وتاری لیژنەی ئامادەکاری سێیەمین کۆنفرانسی نیشتیمانی گۆڕان
02:55 - 05/04/2025
زەمەن - کوردستانی
بە ناوی خودای گەورە و میهرەبان
بەڕێزان ئەندامانی سێیەمین کۆنفرانسی نیشتیمانی بزوتنەوەی گۆڕان بەیانیتان باش..
بە ناوی خودای گەورە و ئێوەی ئەندامانی کۆنفرانسەوە، ئەمڕۆ بەرواری ٥ ی ٤ ی ٢٠٢٥، بە دروشمی (هاونیشتیمانی، دەستور، دیموکراسی) کارەکانی سێیەمین کۆنفرانسی نیشتیمانی بزوتنەوەی گۆڕان دەست پێدەکەین.
سەرەتا ئەبێت لەوێوە دەستپێبکەین کە بزوتنەوەی گۆڕان ئەو جوڵانەوە سیاسی و کۆمەڵایەتییە کە لە قوڵایی کێشە و ئاڵنگارییە سیاسی و ئابوریی و کۆمەڵایەتی و فەرهەنگیەکانی کۆمەڵگای کوردیەوە دروستبوە. ئامانجی دامەزراندنی ئەم بزوتنەوەیە بۆ ئەوەبو کە نوێنەرایەتییەکی ڕاستەقینەی ماف و خەون و ئازارەکانی هاونیشتیمانی هەرێمی کوردستان بکات لە پڕۆسەی سیاسی لەسەر ئاستی هەرێم و عێراقی فیدڕاڵ.
بڕوای سیاسی ئەم بزوتنەوەیە ئەوەیە کە پایەکانی پتەوکردنی هەرێمی کوردستان یاخود دامەزراندنی دەوڵەتێکی بەهێز پێویستە لە ناوەوەی هەرێم و لەسەر بنەماکانی وەک حوکمی یاسا، بەشداری سیاسی، شەفافیەت و دادپەوەری سیاسی و ئابوری، دەستاودەستکردنی دەسەڵات، هاونیشتیمانیبون و ئازادی ڕادەربڕین و بونی سوپا و دامەزراوەی نیشتیمانیە.
بۆ ئەوەی ئەم کۆنفرانسە بە ئاراستەیەکی دروستدا بڕوات، ئەبێت ئەمڕۆ دان بەو ڕاستە تاڵەدا بنێین کە لە چەند ساڵی رابردوودا، بزوتنەوەی گۆڕان رووبەڕووی ئاڵنگاری و قەیرانی جدی ناوخۆیی و دەرەکی بۆتەوە. بەشی سەرەکی ئەم قەیرانانە لە ئەنجامی وەلانان و گۆڕینەوە بەرنامەی سیاسی و چاکەی گشتی بە بەرنامە و خەمی شەخسی بوە، لە ئەنجامی پێشێلکردنی دەستوری ناوخۆیی و بنەماکانی دیموکراسی و رێزنەگرتن لە ئیرادەی گۆڕانخوازان و هەڵسوڕاوان و پشتگوێخستنی هەڵبژاردنی ناوخۆییەکانەوە بوە.
بەستنی کۆنفرانسی نیشتیمانی بۆ گۆڕان، پێویستیەکی یاسایی و دیموکراسی و ئیلزامیە. لە مانگی ١١ی ساڵی ٢٠١٧ وە، گۆڕان وەک پارتێکی سیاسی لە کۆمسیۆنی باڵای سەربەخۆی هەڵبژاردنەکانی عێراق تۆمار کراوە، وە لەسەر بنەمای یاسای پارتە سیاسیەکانی عێراق، پێویست بوو لە ماوەی ٨ ساڵی ڕابردودا، گۆڕان کۆنگرەی دامەزراندن ببەستێ.
