کۆنفرانسی دوهەمی بزوتنەوەی گۆڕان بەرەو کوێ...؟
1/23/2024 11:22:00 AM
بەختیار شارەزووری و سەرکەوتی جیهاز
دۆخی هەرێم لەسەر
دوو ئاستی ناوخۆی و دەرەکیدا لە دۆخێکی تەواو هەستیاری مێژوییدایە ، بە جۆرێک لەئاستی
دەرەکیدا کەوتوەتە سەر هێڵی بەریەککەوتنی وڵاتانی زلهێزی ناوچەیی و دەرەکی ، ئەگەر
پێشتر هەرێم شوێنێک بوبێت بۆ گرێدانی بەرژەوەندی وڵاتانی دنیا ، ئەوا ئێستا خەریکە
ململانێکانیان گەورەتر دەبێت لەبەرژەوەندییەکانیان و هەرێم لەبەردەم ئاڵنگاری دەرەکیدایە
، لەسەر ئاستی ناوخۆش هەرێم دابەش بوە بۆ دوو زۆن و هەریەکەیان سەر بە دەوڵەتێکی
دژەکوردە ، لە حکومڕانیدا لەسەر ئاستی هەمو سێکتەرەکان لە قەیرانێکی قوڵدایە و کەوتوەتە
بەردەم ئاڵنگاری ناوخۆییەوە.
حیزب بە گشتی لای
هاوڵاتی و ئەوەی پێی دەوترێت شەقام متمانەی نەماوە و لە دۆخێکی قەیراناوی قوڵدایە
خۆ ئەگەر گۆڕان وەک سەرەتای دەرکەوتنی بە دۆخی چارەسەر ببینین ئەوا پلاتفۆرمەکانی
و پڕۆگرامە سیاسیەکەی هەڵگری فریادڕەسی ئەو دۆخەن کە هەم حیزب و هەم حکومڕانی دەبێت پەیڕەوی بکەن بە گۆڕان خۆشیەوە
کە وەک حیزب لە قەیرانی قوڵدایە ، خۆ ئەگەر لە٢٠١٠ وە پەیڕەوی بەرنامەکانی گۆڕان
بکرایە ئێستە نە حکومەت و نە حیزبەکان و نە پرۆسەی دیموکراتی و تا دەگاتە گۆڕان خۆی
توشی ئەم قەیرانانە نەدەبون و ئامادەگی تەواو دەبو لەبەردەم ئاڵنگارییەکاندا ،
گرنگترین خاڵێ ئەوەیە کە سەروەریە بۆ گۆڕان کە دەنگدەری ئازادە و بۆ یەکەمین جارە
هاوڵاتی بوە بە سەنتەر دەتوانێ ٢٥کورسی و زیاترت بداتێ و سفریشت بکاتەوە.
ئێستا دەبێ بپرسین
دوای شکستی گۆڕان چی بکرێ و کۆنفرانسی نیشتمانی گۆڕان چی لە هەگبەکەیدایە ، کۆنفراس بزوتنەوەی گۆڕان دەگەیەنێت بە کوێ ..؟
گۆڕان بە سفربونەوەشی
بەدەر لە پلاتفۆرم پڕۆگرامی سیاسی و فۆرمی هەیکەلەی ڕێکخستنی خاوەنی کۆمەڵێک سەرەوەری
گەورەیە وەک :
١-تاکە حیزبە کە پاشکۆیەتی وڵاتانی ڕەتکردوەتەوە
و تەواو نیشتمانیە ، هەر بۆیە لەگەڵ بەرژەوەندی وڵاتان و حیزبەکانی هەرێم نەدەهاتەوە
و بەرەیەکی گەورەی ناوخۆیی و ناوچەیی دژی وەستانەوە .
٢-ئەندامانی ئازادییەکی تەواویان هەیە و
لەم کۆنفرانسەدا دەرکەوت کە زۆرترین مشتومڕ و گفتوگۆی توندی لێکەوتەوە ، لە بەرامبەردا
کۆنگرەی حیزبەکانی تر ژینگەیەکی سەربازی ترس و تۆقین تەواوی کۆنگرەکانی داگیر
کردبو .
٣-بەرپرسانی گۆڕان شوێنی تایبەت و پێشەوەیان
نەبو وەک هەمو بەشداربوەیەکی کۆنفرانس بەشدار بون و کورسی پێشەوە بۆ خاوەن پێداویستی
تایبەت و کەسوکاری شەهیدان بو.
ئەوەی دەمێنێتەوە
بپرسین دوای کۆنفرانسی نیشتمانی دەکرێ ئەم پرسیارانە لە خۆمان بکەین :
١-ئایا دەتوانرێ لە ماوەیەکی دیاریکراودا
گۆڕان کۆنفرانسە ناوخۆییەکانی بکات و هەڵبژاردن کۆی ئۆرگانەکانی بگرێتەوە؟.
٢-ئایا دەتوانرێ لێپێچینەوە و چاودێری و
لێپرسینەوە بکات لە کۆی پرسەکانی؟.
٣-لەناو حکومەتدا مانەوە ، هەر وەک خۆی دەمێنێتەوە
یان بەدواداچون دەکرێ بۆ کۆی پۆستە حکومییەکان کە تا چەندێ پلاتفۆرمی گۆڕانیان جێبەجێکردوە؟.
٣-ئایا لێکەوتەکانی کۆنفرانسی نیشتمانی دەتوانێ
دەروازەیەک بێت بۆ کۆکردنەوەی کۆی ناڕازییەکان ، بە ناڕازی گۆڕان و پاشان حیزبەکانی
تریشەوە؟.
٤-ئایا گۆڕان دەتوانێ بە پێی پێویستی بەرگریکردن
لە مافی شەقام و هاوڵاتی گوتاری خۆی بگۆڕێ؟.
٥-ئایا دەتوانین جیاوازییەکانمان لەگەڵ حیزبە
نەریتگەراییەکانی تردا بگێڕینەوە و ببینە جێی متمانەی هاوڵاتی و بڵێین بەڵێ ئێمە جیاوازین.؟
٦-ئایا دەتوانین ببینە گوشار بۆ دەستکاریکردنی
ڕەسمی ڕێککەوتنامەی ستراتیژی..؟
٧-دەتوانین ببینە ژینگەیەک بۆ دروستکردنی
سەرکردەی کاریگەر و بڕیاری دەستەجەمعی..؟
چەندین خاڵی تر
وامان لێدەکات بڵێین ئایا دەتوانین هەم کۆنفرانسی نیشتمانی گۆڕان و هەم دروشمی (لەبەردەم
ئاڵنگارییەکاندا) بوژاندنەوەیەکی گەورە دروست بکەین و ببینە خاوەنی گوتاری شەقام و
دەنگی هاوڵاتی..؟؟
گۆڕان لەبەردەم
ئاڵنگاری قورسدایە گەر نەتوانێ سیاسەتێکی واقعیانە بکات و ڕاسپارەکانی کۆنفراسی نیشتمانی
جێبەجێ بکات ، ئەوا دەبێتە مێژوو.