لەم چوونو نەچوونە سەریسوڕماوە دەنگدەر
2/7/2019 4:02:00 PM
سەردار قادر
ئەم كابینەیە دوائەكەوێت، دان‌وسانەكان بەردەوامە، هەر رۆژەی بابەتێك بڵاوئەبێتەوە، متمانە ونە لەنێوان لایەنەكاندا چ ئەوانەی لە دان‌وساندان بۆ پێكهێنانی كابینە، یان ئەوانەی كە ئامادە نین بەشداری كابینە بكەن. پارتی وەك براوەی یەكەم لە دان و ساندایە لەگەڵ لایەنەكان بۆ پێكهێنانی كابینە، بەڵام ئەویش هاتووی كۆمەڵێ گرفتە ؟؟ لە زەمەنی سەرۆكی هەرێمدا كوڕ جێی برازا ئەگرێتەوە؟؟ دەسەڵات بەشكردن یان رێكخستنەوەی ناخرێتە دوای خۆی!! كە ئەمەش هەوڵێكی نوێیە بە بەراورد بە لایەنەكانی تر كە لە كوردستاندا بنەماڵە رۆڵی هەیە!! ئایا گرفتی دەسەڵات هەمووی ئەخرێتە سەر كابینەی پێشوو؟ شكستەكان بە بەری ئەواندا ئەكرێت؟ كابینەی كوڕ هاتووی دەزگایەكی ئەمنی ئەكرێتە فریاد رەس وە چوار ساڵی داهاتوو مەسرورێتیە بۆ هاووڵاتیان؟ فەرەحیەك روو ئەكاتە ماڵ و گیرفانی خەڵك؟؟ ئایا وڵات ئەبێتە رووبەرێك بۆ قەتیسبوونی ئازادیە گشتیەكان یان ئەبێتە سەردەمی چاكسازی؟ ئایا شەقامی هێمن بە مانای قەدەغەكردنی خۆپیشاندان دێت یان نەمانی پاشەكەوت و بوونی خزمەتگوزاری گشتییە؟ ئایا لامەركەزیەتی ئیداری و دارایی بۆ پارێزگاكانی هەرێم مۆركی چوار ساڵی داهاتووە یان ئەوەندەی تر چڕبوونەوەی دەسەڵات لە هەولێر؟؟ پارتی لەسەر كەیسەكانی پڕ ململانێ لەگەڵ یەكێتی وەك سەرۆك كۆمارو كێشەی شانزەی ئۆكتۆبەرو پارێزگاری كەركوك، كە جاری وا هەیە لەسەر ئەندامانی وەفدی دان وسانی یەكێتی گرفتی هەیە، هەموو ئەمانە ئەگاتە ئەوەی پێكبێن؟؟
بەم خاڵانەی پارتیەوە ئەكرێت بڵێین كابینە بەم زووانە پێكدێت؟؟ یەكێتی بەو خاڵی ناكۆكیانەوە لەگەڵ پارتی، وە كێشە ناوخۆییەكانی خۆیەوە ئەبێت چۆن بتوانێت دانوسانێكی سەركەوتوو بكات و كابینە زوو پێكبێت؟ ئەو تەكەتولانەی ناو یەكێتی تا ئێستا بۆتە بەشێك لە رەوتی دان وسانەكان، تائێستا سەرۆكایەتی پەرلەمان ساغ نەبۆتەوە كە چ كاندێدێك ئەو پۆستە وەرئەگرێت؟ لە دوای رێكکەوتنی دەباشانی نێوان یەكێتی و گۆڕان جۆرێك لە دابڕان یان هودنە هەیە لەنێوانیاندا!! هەركاتێك یەكێتی لە دەرگای گۆڕان ئەدات بۆ كۆبوونەوە ئەبێت بپرسرێت كام تەكەتولە ئەو كۆبوونەوەیەی ئەوێت وە لە غیابی متمانەدا بیركردنەوەیەك دروست بووە، كە یەكێتی لە كۆبوونەوەی گۆڕان کەڵک وەرئەگرێت بۆ ململانیەكەی لەگەڵ پارتی، واتا كۆبوونەوە نیە بۆ مەسەلە ستراتیژیەكان ئەوەندەی تاكتیكە بۆ ململانێی پارتی؟؟؟ لە سنووری حكومەتی خۆجێی تا ئێستا یەكێتی بەشێك لەو رێكکەوتنەی جێبەجێ نەكردووە ئیتر ئەبێت بۆ كابینە لەگەڵ گۆڕاندا چ متمانەیەك هەبێت؟؟
تائێستا پرۆسەی نان بڕین و سزای سیاسی بەتایبەت لەناو هێزە ئەمنیەكاندا بەردەوامە، ئەكرێت بێ چارەسەری ئەو كێشانە كۆبوونەوە بۆ بابەتی نوێ بكرێت؟؟ هەڵسوڕاوان و دەنگدەرانی گۆڕان لە چوون و نەچوونی گۆڕان سەریان سوڕماوە؟؟ گۆڕان بە ئەجەندەی كارنامەو پرۆژەی چاكسازی ئەیەوێت بەشداری كابینە بكات، گۆڕان بە پێشینەیەكی خراپی كابینەی پێشوو لەگەڵ پارتی گرەنتی چیە بۆ دووبارە نەبوونەوەی؟ ئەم جارە وەزیرەكانی گۆڕان تەنیا ئەنێرنەوە یان لە سەرۆكی نوێی كابینە، كە هاتووی دەزگایەكی ئەمنی گەورەی وڵاتە سزای گەورەتر نادرێن؟؟؟ ئایا غیابی كاك نەوشیروان و كەمكردنەوەی كورسیەكان رۆڵی نیە لە سەنگی گۆڕان لە كابینەی داهاتوو؟؟ لەكاتی كاك نەوشیروان و بەها بەرزەكانی كەسی خۆی لەكاتی بەشداری كابینەدا زۆرێك لە هەڵسوڕاوان گەر زۆر شایستەی كارێك یان پۆستێك نەبوویتایە رووی داوای پۆست و كارت نەبوو وە كاتێك پۆستێكت هەبوایە جگە لە بەها كەسیەكان و كۆمەڵایەتیەكان شەرم لە كەسێتی كاك نەوشیروان وای ئەكرد دیاردەی لادان لە رێبازی گۆڕان زۆر كەم بوو ئایا لە داهاتوودا بەو جۆرە ئەبێت؟؟ ئەوەی سەری سوڕماوە تەنیا هاووڵاتیە، ئەوەی زەرەرمەندی گەورەیە تەنیا هاووڵاتیە، گیرفانی هاووڵاتیە بەتاڵە، كارەبای هاووڵاتیە كێشەیە، فرسەتی كارو كێشەی بژێویی هەر هی هاووڵاتیە.