لە کاتێکدا، پار ساڵ و لە مانگی ١دا، هەر لێرە دووەمین کۆنفرانسی نیشتیمانیمان ئەنجامدا، بەڵام بەداخەوە لەبەر دابەشبون و گرفتە ناوخۆییەکان، نەمانتوانی پەیکەری سەرکردایەتکردنی بزوتنەوەکە بەجۆرێک دابڕێژینەوە کە بگونجێت لەگەڵ یاسای پارتە سیاسیەکانی عێراقدا. هەر بۆیە دوای گۆڕینەوەی چەندین کتابی فەرمی لە نێوان نوێنەرانی بزوتنەوەی گۆڕان و کۆمیسیۆنی باڵای سەربەخۆی هەڵبژاردنەکانی عێراق، لە بەرواری ٢٦ ی ٣ و بە کتابی ژمارە (ش.ح\خ ٨٧٥) کۆمیسیۆنی باڵا، ڕەزامەندیدا بە بەستنی سێیەمین کۆنفرانسی نیشتیمانی بزوتنەوەی گۆڕان لە بەرواری ٥ ی ٤ ی ٢٠٢٥ بۆ جێبەجێکردنی مەرج و پێداویستیە قانونیەکانی کۆمیسیۆن پاڵپشت بە یاسای پارتە سیاسیەکانی عێراق.
بۆ جێبەجێکردنی ئەم داواکاریە یاساییە، لە چەند مانگی ڕابردودا، لیژنەی باڵای ئامادەکاری بۆ سێیەمین کۆنفرانسی نیشتیمانی بە بڕیاری جڤاتی نیشتیمانی دروستکرا، و زۆر بە دڵسۆزی و لێنەبڕاوانە، بە کاتێکی کەم و ئەرکێکی زۆر، سەرجەم راپۆرتی هەڵسەنگاندنی ڕێکخراوەیی و دەستوری ناوخۆی و بەرنامەی سیاسی و پلاتفۆڕمی هەڵبژاردنەکان ئامادە کراون تا ئێوەی بەڕێز بیبین و پەسەندنی بکەن.
بەڕێزان، ئێمە ئەمڕۆ نیگەرانی ئەو دۆخە ناوخۆییەی بزوتنەوەی گۆڕانین، وەک چۆن لە ڕابردودا، بڕوامان بە ئاشتەوایی و پێکەوەکاردن بوە لەسەر بنەمانی ڕێزگرتن لە دەستوری ناوخۆیی و بەرنامەی سیاسی، ئێستا و سبەینێش دەرگامان بۆ هاوڕێکانمان کراوەیە کە بە هەر هۆکارێک بێت، ئەمڕۆ لەگەڵمان نین. ئێمە هەمیشە بە ویژدانێکی زیندوەوە سەیری مێژوی پێکەوە کارکردنمان ئەکەین لەگەڵ ئەو هاوڕێیانەماندا، ئەزانین بەشێکی زۆری ئەوانیش ماندوبون و قوربانی زۆریان داوە، بۆیە هیوادارین دەرئەنجامی ئەم کۆنفرانسە ببێتە سەرەتای کۆتاییهێنان بە خۆخۆری سیاسی و دروستکردنەوەی متمانەی پێکەوەکارکردن.
لە کۆتایشدا، ئەمەوێت بە وتەیەکی ئاڵتونی ڕەوانشاد نەوشیروان مستەفا کۆتایی بە قسەکانم بهێنم کە لە ژیانی خۆمدا زۆر سودم لێبینوە. ئەو وتی 'لە هیچ حاڵەتێکدا نابێ خەڵک بێئومێد بێ، هەمیشە ئەبێت خەڵک چاوی لە ئاسۆ بێت، بە تەمای پاشەڕۆژێکی باشتر بێ، هیوای گەورەی هەبێ'.
بۆیە، ئومێد ئەکەین سێیەمین کۆنفرانسی نیشتیمانی بە پشتیوانی ئێوەی بەڕێز سەرکەوتوو بێت، با هەمومان ئەمڕۆ بە ڕوحیەتێکی خوشکوبرایانە و پڕ لە بەرپرسیارێتیەوە مامەڵە لەگەڵ یەکتر بکەین.
خوای گەورە پشتیوانمان بێت..
ستەم کامیل
ئەندامی لیژنەی باڵای ئامادەکاری سێیەمین کۆنفرانسی نیشتیمانی
٥ ی ٤ ی ٢٠٢٥