ئایا کورد کەسی وەک موقتەدای تێدا هەیە؟
7/16/2022 10:03:00 AM
ئامانج هەرتەلی
موقتەدا سەدر خۆی
سەلماند لە عێراق، دوای کشانەوەی لە پەرلەمان پەیامی ڕوونی گەیاندا سیاسیەکانی عێراق،
هەر جوڵەو نیەتێک پێچەوانەی ڕەوتی سەدر هەنگاوبنێن، ئەوا بەیەک لەسەر چواری ئەم حەشامەتە
لەشەقامی عێراقی تڕۆیان دەکات، بۆ ئەوەی لەڕیز دەرنەچن سیاسیەکانی عێراق دەبێت چاویان
لەسەر تویتەکانی سەدربێت لەهەرکاتێک زەوقی هێنا وەک قومبەلەیەک بیدات لەساحەی سیاسی
عێراق و عێراق بۆسیاسیەکان بکاتە دۆزەخ.
بەڵام ئەوەی جێگای
نیگەرانییە پاڵەوانەکانی سەرشاشەی تیڤیەکان و بەردەم لایڤی تۆڕەکۆمەڵایەتیەکان، ئەوانەی
هەرخەریکی تیغ سوونن، ناشتوانن بۆجارێک وەک موقتەدا پێشەنگایەتی شەقامی کوردی بکەن،
لەکوێن؟
دەیانەوێت خەڵک
شەقام بگرێت و ئەوانیش بێن مایک بگرنە دەست و قسەی بێگومرگ بکەن، لەکاتێکدا لەسایەی
خەڵکی ئەم هەرێمە بونەتە خاوەنی هەمووشتێک و لەسێبەری خەڵکانێک گەورەبوونە و گەفیان
دەکرد، ئێستاش وەک مشک خۆیان ئاخنیوەتەوە کونەکانیان، لەکاتێکدا خەڵکی کوردستان لە
قورسترین نەهامەتی و ماڵوێرانیدا ڕۆژانە ژیان دەکات. لەئێستادا هەرکەسێک بیەوێ لەشەقامدا
ئاڵا هەڵگربێت، ڕێبەرایەتی کۆمەڵگەبکات و خاوەندارێتی لە مافی خەڵک بکات، دەتوانێت
ببێتە موقتەدایێکی کورد و ڕێڕەوی شەقامی سیاسی بگۆڕێت.
زۆرن ئەوانە بەخەیاڵ
گەورەن و پێیان وایە شەقامی سیاسی کوردی تەنها ئەوانی تێدایە، لێیان بپرسە دەڵێن ئێمە
هەست بەمووعاناتی خەڵک دەکەین، لەکاتێکدا ئەوانە شەوڕۆژ لەخۆشترین شوێن و لەناو
نازونیعمەتدا سەردەکەنەوە، خەڵکیش لەنەهامەتی.
بەشێکی زۆریان ئێستا
وەک منداڵی زۆڵی دەسەڵات وان، لە ناوتۆڕەکۆمەڵایەتیەکاندا خۆیان گرژدەکەن، لەعەرزی
واقیدا خۆیان دەشارنەوە. لەهیچ وەخت و سەردەمێکدا هێندەی ئێستا خەڵک چاوی لە ڕێبەرێک
نییە بۆ پێشەنگایەتی تا جۆش بخوات و تۆڵەی سی ساڵەی خراپی حوکمڕانی لەم دەسەڵاتە
بکەنەوە. ئەم دەسەڵاتەی بەرامبەر بەخەڵکی کوردستان هەموو پێوەرەکانی ئەخلاقی تێکشاندوە.
زۆربەی نوسەران
و خەڵکی نزیکی دەسەڵاتی کوردی دەیانەوێت ئەوهێزە موقتەدا سەدر لەساحەی سیاسی بێ بایەخ
بکەن، بەتایبەت ئەوانەی هیچیان لەباردانیە، بە پێچەوانەوە ئێستا لەهەمووکات زیاتر
شەقامی عێراقی دڵخۆشە بەوەی پیاوێک عەرزی عەزاڵەتی بەسەر شەقامی سیاسی عێراقدا کردووە،
چونکە لەلایەک خۆی لەسوڵتەنیە بەوە کەچاو لەدز و جەردە سیاسیەکان بپۆشێ لەلایەکتر
سیاسیەکانی عێراق لەمەودوا ناتوان بەشێوەی پێشوو درێژە بەسیاسەتی خراپ بدەن بەرامبەر
بەخەڵکی هەژاری عێراق، بەڵکو لەمڕۆ بەدواوە زیاتر دەکەونە خزمەتکردنی خەڵک و دوورکەوتنەوە
لەگەندەڵی و خراپ بەڕێوەبردنی وڵات بەوەی لەدەرەوەی دەسەڵات، مرۆڤێک هەیە دەتوانێ
شەقامی سیاسی بۆ پیوانی سیاسی بکات بەجەهەنەم. ئیتر عێراقی ئەمڕۆ لە عێراقی دوای
ساڵی٢٠٠٣ ناچێت.
لەکوردستان دوای
ئەم هەموو قەیران و ماڵوێرانی و نەهامەتیە، دوای داگیرکردنی هەموو سێکتەرەکان لەلایەن
کۆمپانیاکانی حیزب، گەلی کورد پێویستی بە موقتەدایەکە، ئێستا کێ لەخۆی ڕادەبینێ ببێتە
موقتەدا و خاوەندارێتی لە شەقامی کوردی بکات؟