كۆدەكانی بەرەنگاربوونەوە بۆ دەرنەچوون بەسەركردایەتیی!
12/30/2019 4:58:00 PM
نیاز سه‌عید عه‌لی
لە دوایین كۆنگرەی
(ی ن ك) ، (بەندە) یەكێك بووم لە پاڵێوراوەكان ، لەگەڵ ئەوەی ژمارەیەك لە هەڤاڵانی
ئەندامی كۆنگرەو دەرەوەی كۆنگرە، جەختیان لەوە ئەكردەوە، كە من نەك هەر دەرئەچم ،
بەڵكو لەو دەرچووانەی بازنەی سلێمانی ئەبم، كە دەنگێكی بەرچاو بەدەستئەهێنم، بەڵام
من گەشبین نەبووم و ڕاشكاوانە بە هەندێكیانم ئەووت؛ مەرج نییە ئەنجامەكە بەو جۆرە
بێت كە ئێوە باسی ئەكەن ، چونكە ترس و گوومانم لە دەركەوتنی ئەنجامی شۆك و سوپرایز
هەبوو؛ دوور لە خواستی ئێمەمانان، نەك لەسەر ئەوەی كە دەنگی دەرچوون ناهێنم ، بەڵكو
لەسەر ئەو بنەمایەی كە ئیرادەی دەرنەچوون بۆ (بەندە)و چەندین پاڵێوراوی تر ؛ لەلایەن
(جەمسەرەكان!!) لەئارا بوو ، ئەویش لەبەر ناپەسەندییم و ڕەتكردنەوەم ؛ لەلایەن زۆرینەی
جەمسەرەكان ؛ كە پێكەوە بەشداربوون ؛ لە داڕشتنی لیستێكی تەوافووقی مەركەزیی تۆكمەی
پێشوەختی كۆنگرە ؛ بۆ سەرلەنوێ دابەشكردنەوەی پلەو پۆستەكان ، بەسەر خۆیان و ئەو
پاڵێوراوانەی تر ، كە مەبەستیان بوو ،
هاوكات پێشبینیی ئابڵۆقەدان و بەرەنگاربوونەوەشم ئەكرد ، لە بەدەستهێنانی دەنگی كەمتر
؛ لە دەنگی دەرچوون .
(بەندە)و بەشێك
لە پاڵێوراوەكانی تریش ؛ بۆ دۆزینەوەی هۆكاری ڕاستەقینەی دەرنەچوون، پێویستە هەڵسەنگاندن
بۆ ڕەوشی تایبەتیی خۆمان بكەین ، هۆكارە نادیارو هۆكارە كاریگەرەكانی پەیوەست بە
ناپەسەندیی و ڕەتكردنەوەمان لەلایەن جەمسەرەكان دەستنیشان بكەین ، پێویستە بەوردیی
بگەڕێینەوە بۆ باكگراوەندو تایبەتمەندییەكانی خۆمان ؛ لەڕووی پرانسیپ و دیدو بڕواو كردەوەو بەهاو ڕێبازی كاركردن و خەسڵەتەكانی كەسایەتیی، هەروەها جیاوازیی هەڵوێست
و ناكۆكیی و ململانێكانیش ؛ نادیدە نەكەین و بیهێنینە پێش چاوی خۆمان ، دەرەنجام ڕوون
ئەبێتەوە چی بووەتە هۆی دروستبوونی جیاوازیی
گەورەو لێكدابڕان و نەمانی متمانە بەئێمەمانان .
لەم سۆنگەیەوە ئەتوانم
بڵێم ؛ هۆكاری سەرەكیی نەویستن و ڕەتكردنەوەو بێ متمانەیی زۆرینەی جەمسەرە دەستڕۆیشتووەكان بۆ ئێمەمانان ؛ پەیوەستە بە بوونی دوو باكگراوەندی
جیاواز ، ئەگەر ئەو هەموو جیاوازییە هەبێت ، ئیتر چۆن ئەوان ئەهێڵن ؛ بۆ بەرێوەبردن
و سەركردایەتییكردنی یەكێتیی ، ئێمە ببینە هاوشان و هاوبەش و هاوتەریب لەگەڵ ئەوان ، بەدڵنیایی ئەوان پشتیوانیی لە كەسانی
متمانەدار ؛ لەسەر بنەمای مەرج و خەسڵەتەكانی خۆیان ئەكەن ، هەربۆیە هەمیشە لەو جۆرە
هەڵبژاردنانەدا ؛ ئەنجامی شۆك و سوپرایزی تێ ئەكەوێت ، یەكێك لەو ئەنجامانەش بریتییە
لە دەرچوونی ڕێژەیەكی بەرچاو؛ لەو پاڵێوراوانەی كە لەسەر مەیل و ئاراستەی ئەوانن و
لەگەڵیاندا هەست بەدڵنیایی و ئارامیی ئەكەن.
