گۆڕان ئەو چەقبەستوەی ئێستای نەڕەوێنێتەوە، دەبێ چاوەڕێی مردنێکی حەتمی بکات
3/30/2024 9:34:00 AM
مەهدی کاوانی
با بڵێین پێشتر
دەگوتراو دەگوترایەوە ، سەرکردایەتی بزوتنەوەی گۆڕان کە دەکاتە ئەندامانی جڤاتی نێشتمانی
، تەمەنی سیاسی خۆیان بەڕێکردووەو پێشیەوە
شەرعیەتی بڕیاردانیان نەماوە .
باشە ئەی بۆ ئێستاکە
، گۆڕان کۆنفراسی نیشتمانیشی کردو هەڵبژاردنە ناوخۆیەکانیشی کرد .
ئایا کاتی ئەوە
نەهاتووە بزوتنەوەی گۆڕان با بڵێین لە ڕێگای ئەو تازە بوونەوەی ، بڕیار لە سەر کۆتایی
هێنان بەو چەقبەستوەی و بگەڕێتەوە بۆ ناو ڕای خەڵک کە دەکاتە سەر دەمەکانی ڕەوانشاد
نەوشێروان موستەفا .
ئایا ئەو سەرکردایەتیە
نوێیەی گۆڕان لەو ئاسته دەبێت کە بتوانێ بزوتنەوەی گۆڕان لەو چەقبەستوەی ڕزگار کات
، یانیش هەمدیسان لە ڕێگای دەسەڵاتی قولەوە وەک جاری جاران ، ڕێگری لێ دەکرێت .
باشە چی بکات
بۆ ئەوەی بتوانێ ئەو چەقبەستوەی بڕەوێنێتەوە؟ .
وەک ڕای خۆم ئەو
ڕەوینەوەیە ، هەندێکیان لەو خاڵانەی لای خوارەوە دەبینم :
1- دەبێ جڤاتە نیشتمانیە
نوێکە ، هەرچی زووە کە کارەکەی لە هەفتەیەک زیاتر نەخایەنێ ، بە چەشنی نوێکردنەوەی
باژێروانەکانیشی ، هەڵبژاردنێک بکات ، کە ئەوانەی خۆیان بۆ ژوورەکان کاندید دەکەن، وەک هی باژێروانەکان بێت بە ڕێگای نهێنی دەنگیان
پێ بدرێ و بە دوایەوە دەستە نوێیەکە دەست بەکار
بێت .
2- دوای ئەو نوێبوونەوەی
ژوورەکان و زۆر بە پەلە دەبێ جڤاتە نیشتمانیە
نوێکە بە باژێروان و ژوورەکان خانەیەکی نوێ و ڕێکخەرێکی نوێ هەڵبژێرن .
3- دوای ئەوەش دەبێ هەرچی
زووە ئەو سەرکردایەتیە نوێیە بە جڤات و خانەو ڕێکخەرەوە کار لە سەر جێبەجێکردنی ڕاسپاردەکانی
کۆنفراسی دوو بکەن کە بریتیە لە کشانەوە لە ناو حکومەت و بەشداری کردن و نەکردنی
بزوتنەوەی گۆران لەو خولەی هەڵبژارنی پەڕلەمانەوە .
4 - ئەگەر پرسیاری لەو بابەتەش
بکرێ وەک بگوترێ کاتی وەها لە بەر نزیک بوونەوەی هەڵبژاردنی پەڕلەمان ڕێگەی ئەوەمان
پێ نادا کە لە کشانەوە لە ناو حکومەت و هەڵبژاردن بکەین ، لە وەڵاما دەڵێم زۆر
ئاساییە هەتا ئەگەر 15 ڕۆژیش بۆ کردنی هەڵبژاردن و کشانەوە لە حکومەت بدرێ ، دەکرێ
گۆڕان هەردو تیمەکەی خۆی لە ناو حکومەت و تیمی هەڵبژاردن بکێشیتەوە .
5- دیارە پڕۆسەی ئاشتەوایی
گۆڕان کە تا ڕادەیەک بە بندەست ڕۆێشتوە ، بەڕای خۆم دوای نوێبوونەوەی سەرکردایەتی
بزوتنەوەی گۆڕان ،دووبارە دەبێ چالاک بکرێتەوە .
6- با فراوانتر بچینە ناو
باسەکە کە پەیوەندیەکی زۆری بە ئەو چەقبەستوەی گۆڕانەوە هەیە کە دەکاتە ئەوەی وەک
بڵێین بزوتنەوەی گۆڕان تەنیا خۆی لە گۆڕانخوازانی ئێستای گردەکە نابینیتەوە بەلکو
ئەوان و ئەوانەی دەرەوەی گردەکەو لە گەڵ دەنگدەرانی گۆڕانی سەردەمەکانی نەوشێروان
. ئەوانە هەر هەموانیان مادامەکێ بە ڕەها پابەند بوونی خۆیان بۆ هیچ حیزبێکی سیاسی
تر دەرنەبڕیە ، کەواتە ئەوانە هەر هەموانیان کۆلەگە سەرەکیە پێکهێنەرەکەی گۆڕانن
با بۆ ئێستاکە لە ژێر کۆمەڵە هۆکارێکەوە دەناو گۆڕانی گردەکە دابڕابن . ئەگەر بڕوانینە
ئەو 70٪ کە بایکۆتی هەردو هەڵبژاردنی کوردستان و عیراقیان کرد بەشە هەرە زۆرەکەی دەنگدەرانی
گۆرانی سەردەمەکانی ڕەوانشاد نەوشێروان بوون .ئیدی ئەگەر ئەوە بە چەقبەستو حیسابی
بۆ نەکرێ ، چەقبەستو چ مانایەک دەگەیەنێ .
ئەگەر بێتو دەسەلاتە
نوێکەی گردەکە کە لە دامەزراندن دایەو لە گەڵ هیمەتی دابڕاوەکان کارو کاردانەوەکانیان
بە ئاڕاستەی یەک بوونەوە ڕێک نەخەن ، دەکاتە مانای ئەوەی کە چەقبەستوی گۆران لە شوێن
خۆی مراوەحە دەکات . هەنگاوە یەکەمەکەی جڤاتە نیشتمانی و خانەو ڕێکخەرە نوێیەکە دەبێ
کاری ئەوەل و ئاخریان گەڕانەوە بێت بۆ مەبدەئەکانی ڕەوانشاد نەوشێروان .
7 - دەباشانیش پڕۆژەیەکی هەرە
زیندوی یەکیەتی نیشتمانی کوردستان و بزوتنەوەی گۆڕان بوو و بەندە وەهام خوێندنەوە
بۆ دەکرد کە دوا وێسگەی کۆکردنەوەی ئەو دوو حیزبە بوو لە ناو یەک حیزبی سیاسی . دیارە
ئەو پڕۆژەیەش لە لایەن دوو کەسایەتی هەرە بەرزی سیاسی کە ڕەوانشاد نەوشێروان و ڕەوانشاد
مام جەلال بوو و گوناهە بۆ هەردو حیزبی سیاسی یەکیەتی نیشتمانی کوردستان و بزوتنەوەی
گۆڕان کاری لە سەر زیندوکردنەوەی بۆ نەکەن .
دیسان بەندە وەهای
دەبێنم کە ئەگەر بێت و بزوتنەوەی گۆڕان وێڕای ئاماژەکانی سەرەوە هەتا یەک لایەنانەش
بێت ، دەبێت قسەو باسی لە سەر بکات .