دەم پارتى کاتى سەردانى شاندەکەى بۆلاى دەمیرتاش راگەیاند
09:38 - 08/01/2025
زەمەن - کوردستانى
نووسینگەی راگەیاندنی پارتی یەکسانی و دیمکوراسیی گەلان (دەم پارتی) رایگەیاند، رۆژى شەممەى داهاتوو، شاندەکەیان سەردانى گرتووخانەى ئەدرنە دەکەن و لەگەڵ سەڵاحەدین دەمیرتاش کۆدەبنەوە.
بەگوێرەى راگەیەندراوەکەى نووسینگەى دەم پارتى، شاندەکەی ئیمراڵی، رۆژی شەممەی هەفتەی داهاتوو، 11ـی کانوونی دووەم، سەردانی سەڵاحەدین دەمیرتاش، هاوسەرۆکی پێشووتری هەدەپە دەکەن.
هەر بە گوێرەی راگەیێندراوی نووسینگەکە، رۆژی دواتر شاندەکە سەردانی گرتووخانەی کاندرا لە پارێزگەی کۆجائەلیی تورکیا دەکات و لەگەڵ فیگەن یوکسەکداغ، هاوسەرۆکی پێشووتری هەدەپە کۆدەبێتەوە.
شاندەکە دوای دەمیرتاش و یوکسەکداغ، دووبارە دەچێتەوە ئیمراڵی و لەگەڵ عەبدوڵڵا ئۆجەلان کۆدەبێتەوە.