(كۆدەكانی بەرەنگاربوونەوە !!)
١-لەگەڵ ئەوەی كە (ی ن ك)م ؛ بەهێزی سیاسیی
هەڵبژێردراوی خۆم زانیوەو خزمەتی رێبازو ئامانجەكانیم كردووە ، لەگەڵ ئەوەشدا هەمیشە
خاوەنی بیربۆچوون و هەڵوێستی جیاوازی خۆم بووم ؛ ئەو كاتەی كە پێویستی كردبێت ، لە
میدیا ، یان لەناو (ی ن ك) ، بە میكانیزمەی جیاجیا دەرمبڕیوە ، چەندین جار ئەم جیاوازییە
لای بەشێك لە سەركردەكانی (ی ن ك) ، پەسەند نەبووەو جێی پرسیارو گوومان بووە .
٢-هیچ كات كارم بە دەستەگەریی نەبووە ،
دژی بووم و بەرەنگاریی بوومەتەوە ، ئەگەر بمویستایە ئەمتوانی بە پشتبەستن بە دەرچووانی
خولەكانی پەیمانگەی كادیران ؛ كارم بۆ دەستەگەریی بكردایە ، ئەگەر هەر هەڤاڵێكی دەرچووی پەیمانگەی كادیران ؛ پێچەوانەی ئەمە زانیاریی لایە ، وەڵامم بداتەوە ، بەپێچەوانەوە
(بەندە) لەسەر رێنمایی كاریزمای نەمر مام جەلال ؛ هەمیشە دژی دیاردەی دەستەگەریی و
گرووپ ؛ كادیرانمان پەروەردە ئەكرد ، بەردەوام ئەنجام و لێكەوتەو زیانەكانی دیاردەی
دەستەگەرییمان بۆ ڕوون ئەكردنەوە ، لەم سۆنگەیەوە ؛ خودی خۆم و پەیمانگەی كادیران
؛ كەوتبووینە بەر جامی تووڕەیی و كاردانەوەی توندی بەشێك لە هەڤاڵانی دەستەگەریی لەناو
(ی ن ك) ، چونكە ئەیانزانی لە پەیمانگەی كادیران ؛ كادر لەدژی دەستەگەریی پەروەردە
ئەكرێت ، ڕەنگە بەلاتانەوە شۆك و سەیر بێت
؛ لە سەرەتای ساڵی (٢٠١٣)ەوە ، لەكاتێكدا خواستی بەشدارییكردن لە خولەكانی پەیمانگە
؛ ئێجگار زۆر بوو ، كەچی لەلایەن مەكتەبی ڕێكخستنەوە ، ڕێگریی كراوە لە كردنەوەی
خول لە پەیمانگەی كادیران و لە (٧) ساڵی ڕابردوودا ، تەنها (١) خولیش نەكراوەتەوە
، هەموو ئۆرگانە باڵاكانی (ی ن ك)یشمان ئاگاداركردۆتەوە ، بەداخەوە هیچ بەدواداچوونێكیان
بۆ ئەم كێشەیە نەكردووە ، (بەندە) چەندین دۆكیۆمێنتم لەم بارەیەوە ئامادە كردبوو ؛
تا لە كۆنگرە ئەم كێشەیە بخەمە ڕوو ، بەڵام بەهۆی كەمیی ماوەی كۆنگرە ، ئەو دەرفەتە
نەڕەخسا ، هەوڵ ئەدەم لە وتارێكی تردا بە دۆكیۆمێنت ، وردەكاریی ئەم خاڵە بخەمەڕوو
، لەكاتێكدا لەو (٧) ساڵەدا ئەتواندرا ؛ زیاتر لە (٢٠٠٠) كادیر ، دەیان خولی بنەڕەتیی
و ڕووناكبیریی و پسپۆرییان لە پەیمانگە تەواو بكردایە .
