاسای وەبەرھێنان
زۆر بە ڕوونی ئاویتەبوونی دەسەڵات و سەرمایە پیشان دەدات، نیشانەیەکی ئاشکرایە بۆ
دەستبەسەرداگرتنی موڵک و سامانی گشتی لەلایەن دەستەبژێری سیاسییەوە لەژێر پەردەی یاسادا،
لەئەنجامدا گروپ و دەستەی بەرژەوەند خواز و تێھەڵکیش دروست دەکات لە سیاسی و خاوەن
سەرمایە و ڕێژەی گەندەڵی بەرز دەکاتەوە و ماف و ئازادیەکان بەرتەسک دەبنەوە و سیستەمی
حوکمڕانی بەرەو تاک ڕەوی دەبات، دادی کۆمەڵایەتی ناھێڵێت و جیاوازی چینایەتی قوڵ دەکاتەوە،
ئابوری ھەرەس پێدێنێت و بێکاری بڵاودەبێتەوە و ڕێژەی تاوان لە کۆمەڵگادا زیاد دەکات
و متمانەی ھاوڵاتی بە حکومەت ناھێڵێت...ھتد، کە دەبنە ھۆی ناجێگیربوونی سیاسی و کۆمەڵایەتی
و ئابوری و دواجار ھەرەس ھێنانی قەوارەی ھەرێم.