٣-(بەندە) لەلایەن بەشێك لە
سەركردەكان بە هاوسۆزو لایەنگری (گۆڕان) لەقەڵەم دراوم ، بۆیە بەردەوام تووشی
گووشارو فشارو بەرەنگاربوونەوە بوومەتەوەو
كاریان بۆ تەنگ پێهەڵچنینم كردووە ، ئەمەش لەوەوە سەرچاوەی گرتووە ؛ كە بۆچوون و تێگەیشتنم
، لەسەر شێوازی بەرێوەبردنی ناكۆكیی و ململانێ ناوخۆییەكانی ناو (ی ن ك) ؛ پێش جیابوونەوەی
(گۆڕان) ، جیاوازتر بووە لە لێكدانەوەی بەشێك لە سەركردەكانی تر ، لەم ڕووەوە ڕووبەڕووی
ئەو ڕەخنەیە ئەبوومەوە ، بۆچی لە دژی ئەو جیابوونەوەیە ڕەخنەم نییە، لەكاتێكدا ڕەخنەم
لە هەردوو لا هەبوو ، بەڵام پێموابوو ؛ شەڕی
ڕاگەیاندن ئەوەندەی خزمەتی دامركانەوەی ئاستی ڕقی بەرزی هەندێك هەڤاڵی سەركردایەتیی
( ی ن ك) ئەكات ، ئەوەندە خزمەت بە ڕەوشی گشتیی و پرۆسەی سیاسیی (ی ن ك) و باری
ئاسایشیی گشتیی دەڤەری سەوز ناكات ، بەتایبەتیی كە ئەگەری شڵەقانی دۆخ و تەقینەوەو
پێكدادانی توند هەبوو لە نێوان (ی ن ك)و (گۆڕان)دا ، من بە ئێستاشەوە باوەرم بەیەكگرتنەوە
، یان هەماهەنگیی و دروستكردنی هاوپەیمانییەكی تۆكمەو بەهێز ؛ لەنێوانیاندا هەبووە هەیە، (بەندە) بۆ هێنانەدی
ئەو ئاواتە هەوڵی خۆم داوە ، لەم سۆنگەیەوە باسی ئەزموونێكی خۆم ئەكەم لەدوایین
ساتەكانی ساڵی (٢٠١٠) ، ئەو كاتەی ڕۆژی هەینیی (٣١/١٢/٢٠١٠) ، بە دیداری تایبەتیی
و دووقۆڵیی ڕەوانشاد و سەركردەی نەمر مام جەلال شاد بووم ، پاش ئەوەی كە ڕاپۆرتێكم
بۆ ناردبوو ، دوای گەیشتنی ڕاپۆرتەكە لەسەر داوای خۆی ؛ بە دیداری شاد بووم ، لەو
دیدارەدا پشتیوانیی خۆی بۆ ناوەرۆكی ڕاپۆرتەكەو دروستكردنی هاوپەیمانیی لەگەڵ (گۆڕان)
دەربڕی ، تەنانەت وتی گەیشتوومەتە ئەو بڕوایەی كە یەكگرتنەوەش زۆر پێویستە بۆ دوای
هاوپەیمانیی ، پاشان لەسەر داوای خۆی ؛ بەدەستی خۆم ئەو ڕاپۆرتەم برد بۆ هەڤاڵانی
دەستەی كارگێری (م.س)و دواتر نێردرا بۆ ژمارەیەكی تر لە هەڤاڵانی (م.س) ، بەڕاستیی
من سڵم كردەوە ، لە گەیشتنی ئەو ڕاپۆرتە بۆ هەڤاڵانی (م.س) ،چونكە من بۆ ئەوانم نەنووسیبوو
، بەتایبەتیی بۆ رەوانشاد مام جەلالم نووسیبوو ، ئەو ترس و نیگەرانیی لە دەموچاوی مندا خوێندەوە و لەگەڵ دوا ماڵئاواییدا پێی
وتم ؛ ئەزانم لە چی ئەترسیت ، دڵنیابە هەتا مام جەلال ما بێت ؛ كەس ناتوانێت زەفەرت
پێ بەرێت ، شایەنی باسە یەكێك لە سكرتێرەكانی مامی نەمر ؛ گوێبیستی ئەم گفتوگۆیەی كۆتایی نێوانمان بوو !!
سەبارەت بە(گۆڕان)
؛ خوێندنەوەو لێكدانەوەم بە ئێستاشەوە ، لەوەدا چر ئەكەمەوە كە ئەو جیابوونەوەیە ؛
باكگراوەندێكی مێژوویی هەبوو ، زیاتر لە ناكۆكیی تایبەتیی و میتۆدی كاركردنی جیاوازەوە
ئیلهامی وەرگرتبوو ، نەك ناكۆكیی فكریی و سیاسیی قووڵ ، زۆر دژی جیابوونەوەكە بووم
، ئۆباڵی ئەنجامە خراپ و زیانبەخشەكانی ئەو جیابوونەوەیەش ؛ ئەخەمە ئەستۆی سەركردایەتیی
هەردوو لا ، بەتایبەتیی كە ئەو جیابوونەوەیە بووە هۆكاری سەرەكیی گۆڕینی هاوسەنگیی
هێز ؛ بە بەرژەوەندیی (پارتی) ، پاش جیابوونەوەكە هەموو درك بە هاوكێشەو دەرهاویشتەو
لێكەوتەو دەرەنجامە خراپەكانی ئەو گۆڕینی هاوسەنگیی هێزە ئەكەین ، كە (ی ن ك)و (گۆڕان)
تیایدا ؛ كەمایەتیین لەبەرامبەر ڕكابەرە كلاسیكییەكەیاندا ، هەردوو لا لەبری دەستپێشخەریی
و هەنگاونان بۆ نزیكبوونەوە لە یەكتر ؛ زیاتر
لەیەكتر دوور ئەكەونەوە ، هەردوو لا بە دیار
وەرینی گەڵا بە گەڵای ئەو درەختە گەورەیەی
جاران و قەدێكی گەورەی ئەو درەختەوە دانیشتوون ؛ كە لەساڵی (١٩٧٥)ەوە ، نەمامێك
بوو ، بە ڕووبارێك خوێن ئاودراو نەشونمایكردو پەلوپۆی هاویشت ، بەڵام لەهەرەتی قەدو
باڵاكردندا ؛ بەهۆی ناكۆكیی دەروونیی و ململانێ ناڕەواكان و بەهۆی گەندەڵیی و خراپ
بەكارهێنانی دەسەڵات و كاركردن بۆ خەم و بەرژەوەندییە تایبەتییەكان و لادان لە ڕێبازو
ئامانجی (ی ن ك) و ڕێبازی مامی نەمر ، لەلایەك
ئەم درەختە ؛ لە نەشونما كەوت و قەدێكی گەورەی لێ بڕایەوە ، لەلایەكی تریش ؛ ئەوەی
كە ماوەتەوە ، دیسان بەهۆی ناكۆكیی و ململانێی تر و بەهۆی درێژەدان بە لادان لە ڕێبازو
ئامانجە ڕاستەقینەكان ؛ ئەو بەشەی كە ماوە ؛ ئەویش مەترسیی خەزانی لەسەرە !! .
لەناو (ی ن ك)دا
؛ ئاراستەیەكی دەسترۆیشتووی توند ؛ لەدژی نزیكبوونەوەی (ی ن ك)و (گۆڕان) هەبوو ، كەسانی
دەستڕۆیشتووی ناو ئەو ئاراستەیە ؛ ئێمەمانانیان
بە تابووری (گۆڕان) لەقەڵەم ئەدا ، باش بوو (گۆران) ؛ پارتی فەرمانڕەواو خاوەن دۆسیەی
نەوت نەبوو ، ئەگینا ئەو ئاراستەیە ؛ بەوەرگرتنی پارەو ئیمتیازی نەوتیش تاوانباری
ئەكردین !!.
شایەنی باسە (بەندە)
بۆ پشتگیرییكردن ، لەو ڕێككەوتننامەیەی كە ڕۆژی (١٧/٥/٢٠١٦) لە نێوان (ی ن ك)و (گۆڕان)دا
، بە ئامادەبوونی هەردوو ڕەوانشادو سەركردەی نەمر (مام جەلال و نەوشیروان مستەفا)
ئیمزاكرا ، وتارێكم بەناوونیشانی (یەكێتیی و گۆڕان .... هەنگاوێكی مەزن و هیوایەكی
مەزنتر) ، لەژمارە (٦٩٧٥)ی ڕۆژی (١٩/٥/٢٠١٩) ی ڕۆژنامەی (كوردستانی نوێ)دا بڵاوكردەوە .
٤-بەهۆی نووسینی چەندین وتاری ڕەخنەیی لەسەر
؛ وتار و هەڵوێست ، كاری میدیایی و سۆشیال میدیایی ، پرۆژەو كاری بزنسی (شاسوار عەبدولواحید)
، تووشی كاردانەوەی خراپ و وەرگرتن و گەیشتنی چەندین پەیامی بێزاریی و ڕقاویی هەندێك
لە لێپرسراوی دەستڕۆیشتووی سیاسیی بزنسمانی پشتی پەردە بوومەتەوە ، چونكە لەلای ئەوان
؛ وا لێكدراوەتەوە كە لە پشتی (شاسوار عەبدولواحید)ەوە ، (بەندە) ئەوانی كردۆتە ئامانج ، ئەمانیش بە مافی خۆیانی ئەزانن ، لە كاتی گونجاوو هەستیاردا ؛ كار بۆ تەنگ
پێهەڵچنینی (بەندە) بكەن !
٥-پێش دەستپێكردنی چوارەمین كۆنگرەی (ی ن
ك) ؛ (بەندە) دوو وتارم لەژمارەیەك لە ماڵپەڕە بەربڵاوەكانی (شار ، وێستگە ، سپی میدیا
، ئاوێنە ، میللەت پرێس )و تۆڕی كۆمەڵایەتیی فەیسبووكدا بڵاوكردەوە ، ئەویش بۆ
ئامانجی خزمەتكردنی ئاراستەی نوێبوونەوەی (ی ن ك)و سەركردایەتییەكەی ؛ كە ئاراستەیەكی
ڕادیكاڵ و زۆرینە بوو ، لە بەرامبەر ئاراستەی موحافزكاری دەسەڵاتداری ناو (ی ن ك)
، ئەفسووس لە ناو كۆنگرەداو لە دەرەنجامدا
؛ ئەم ئاراستەیە بووە قووربانی تەوافووقێكی تۆكمەو مەركەزیی ، هەروەها ڕۆژێك بەر لەدەستپێكردنی
پرۆسەی دەنگدان بۆ هەڵبژاردنی سەركردایەتیی ، وتووێژێكی كوورتی تەلەڤزیۆنییم لە سەتەلایتی (GK) ئەنجامدا ، لەو وتووێژەشدا ؛ جەختم لەسەر
پێویستیی گۆڕینی زۆرینەی سەركردایەتیی (ی ن ك) كردۆتەوەو بانگەشەم بۆ نوێبوونەوەی
سەركردایەتیی كردووەو بەبەرپرسیارم زانیون ؛ لە هەموو ئەو شكست و كێشەو گرفت و
داكشانانەی كە بەسەر (ی ن ك)دا هاتووەو بەدەق پێموتن ؛ (چۆن ئێوە لە تەمەنی بیست
ساڵەكاندا بوونە ئەندامی سەركردایەتیی و م.س ؛ ئەبێت ئێوەش ئامادە بن بەسنگێكی
فراوان ، ڕێ بە نەوەیەكی جیاوازتر بدەن ؛ بۆ وەرگرتنی ئەو بەرپرسیارێتییە لەئێوە)
، بانگەشەی (بەندە) بۆ نوێبوونەوەی سەركردایەتیی ؛ بووە هۆی دروستبوونی بێ متمانەیی
و نیگەرانیی و بێزاریی لای بەشێكی بەرچاو لە سەركردەكان ، لەبەرامبەرم .
٦-لەناو كۆنگرەدا ؛ ململانێیەكی تازەی
شاراوە هەبوو ، بۆ كردنە ئامانجی ئەو پاڵێوراوانەی كە لەسەر یەكێك لەجەمسەرەكان ئەژمار
ئەكران ، یان بە نزیك لێی لەقەڵەم ئەدران ، لەلایەن جەمسەرێكی تر ، لەو بەئامانجگرتنەدا
؛ (بەندە)و چەندین پاڵێوراوی تر ، فۆكسی بەرەنگاربوونەوە لەدژمان خرایەگەڕ !
سەرەڕای بوونی ئەو
كۆدانەی بەرەنگاربوونەوە ؛ بەپشتیوانی ژمارەیەكی بەرچاو لە دەنگدەران ؛ توانیم
(٢٣٠) دەنگ بەدەستبهێنم و لەناو (١١٣) پاڵێوراوی بازنەی سلێمانییدا ، ببم بەزنجیرەی
سییەمین لەناو پاڵێوراوەكاندا ، لە كاتێكدا تاكو زنجیرەی (٢٣) ؛ بوونە ئەندامی سەركردایەتی
.